ކޭން އަށް ހުއްޓުމެއް ނެތް، ޗެކް ރިޕަބްލިކް ބަލިކޮށް އިންގްލެންޑަށް ފުރަތަމަ މޮޅު

ޔުއެފާ ނޭޝަންސް ލީގުގައި ޗެކް ރިޕަބްލިކާ ދެކޮޅަށް ކުޅުނު މެޗުން މޮޅުވެ، އިންގްލެންޑުން މުބާރާތުގައި އެ ޓީމުގެ ފުރަތަމަ މޮޅު ހޯދައިފި އެވެ.

އަންގާރަ ދުވަހުގެ ރޭ ޗެކް ރިޕަބްލިކާ ދެކޮޅަށް ކުޅުނު މެޗު އިންގްލެންޑުން ކާމިޔާބު ކުރީ 2-0 އިންނެވެ. މެޗުގައި އިންގްލެންޑުން އެ ޓީމުގެ ދެ ލަނޑު ވެސް ޖެހީ މެޗުގެ ދެ ވަނަ ހާާފުގަ އެވެ.

މެޗުގެ ފުރަތަމަ ހާފުގެ 23 ވަނަ މިނެޓުގައި ޗެކް ރިޕަބްލިކްގެ ޕަވެލް ސުލްޗް އަށް ވަނީ ސީދާ ރަތް ކާޑު ދައްކައިފަ އެވެ. އޭގެ ފަހުން އެއް ކުޅުންތެރިޔަކު މަދުން ކުޅެމުން ދިޔަ ޗެކް ރިޕަބްލިކް ކޮޅަށް ލަނޑު ޖަހަން ފުރަތަމަ ހާފުގައި ވެސް އިންގްލެންޑަށް ފުރުސަތު ލިބުނެވެ.

މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި އިންގްލެންޑަށް ލީޑު ނަގައިދިނީ އެންތަނީ ގޯޑަން އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ޓްރެންޓް އެލެގްޒެންޑާ އާނޯލްޑް އެވެ. އޭގެ ކުރިން ސްޕެއިންއާ ދެކޮޅަށް ކުޅުނު މެޗުގައި ވެސް އިންގްލެންޑުގެ ފުރަތަމަ ލަނޑު ޖެހީ ގޯޑަން އެވެ. 

މެޗުގެ 69 ވަނަ މިނެޓުގައި އިންގްލެންޑުގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ކެޕްޓަން ހެރީ ކޭން އެވެ. މި ސީޒަންގައި ތަފާތު ފޯމެއްގައި ކުޅެމުން އަންނަ ކޭން ވަނީ، ސްޕެއިންއާ ދެކޮޅަށް ކުޅުނު މެޗުގައި ވެސް ލަނޑު ޖަހައިފަ އެވެ. ޤައުމީ ޓީމުގެ އިތުރުން ބަޔާން މިއުނިކްގައި ވެސް ކޭން އަންނަނީ މޮޅަށް ކުޅެމުންނެވެ.

މޮޅާ އެކު އިންގްލެންޑު ދެ ވަނައިގައި އޮތީ މިހާތަނަށް ކުޅެފައިވާ ދެ މެޗުން ތިން ޕޮއިންޓާ އެކު އެވެ. އިންގްލެންޑަށް ދެން އޮންނާާނީ ކްރޮއޭޝިއާއާ ދެކޮޅަށް ކުޅޭ މެޗެވެ.