އީރާނުގެ އެއާލައިންތަކުގެ ދަތުރުތަކަށް ޔޫއޭއީން ހުރަސްއަޅަން ފަށައިފި
25 ސެޕްޓެމްބަރު 2026 | ހުކުރު 06:00އެމެރިކާގެ ދަތިކުރުމުގެ ފިޔަވަޅުތަކާ ގުޅިގެން ޔޫއޭއީގެ އިތުރުން ބައެއް އެހެން ގައުމުތަކުން ވެސް އީރާނުގެ އެއާލައިންތަކަށް ދަތުރުކުރުން މަނާކޮށް، އެ ގައުމުގެ ބޭންކުތަކާއެކު އޮންނަ މާލީ މުއާމަލާތްތައް ވަނީ ހުއްޓާލައިފި. މި ނިންމުމުގެ ސަބަބުން އީރާނުގެ ވައިގެ ދަތުރުފަތުރަށް ބޮޑެތި ހުރަސްތަކެއް ކުރިމަތިވެފައިވާއިރު، މި މައްސަލަ ހައްލުކުރުމަށް އީރާނު ސަރުކާރުން މިހާރު ދަނީ ޑިޕްލޮމެޓިކް ފެންވަރުގައި މަޝްވަރާ ކުރަމުން
އީރާނުގެ ތެހެރާންގައި ހުންނަ އިމާމް ޚުމައިނީ އިންޓަނޭޝަނަލް އެއާޕޯޓުގެ ފްލައިޓް އިންފޮމޭޝަން ބޯޑެއް | އޭޕީ
އީރާނުގެ ވައިގެ ދަތުރުފަތުރުގެ ދާއިރާއަށް ފިއްތުންތައް ކުރިމަތިކުރުވުމަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކާ ގުޅިގެން، އީރާނުގެ އެއާލައިންތަކުން ކުރަމުންދިޔަ ދަތުރުތައް ޔުނައިޓެޑް އަރަބް އެމިރޭޓްސްއިން (ޔޫއޭއީ) ހުއްޓާލައިފި އެވެ. ޔޫއޭއީން މި ފިޔަވަޅު އަޅާފައި މި ވަނީ، އެމެރިކާގެ ދަތިކުރުމުގެ ފިޔަވަޅުތައް ތަންފީޒުކުރަމުންދާ އެހެން ގައުމުތަކާ އެކުގަ އެވެ.
މި ކަމާ ގުޅޭ ގޮތުން ޔޫއޭއީގެ ޖެނެރަލް ސިވިލް އޭވިއޭޝަން އޮތޯރިޓީން ނެރުނު ބަޔާނެއް އެ ގައުމުގެ ރަސްމީ ޚަބަރު ފަތުރާ ޑަބްލިޔުއޭއެމް ނޫސް އޭޖެންސީން ބުރާސްފަތި ދުވަހު ވަނީ އާންމުކޮށްފަ އެވެ. "ޖެނެރަލް ސިވިލް އޭވިއޭޝަން އޮތޯރިޓީން ވަނީ އީރާނުގެ އެއާލައިންތަކުން ޔޫއޭއީއަށް އަދި ޔޫއޭއީން ފުރައިގެން ދާ ހުރިހާ ދަތުރުތަކެއް މެދުކަނޑާލާފައިވާކަން އިއުލާނުކޮށްފައި" އެ ބަޔާނުގައި ބުނެފައިވެ އެވެ. އަދި، މި ނިންމުމަކީ "އީރާނުގެ އެއާލައިންތަކަށް ދުނިޔޭގެ އެއާޕޯޓްތައް ބޭނުންކުރުން ހުއްޓުވުމަށް އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކުގެ މައްޗަށް ބިނާކޮށް" ނިންމި ނިންމުމެއް ކަމަށް ވެސް އެ ބަޔާނުގައި ފާހަގަކޮށްފައިވެ އެވެ.
އެމެރިކާގެ ދަތިކުރުމުގެ އާ ފިޔަވަޅުތަކުގެ އިންޒާރާއެކު، އީރާނުގެ އެއާލައިންތަކަށް ޖާގަ ދިނުން ހަނިކޮށް ނުވަތަ ދަތުރުތައް މެދުކަނޑާލި ގައުމުތަކުގެ ތެރޭގައި ޔޫއޭއީގެ އިތުރުން އޮމާން، އިރާގު، އަޒަރުބައިޖާން، ޖޯޖިއާ އަދި ތުރުކުމެނިސްތާން ހިމެނެ އެވެ. ޔޫއޭއީގެ ވިޔަފާރީގެ މައި މަރުކަޒު ކަމަށްވާ ދުބާއީއަކީ އީރާންގެ ގިނަ އަދަދެއްގެ ރައްޔިތުން ދިރިއުޅޭ، އަދި އެ ގައުމާ ވިޔަފާރީގެ ބަދަހި ގުޅުންތަކެއް އޮންނަ، އީރާނުގެ އެއާލައިންތަކުން ކޮންމެ ދުވަހަކު ގިނަ ދަތުރުތަކެއް ކުރަމުން އައި މުހިންމު މަންޒިލެކެވެ. ނަމަވެސް، ޓިކެޓް ދޫކޮށްފައި ވަނިކޮށް، ބުރާސްފަތި ދުވަހުގެ ހެނދުނު ތެހެރާނުން ދުބާއީއަށް ފުރަން އޮތް އީރާން އެއާޓުއާގެ ދަތުރެއް ފުރަން ކުޑަތަންވެފައި ވަނިކޮށް ކެންސަލްކޮށްފައިވާ ކަމަށް ރިޕޯޓުތައް ބުނެ އެވެ.
