އީގަލް ހިލްސްގެ ޗެއަރމަން މަޝްހޫރު މަހުޖަނު މުހައްމަދު އަލައްބާރު އާއި އިސްރާއީލާ އޮންނަ ގާތް ގުޅުމާ ބެހޭގޮތުން ދެކެވޭ ވާހަކަތުގެ ހަގީގަތް

އީގަލް ހިލްސް (Eagle Hills) ގެ ޗެއަރމަން އަދި އިމާރާތްކުރުމުގެ ދާއިރާގެ މަޝްހޫރު މަހުޖަނު މުހައްމަދު އަލައްބާރު (Mohamed Alabbar) އާއި ޒަޔަނިސްޓުން ނުވަތަ އިސްރާއީލާ އޮންނަ ގުޅުމާ ބެހޭގޮތުން ބައިނަލްއަގުވާމީ އަދި ރާއްޖޭގެ މީޑިއާތަކާއި ސޯޝަލް މީޑިއާގައި ބޮޑެތި ބަހުސްތަކެއް ވަނީ އުފެދިފަ އެވެ.

މި ބަހުސްތައް އިތުރަށް ގަދަވެގެންދިޔައީ ސެޕްޓެމްބަރު 2026 ގައި ރާއްޖޭގެ ރަސްމާލެ މަޝްރޫއު ރައީސް ޑރ. މުއިއްޒުގެ ސަރުކާރު ހެދި ސިއްރު ޑީލެއްގެ ދަށުން އީގަލް ހިލްސްއާ ހަވާލުކުރުމާ ގުޅިގެންނެވެ.

އޭނާގެ މައްޗަށް ކުރެވޭ ތުހުމަތުތަކާއި ފާހަގަކުރެވޭ މައިގަނޑު ކަންތައްތަކަކީ:

1. އިސްރާއީލުގެ ޗެރިޓީތަކަށް އެހީތެރިވުން

އިސްރާއީލުގެ އިގްތިސާދީ ނޫހެއް ކަމަށްވާ ކަލްކަލިސްޓް (Calcalist) އިން ހާމަކޮށްފައިވާ ގޮތުގައި، އިސްރާއީލުގައި ހާލުގައި ޖެހިފައިވާ ޔަހޫދީ އާއިލާތަކަށް ކާބޯތަކެތި ފޯރުކޮށްދިނުމަށް ހިންގާ "ނޭޝަނަލް ފުޑް ސެކިއުރިޓީ އިނިޝިއޭޓިވް" އަށް ފާއިތުވި 18 އަހަރު ތެރޭގައި ސިއްރިއްޔާތުގައި ބޮޑެތި ހޭދަތަކެއް ކުރި ފަސް މަހުޖަނުންގެ ތެރޭގައި މުހައްމަދު އަލައްބާރު ހިމެނެ އެވެ.

މި ފަންޑަށް އޭނާ ގާތްގަނޑަކަށް 200 މިލިއަން ޑޮލަރު (550 މިލިއަން ޝެކެލް) ހަދިޔާކޮށްފައިވާ ކަމަށް ރިޕޯޓުތައް ބުނެ އެވެ.

2. އިސްރާއީލުގެ މުއައްސަސާތަކާ ގުޅުން ބޭއްވުން

އަބްރަހަމް އެކޯޑްސް (އެކުވެރި އަރަބި އިމާރާތާއި އިސްރާއީލާ ދެމެދު ގާއިމުކުރި ސުލްހައިގެ އެއްބަސްވުން) އަށްފަހު، އިސްރާއީލުގެ އެންމެ ބޮޑު އެއް ހޮސްޕިޓަލް ކަމަށްވާ ޝީބާ މެޑިކަލް ސެންޓަރު (Sheba Medical Center) ގެ ފަންޑްރެއިޒިންގ ގާލާއެއްގައި އޭނާ ބައިވެރިވެފައިވެ އެވެ. އަދި ޔޫއޭއީ އާއި އިސްރާއީލުގެ ސިއްހީ މުއައްސަސާތައް ގުޅުވައިދިނުމުގައި އޭނާ އިސް ދައުރެއް އަދާކުރި އެވެ.

