އެމެރިކާގެ އިރުއުތުރަށް ބާރުގަދަ ތޫފާނެއް އަރައި ބޮޑެތި ގެއްލުންތަކެއް!

ވިދިވިދިގެން ދެވަނަ ދުވަހަށް އެމެރިކާގެ އިރުއުތުރުގެ އައްސޭރިފަށުގެ ސަރަހައްދުތަކަށް ބާރުގަދަ ތޫފާނެއް އަރައި، ބިންތިރި ހިސާބުތަކުގައި ފެންބޮޑުވެ، އެތައް ހާސް ގެއަކުން ކަރަންޓުގެ ޚިދުމަތް ކެނޑިއްޖެ އެވެ.

އާދީއްތަ ދުވަހު ނިއު ޖާޒީގެ ބިން ތިރި އަވަށްތަކަށް ބިޔަ ރާޅުތައް އަރައި ފެންބޮޑުވެފައިވާއިރު، ނިއު ޔޯކުގެ ލޯންގް އައިލެންޑަށް ޖެހުނު ބާރު ވަޔާއެކު ގަސްތައް ވެއްޓި، ގެތަކަށް ގެއްލުންވެ، ކަރަންޓު ވިގުގައިގައި ބޭނުންކުރާ ހޮޅިދަނޑިތައް ވެސް ވަނީ ވެއްޓިފަ އެވެ. އަދި، ނިއު ޔޯކް ސިޓީގެ ކުއީންސްގައި ހިމެނޭ ހާވަޑް ބީޗް އަވަށުގެ މަގުތަކުގައި ވެސް ވަނީ ފެންބޮޑުވެފަ އެވެ.

Advertisement

ލަސް ދުވެއްޔެއްގައި ދަތުރުކުރަމުންދާ މި ތޫފާނުގައި ހޮނިހިރު ދުވަހު ވެއްޓުނު ގަހެއްގެ ދަށުވެ، ނިއު ޔޯކް ސިޓީ ހައުސިންގ އޮތޯރިޓީގެ މުވައްޒަފަކު ވަނީ މަރުވެފަ އެވެ. ބޯކޮށް ވާރޭވެހުމާއި، ގަދަވަޔާއެކު އުފެދޭ ނުރައްކާތެރި ބިޔަ ރާޅުތަކުގެ އަސަރު ނިއު އިންގްލެންޑާ ހަމައަށް ފޯރާނެ ކަމަށާއި، މި ތޫފާނުގެ އަސަރު އާދީއްތަ ދުވަހު ވެސް ދެމިގެންދާނެ ކަމަށް ވަނީ ލަފާކުރެވިފަ އެވެ. ހުކުރު ދުވަހުން ފެށިގެން ނިއު ޖާޒީގެ ބައެއް ސަރަހައްދުތަކަށް 100 މިލިމީޓަރަށްވުރެ ގިނައިން ވާރޭވެހިފައިވާއިރު، ބޯކޮށް ވާރޭވެހުމާއެކު ކަނޑުގެ ލޮނުގަނޑު އުފުލުމުގެ ސަބަބުން، އާންމުކޮށް ފެންބޮޑުވާ ސަރަހައްދުތަކުގައި ވެސް ފާއިތުވި ދިހަވަރަކަށް އަހަރުގެ ތެރޭގައި ނުފެންނަ މިންވަރަށް ފެންބޮޑުވެފައިވާ ކަމަށް އެ ސަރަހައްދުގައި ދިރިއުޅޭ ރައްޔިތުން ވަނީ ބުނެފަ އެވެ.