އީރާނާ ދެކޮޅަށް އެމެރިކާއިން ކުރަމުންދާ ހަނގުރާޏައިގެ ތެރެއިން އީރާނުގެ މިސައިލްތަކާއި ޑްރޯން ހަމަލާތައް ތަކުރާރުކޮށް އަމާޒުވި ޔޫއޭއީން ވަނީ، ވޭތުވެދިޔަ މަހު އީރާނާއެކު އޮތް ވިޔަފާރީގެ އަދި މާލީ މުއާމަލާތްތައް ވެސް މެދުކަނޑާލާފަ އެވެ. މިއާއެކު، މަނީ ލޯންޑަރިން، ޓެރަރިޒަމް އަދި ހަތިޔާރު ފެތުރުމާ ދެކޮޅު ގަވާއިދުތަކާ ޚިލާފުވެފައިވާ ކަމަށް ބުނެ، އީރާނުގެ ބޭންކް މިއްލީއާއެކު މާލީ މުއާމަލާތުތައް ހިންގުން ޔޫއެއީގެ މަރުކަޒީ ބޭންކުން ބުދަ ދުވަހު ވަނީ ހުއްޓާލާފަ އެވެ.
އެމެރިކާގެ މާލީ ވުޒާރާއިން މި މަހުގެ ކުރީކޮޅު ވަނީ އީރާނުގެ ވައިގެ ދަތުރުފަތުރުގެ ދާއިރާއަށް އަމާޒުކޮށް ވަރުގަދަ ފިޔަވަޅުތަކެއް އިއުލާނުކޮށްފަ އެވެ. މި ފިޔަވަޅުތައް އަމާޒުކޮށްފައި ވަނީ އީރާނުގެ 27 އެއާލައިނަކަށާއި، އެ އެއާލައިންތަކަށް އެހީތެރިކަން ފޯރުކޮށްދޭ އެތައް ކުންފުންޏަކަށެވެ. މީގެ މައިގަނޑު ބޭނުމަކީ އީރާނުގެ ވައިގެ ގުޅުންތައް އެއްކޮށް ކަނޑާލުމެވެ. އަދި، އީރާނުގެ އެއާލައިންތަކަށް ޚިދުމަތްދޭ ކޮންމެ އެއާޕޯޓަކަށް ނުވަތަ ކުންފުންޏަކަށް އެމެރިކާ ޑޮލަރުގެ ނިޒާމު ބޭނުންކުރުން ހުއްޓުވުމުގެ ނުރައްކާ އޮތް ކަމުގެ އިންޒާރު ވެސް އެމެރިކާއިން ވަނީ ދީފަ އެވެ.
ޔޫއޭއީއަށް އަލުން ދަތުރުތައް ފެށުމަށާއި އަޅާފައިވާ ހުރަސްތައް ނައްތާލުމަށް މަސައްކަތް ކުރަމުންދާ ކަމަށް އީރާނުގެ ސިވިލް އޭވިއޭޝަން އޮގަނައިޒޭޝަންގެ ތަރުޖަމާނު މަޖީދު އަޚަވާން ވިދާޅުވި އެވެ. "މި ހުރަސްތައް ނައްތާލައި، އަލުން ދަތުރުތައް ފެށުމަށް ޓަކައި ޑިޕްލޮމެޓިކް އަދި ވައިގެ ދަތުރުފަތުރާ ގުޅޭ މަޝްވަރާތައް ދަނީ ކުރެވެމުން،" އޭނާ ވިދާޅުވި އެވެ.
މީގެ އިތުރުން، ތެހެރާނުން ދުޝާންބޭއަށް ބުރާސްފަތި ދުވަހު ދަތުރުކުރި ފްލައިޓެއް ތުރުކުމެނިސްތާނުން ވެސް އަނބުރާ ފޮނުވާލާފައިވާ ކަން އޭނާ ހާމަކުރެއްވި އެވެ. "ތުރުކުމެނިސްތާނުގެ ވައިގެ ސަރަހައްދުން ދަތުރުކުރުމުގެ ހުއްދަ އީރާނުގެ ބޯޓަށް ދިނުމަށް އެ ގައުމުން އިންކާރުކުރުމުން، އެ ބޯޓަށް ދަތުރު ކުރިއަށް ނުގެންދެވި އަނބުރާ ދާން މަޖުބޫރުވި،" އީރާނުގެ އައިއާރްއެންއޭ ނޫސް އޭޖެންސީއަށް ދެއްވި ބަސްދީގަތުމެއްގައި އަޚަވާން ވިދާޅުވި އެވެ.
އެމެރިކާގެ ފިއްތުންތަކަށް ބޯނުލަނބާ ދެ ގައުމު ކަމަށްވާ ޗައިނާ އަދި އަރްމީނިއާއަށް އީރާނުގެ ކުދި ބައެއް އެއާލައިންތަކުން އަދިވެސް ދަތުރުކުރަމުންދާއިރު، ބައެއް އެއާލައިންތަކަށް ތުރުކީވިލާތަށް ކުރާ ދަތުރުތައް އަދިވެސް ހުޅުވިފައިވާ ކަމަށް ވެސް ރިޕޯޓުތައް ބުނެ އެވެ.
މަސްދަރު: އަލް ޖަޒީރާ