3. އިސްރާއީލާއި އަރަބިންގެ ގުޅުންތަކަށް ތާއީދުކުރުން

2020 ވަނަ އަހަރު ބޭއްވި ކޮންފަރެންސެއްގައި ވާހަކަދައްކަމުން އަލައްބާރު ވަނީ އަރަބިންނާއި އިސްރާއީލުގެ އާއިލާތަކާއި އެ އާއިލާތަކުގެ ދަރިން އެއްބަޔަކު އަނެއްބަޔަކާ ބައްދަލުކޮށް، އިޖުތިމާއީ ގުޅުންތައް ބަދަހިކުރަންޖެހޭ ކަމަށް ބުނެފަ އެވެ.

"އަހަރެމެންގެ ދަރިން އިސްރާއީލުގެ ރަހުމަތްތެރިންގެ ދަރިންނާ ބައްދަލުވެ، އެއްބައިވަންތަކަން އުފައްދަން އަހަރެން ބޭނުންވޭ،" އޭނާ ބުނެފައިވެ އެވެ. މި ވާހަކަތަކާ ގުޅިގެން ފަލަސްތީނުގެ ހައްގުގައި މަސައްކަތްކުރާ އެކްޓިވިސްޓުންގެ ބޮޑެތި ފާޑުކިޔުންތަކެއް އޭނާއަށް އަމާޒުވި އެވެ.

4. ޣައްޒާގެ މައްސަލައިގައި ދެކޭގޮތް

އިސްރާއީލުގެ ލާއިންސާނީ ހަމަލާތަކުގައި ޣައްޒާ  ފަނާވަމުން ދިއުމާއި، އެތަން އަލުން އާރާސްތުކުރުމާ ބެހޭގޮތުން ސީއެންއެން (CNN) އިން ކުރި ސުވާލަކަށް ޖަވާބުދެމުން އޭނާ ބުނެފައިވަނީ "ކޮންމެ ބަޔަކުވެސް އެބައެއްގެ އަމިއްލަ މައްސަލަ ހައްލުކުރަންޖެހޭނެ" ކަމަށާއި، "އެއްޗެއް ހަލާކުކޮށްލި ބަޔަކު އަމިއްލައަށް އެ އެއްޗެއް މަރާމާތުކުރަންޖެހޭނެ" ކަމަށެވެ. އަދި އޭނާގެ އަމިއްލަ ވިޔަފާރިތަކުގައި "ބިޒީ" ކަމުން ޣައްޒާ ބިނާކުރުމުގެ ވިސްނުމެއް ނެތް ކަމަށް ބުނުމުން، އިސްރާއީލަށް އެހީތެރިވެ ފަލަސްތީނަށް އިހުމާލުވާކަމުގެ ތުހުމަތު ގިނަބަޔަކު އޭނާގެ މައްޗަށް ކުރެ އެވެ.

5. ފަލަސްތީނުގެ ބިންތަކުގައި ވިޔަފާރިކުރަން އުޅުން

2005 ވަނަ އަހަރު އިސްރާއީލުން ޣައްޒާއިން ފޭބުމަށް ނިންމި ދުވަސްވަރު، ޔަހޫދީ އާބާދީތައް ހުރި ބިންތަކާއި އިމާރާތްތައް އިސްރާއީލު ސަރުކާރު އަތުން ގަނެ، އެތަންތަން ތަޅާނުލައި ބަހައްޓައިގެން ފަލަސްތީނުގެ ރައްޔިތުންނަށް ބޯހިޔާވަހިކަން ފޯރުކޮށްދިނުމުގެ މަޝްރޫއެއް ކުރިއަށްގެންދިއުމަށް އޭރުގެ އިސްރާއީލުގެ ބޮޑުވަޒީރު އާރިއެލް ޝެެރޯންއާ އެކު އޭނާ މަޝްވަރާތަކެއް ކުރި އެވެ. ނަމަވެސް ފަހުން އޭނާ ވަނީ ބިންތައް ގަންނަން ހުށަހެޅި ކަމަށް ދެކެވުނު ވާހަކަތައް ދޮގުކޮށްފަ އެވެ.