'ނޮރްއީސްޓާ' ނުވަތަ އުތުރު އެމެރިކާ ބައްރުގެ އިރުއުތުރުގައި އުފެދޭ ބާވަތު މި ތޫފާނުގެ ސަބަބުން، 2012 ވަނަ އަހަރު އެމެރިކާގެ އިރުމަތީ ސަރަހައްދުތަކަށް 60 ބިލިއަން ޔޫއެސް ޑޮލަރަށް ވުރެ ބޮޑު ގެއްލުމެއް ދިން ތޫފާން ސެންޑީގެ ހަނދާންތައް އާވެގެން ގޮސްފައިވާ ކަމަށް މަސްރަހު ދިރާސާކުރާ ފަރާތްތަކުން ބުނެ އެވެ. މި ތޫފާނުގެ އަސަރު އެ މިންވަރާ ގާތްނުވި ނަމަވެސް، މި އަހަރުގެ މޫސުމަށް ބުރޫއަރަމުންދާ އެލް ނީނިއޯ މޫސުމީ ނިޒާމުގެ ސަބަބުން، މިއީ މި އަހަރުގެ ފަހުކޮޅު އިރުމަތީ އައްސޭރިފަށަށް އަރާނެ މި ފަދަ ގިނަ ތޫފާންތަކުގެ ތެރެއިން ފުރަތަމަ ތޫފާނަށް ވުން އެކަށީގެންވާ ކަމަށް މާހިރުން ބުނެ އެވެ. ބިޔަ ރާޅުތައް ތޮށިގަނޑުތަކަށާއި ގޮނޑުދޮށްތަކަށް ބީއްސަމުންދާ މަންޒަރުތައް ފެންނަ ފޮޓޯތަކާ ގުޅިގެން، ގޮނޑުދޮށްތައް ގިރުމުގެ ކަންބޮޑުވުން ވަނީ އުފެދިފަ އެވެ.

އާދީއްތަ ދުވަހުގެ އެކި ވަގުތުތަކުގައި އިރުއުތުރާއި މިޑް-އެޓްލާންޓިކް ސަރަހައްދުގެ 100،000 އަށް ވުރެ ގިނަ ކަސްޓަމަރުންގެ ކަރަންޓުގެ ޚިދުމަތް ކެނޑިފައިވާ ކަމަށް، 'ޕަވަރއައުޓޭޖް.ޔޫއެސް' އިން ވަނީ ރިޕޯޓްކޮށްފަ އެވެ. އަދި، އެންމެ ބޮޑަށް ކަރަންޓު ކެނޑިފައި ވަނީ ނިއު ޖާޒީން ފެށިގެން ކަނެޓިކަޓާ ދެމެދު އައްސޭރިފަށުގައިވާ ކައުންޓީތަކުގަ އެވެ. މިއާއެކު، އައްސޭރިފަށުގެ ސަރަހައްދުތަކުގައި ގިނަ އަދަދެއްގެ ފްލައިޓްތައް ވަނީ ކެންސަލްކޮށް، ނުވަތަ ފުރުން ލަސްވެފަ އެވެ. ވައިގެ ބާރުމިން ގަޑިއަކު 64 ކިލޯމީޓަރަށް އަރާފައިވާއިރު، އާދީއްތަ ދުވަހުގެ ހެނދުނުގެ ނިޔަލަށް ބޮސްޓަން ލޯގަން އިންޓަރނޭޝަނަލް އެއާޕޯޓުން 250 އަށް ވުރެ ގިނަ ފްލައިޓް ކެންސަލްކޮށްފައިވާ ކަމަށް، މެސެޗުސެޓްސް ޕޯޓް އޮތޯރިޓީން ވަނީ ހާމަކޮށްފަ އެވެ.

އިތުރަށް ވެހޭނެ ކަމަށް ބެލެވޭވިއުރު، އެންމެ ބޯކޮށް ވާރޭވެހޭނެ ކަމަށް ލަފާކުރެވެނީ ނިއު ޖާޒީގެ އުތުރުން ފެށިގެން ދެކުނު ނިއު އިންގްލެންޑާ ދެމެދުގެ ސަރަހައްދުތަކަށް ކަމަށް މޫސުން ދިރާސާކުރާ މާހިރުން ވިދާޅުވި އެވެ. ތޫފާނުގެ ބާރު ކެނޑެމުންދިޔަ ނަމަވެސް، އާދީއްތަ ދުވަހުގެ ރޭގެ ދިޔަވަރު ބޮޑުވާ ވަގުތުތަކުގައި އުދައެރުމުގެ ސަބަބުން ފެންބޮޑުވުން ދެމިއޮންނާނެ ކަމަށް، މެރިލެންޑްގެ މޫސުމާބެހޭ ގައުމީ އިދާރާގެ އިސް އޮފިޝަލެއް ކަމުގައިވާ ބޮބް އޮރަވެކް ވިދާޅުވި އެވެ.