ކްރޮއޭޝިއާ ބަލިކޮށް، ސްޕެއިން އިން ބަލި ނުވެ 40 މެޗު ހަމަކޮށްފި

ޔުއެފާ ނޭޝަންސް ލީގުގައި ކްރޮއޭޝިއާއާ ދެކޮޅަށް ކުޅުނު މެޗުން މޮޅުވެ، ސްޕެއިން އިން ބަލި ނުވެ 40 މެޗު ހަމަކޮށްފި އެވެ.

އަންގާރަ ދުވަހުގެރޭ އަމިއްލަ ޤައުމުގައި ކްރޮއޭޝިއާއާ ދެކޮޅަށް ކުޅުނު މެޗު ސްޕެއިން އިން ކާމިޔާބު ކުރީ 4-1 އިންނެވެ. މެޗުގެ ފުރަތަމަ ހާފުގައި ސްޕެއިން އިން ދެ ލަނޑު ޖެހިއިރު، އަނެއް ދެ ލަނޑު ޖެހީ ދެ ވަނަ ހާފުގަ އެވެ.

މެޗު ފަށައިގެން ދެ ވަނަ މިނެޓުގައި ސްޕެއިން އަށް ލީޑު ނަގައިދިނީ ލަމީން ޔަމާލް އެވެ. ނަމަވެސް މެޗުގެ 28 ވަނަ މިނެޓުގައި ޑިއޮން ބެލްޖޯ ވަނީ ކްރޮއޭޝިއާ އަށް ނަތީޖާ ހަމަހަމަ ކޮށްދީފަ އެވެ. އޭގެ ތިން މިނެޓު ފަހުން ދެ ވަނަ ފަހަރަށް ސްޕެއިން އަށް ލީޑު ނަގައިދިނީ މާކް ޕުބިލް އެވެ.

މެޗުގެ ދެ ވަނަ ހާފުގެ 63 ވަނަ މިނެޓުގައި ސްޕެއިންގެ ތިން ވަނަ ލަނޑު ޖެހީ ޔަމާލް އެވެ. އެއީ ޕެޑްރީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން މެޗުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް، ސްޕެއިންގެ ފަހު ލަނޑު ޖެހީ ނިކޯ ވިލިއަމްސް އެވެ. އެއީ މިކޭލް މެރީނޯ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

ފީފާ ވޯލްޑް ކަޕްގެ ފަހުން އަމިއްލަ ޤައުމުގައި ކުޅުނު ފުރަތަމަ މެޗުން ވެސް މޮޅުވެ، ސްޕެއިން އިން ވަނީ ބަލި ނުވެ 40 މެޗު ހަމަކޮށްފަ އެވެ. މިހާތަނަށް ނޭޝަންސް ލީގުގައި ކުޅެފައިވާ ދެ މެޗުން ވެސް މޮޅުވެ، ސްޕެއިން އެއް ވަނައިގައި އޮތީ ހަ ޕޮއިންޓާ އެކު އެވެ.