ސާބިއާ ބަލިކޮށް، ނެދަލެންޑްސްގައި ޒަވީ އަށް ފުރަތަމަ މޮޅު

ޔުއެފާ ނޭޝަންސް ލީގުގައި ސާބިއާއާ ދެކޮޅަށް ކުޅުނު މެޗުން ނެދަލެންޑްސް މޮޅުވެއްޖެ އެވެ.

އާދީއްތަ ދުވަހުގެރޭ ސާބިއާއާ ދެކޮޅަށް ކުޅުނު މެޗު ނެދަލެންޑްސް އިން ކާމިޔާބު ކުރީ 2-1 އިންނެވެ. މެޗުގައި ނެދަލެންޑްސް އިން ލީޑު ނަގާފައި ވަނިކޮށް، ސާބިއާ އިން ނަތީޖާ ހަމަހަމަ ވެސް ކުރި އެވެ. ނަމަވެސް، ދެ ވަނަ ލަނޑެއް ޖަހައިގެން ނެދަލެންޑްސް ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 30 ވަނަ މިނެޓުގައި ނެދަލެންޑްސް އަށް ލީޑު ނަގައިދިނީ މެކްސް މީޑިންކް އެވެ. އެއީ އެ ޓީމަށް ލިބުނު ޕެނަލްޓީއެއް ކާމިޔާބުކޮށްގެން އޭނާ ޖެހި ލަނޑެކެވެ. ނަމަވެސް، މެޗުގެ ދެވަނަ ހާފު ފަށައިގެން ދެ ވަނަ މިނެޓުގައި ލޫކާ ޖޮވިކް ވަނީ ސާބިއާ އަށް ނަތީޖާ ހަމަހަމަކޮށްދީފަ އެވެ. މެޗުން ނެދަލެންޑްސް މޮޅުވެފައި ވަނީ 69 ވަނަ މިނެޓުގައި މީޑިންކް ޖެހި ލަނޑުންނެވެ.

ނެދަލެންޑްސް އިން ސާބިއާ ބަލިކޮށްފައިވާއިރު، މިއީ އެ ޓީމުގެ ކޯޗުކަމާ ހަވާލުވި ސްޕެއިންގެ ޒަވީ ހެނާންޑޭޒްގެ އިރުޝާދުގެ ދަށުން ހޯދި ފުރަތަމަ މޮޅެވެ. ޒަވީގެ އިރުޝާދުގެ ދަށުން ނެދަލެންޑްސް ކުޅުނު މެޗުގައި ވަނީ ޖަރުމަނާ އެއްވަރުވެފަ އެވެ. މިހާާތަނަަށް ކުޅެފައިވާ ދެ މެޗުން ހަތަރު ޕޮއިންޓާ އެކު ނެދަލެންޑްސް އޮތީ ދެ ވަަނައިގަ އެވެ.