ހުރްމުޒް އަލުން ހުޅުވުމާ ގުޅޭގޮތުން ގަތަރު މެދުވެރިކޮށް އީރާނުން އެމެރިކާއަށް އާ ޚިޔާލުތަކެއް ހުށަހަޅަނީ
29 ސެޕްޓެމްބަރު 2026 | އަންގާރަ 02:00ހުރްމުޒް ކަނޑުއޮޅި ހުޅުވުމަށް އީރާނުން ހުށަހަޅާފައިވާ ޝަރުތުތަކާ ގުޅޭގޮތުން ގަތަރު މެދުވެރިކޮށް އެމެރިކާއާއެކު އާ މަޝްވަރާތަކެއް ފަށައިފި. މި މަޝްވަރާތަކާ ގުޅޭގޮތުން އެމެރިކާއިން ދޭނެ ފަހުގެ ޖަވާބަކަށް އިންތިޒާރު ކުރަމުންދާ ކަމަށް އީރާނުގެ ޚާރިޖީ ވަޒީރު އައްބާސް އިރާގިޗީ ވިދާޅުވި. އީރާނުގެ މަގްސަދަކީ އެ ގައުމުގެ ޝަރުތުތައް ބައިނަލްއަގުވާމީ މުޖުތަމައަށް ސާފުކޮށްދިން
އީރާނުގެ ޚާރިޖީ ވަޒީރު އައްބާސް އިރާގިޗީ ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަނީ | އަނަދޮލު އޭޖެންސީ
ހުރްމުޒް ކަނޑުއޮޅި އަލުން ހުޅުވުމަށް އީރާނުން ކަނޑައަޅާފައިވާ ޝަރުތުތައް ފުރިހަމަކުރެވިދާނެ ގޮތްތަކާ ގުޅޭގޮތުން ތެހެރާނާ އެކު މަޝްވަރާކުރެވުނު އާ ޚިޔާލުތަކެއް ގަތަރުގެ މެދުވެރިން އެމެރިކާއަށް ހުށަހަޅާނެ ކަމަށް، އީރާނުގެ ޚާރިޖީ ވަޒީރު އައްބާސް އިރާގިޗީ ހޯމަ ދުވަހުގެ ރޭ ވިދާޅުވެއްޖެ އެވެ. އަދި، ވޮޝިންގޓަންގެ ފަހުގެ ޖަވާބު އަންގާރަ ދުވަހު ލިބުމަކީ އެކަށީގެންވާ ކަމެއް ކަމަށް ވެސް އޭނާ ވިދާޅުވި އެވެ.
ތެހެރާނުގެ ޝަރުތުތައް ތަންފީޒުކުރުމަށް މަގުފަހިކުރެވިދާނެ ގޮތްތަކާ ގުޅޭ ގޮތުން ގަތަރުގެ މެދުވެރިންނާ އަލުން ބައްދަލުކުރައްވައި މަޝްވަރާކުރައްވާފައިވާ ކަމަށް، ނިއު ޔޯކުގައި އީރާނުގެ ނޫސްވެރިންނާ ވާހަކަފުޅު ދައްކަވަމުން އިރާގިޗީ ވިދާޅުވި އެވެ.
"އެ ބޭފުޅުންގެ ޚިޔާލުތަކެއް ހުރި. އަދި، އީރާނުގެ ޝަރުތުތައް ފުރިހަމަކުރެވިދާނެ މަގެއް ހޯދުމަށާއި، އެ ޝަރުތުތައް ހާސިލުކުރެވޭނެ ގޮތްތަކާ މެދު އަޅުގަނޑުމެން މަޝްވަރާކުރިން،" އީރާނުގެ ދައުލަތުގެ ނޫސް އޭޖެންސީ، އައިއާރްއެންއޭއަށް އޭނާ ވިދާޅުވި އެވެ.
މި ޚިޔާލުތައް ދެން އެމެރިކާއަށް ހުށަހެޅޭނެ ކަމަށާއި، އޭގެ ފަހުން ވޮޝިންގޓަންގެ ފަހުގެ ޖަވާބު ތެހެރާނަށް ރައްދުކުރެވޭނެ ކަމަށް އުންމީދުކުރައްވާ ކަމަށް އިރާގިޗީ ބަޔާންކުރެއްވި އެވެ. "އަޅުގަނޑު އުއްމީދުކުރަނީ މާދަމާގެ [އަންގާރަ ދުވަހުގެ] ނިޔަލަށް މިކަން ވާނެ ކަމަށް،" އޭނާ ވިދާޅުވި އެވެ.
ކުރިއަށް އޮތް މަދު ގަޑިއިރުތަކެއްގެ ތެރޭގައި ނިއު ޔޯކުން ފުރާވަޑައިގަންނަވައި ތެހެރާނަށް ދަތުރުކުރައްވާނެ ކަމަށާއި، އެމެރިކާގެ ޖަވާބު ލިބުމުން ގަތަރުގެ މެދުވެރިން އެ ޖަވާބު ފޯރުކޮށްދޭނެ ކަމަށް އިރާގިޗީ ވިދާޅުވި އެވެ. އަދި، ގަތަރާއި ޕާކިސްތާނުގެ މެދުވެރިންގެ އެހީތެރިކަމާއެކު ކުރިއަށްދާ މަޝްވަރާތައް އަބަދުވެސް ހުޅުވިފައި އޮތް ނަމަވެސް، އީރާނުގެ އެންމެ ފަހުގެ ހުށަހެޅުމާ ގުޅިގެން އެ ވާހަކަތައް އިތުރަށް ސީރިއަސްވެފައިވާ ކަން ވެސް އޭނާ ފާހަގަކުރެއްވި އެވެ.
ހުރްމުޒް ކަނޑުއޮޅި އަލުން ހުޅުވުމަށް ޓަކައި ފުރިހަމަވާންޖެހޭ ކަމަށް އީރާނުން ބުނާ ޝަރުތުތައް، ވޮޝިންގޓަނަށާއި ބައިނަލްއަގުވާމީ މުޖުތަމައަށް އަންގައިދިނުމަށް ނިއު ޔޯކުގައި ބޭއްވި ބައްދަލުވުންތަކުގެ ބޭނުން ތެހެރާނުން އެންމެ ފުރިހަމަ ގޮތުގައި ހިފާފައިވާ ކަމަށް ވެސް އިރާގިޗީ ވިދާޅުވި އެވެ.
މަސްދަރު: އަނަދޮލު އޭޖެންސީ
