ތައިލެންޑުގައި ފެންބޮޑުވެ 8 މީހުން މަރު، ބެންގކޮކަށް ބޮޑެތި ގެއްލުންތަކެއް

ތައިލެންޑަށް މި މަހުގެ 16 ވަނަ ދުވަހުން ފެށިގެން ކުރަމުންދާ ވިއްސާރައިގައި ފެންބޮޑުވެ، މިހާތަނަށް އަށް މީހަކު މަރުވެފައިވާ ކަމަށް އެ ގައުމުގެ ސަރުކާރުން ހޯމަ ދުވަހު ހާމަކޮށްފި އެވެ . ބޯކޮށް ވާރޭވެހުމުގެ ސަބަބުން ހުސްވި ހަފުތާ ބަންދުގައި ކާރިސާގެ ހާލަތު އިއުލާނުކުރި ވެރިރަށް ބެންގކޮކުން އެއްވެސް މީހަކު މަރުވި ކަމަކަށް ރިޕޯޓްކޮށްފައެއް ނުވެ އެވެ.

މަރުވި އަށް މީހުންނަކީ ވެސް އެ ގައުމުގެ އިރުމަތީ ޕްރޮވިންސްތަކަށް ނިސްބަތްވާ މީހުން ކަމަށް، ޑިޕާޓްމަންޓް އޮފް ޑިޒާސްޓާ ޕްރިވެންޝަން އެންޑް މިޓިގޭޝަނުން (ޑީޑީޕީއެމް) މައުލޫމާތު ދެ އެވެ. މި ގޮތުން ސާ ކައިއޯއިން ފަސް މީހަކު، ޗަންތަބުރީން ދެ މީހަކު އަދި ސަރަބުރީން އެކަކު ވަނީ މަރުވެފަ އެވެ. ނަމަވެސް، މި ހާދިސާތަކާ ގުޅޭ އިތުރު ތަފުސީލެއް އެ އިދާރާއިން ހާމަކޮށްފައެއް ނުވެ އެވެ.

Advertisement

ވެރިރަށް ބެންގކޮކް ނުހިމަނައި، ދެކުނު އިރުމަތީ އޭޝިއާގެ މި ގައުމުގެ 27 ޕްރޮވިންސަކުން 500،000 އަށް ވުރެ ގިނަ ގޭބިސީއަށާއި 1.7 މިލިއަން މީހުންނަށް ފެންބޮޑުވުމުގެ އަސަރު ކޮށްފައިވާ ކަމަށް ޑީޑީޕީއެމުން ބުނެ އެވެ. އަދި، ވެރިރަށުން ވެސް އިތުރު 52،000 ގޭބިސީއަކަށް ވަނީ މި ކަމުގެ އަސަރު ފޯރާފަ އެވެ. ބެންގކޮކްގައި ގާތްގަނޑަކަށް 48 ގަޑިއިރު ވަންދެން ބޯކޮށް ވާރޭވެހި، ކޯރުތަކާއި ކެނަލްތައް ފުރި މަގުތަކުގައި ފެންބޮޑުވުމާ ގުޅިގެން، މުޅި ސިޓީގައި ކާރިސާގެ ހާލަތު އިއުލާނުކުރީ ހޮނިހިރު ދުވަހު އެވެ.

ބެންކޮކުން އެއްވެސް މީހަކު މަރުވި ކަން ރަސްމީ ސިފައެއްގައި ރިޕޯޓްކޮށްފައި ނުވާއިރު، އެ ސިޓީގެ ފެންގަނޑު މިހާރު އެއްވަރެއްގައި ހިފެހެއްޓިފައިވާ ކަމަށް ޑީޑީޕީއެމުން ފާހަގަކުރި އެވެ. ނަމަވެސް، އިރުމަތީގެ މަދުވެގެން އެއް އަވަށަކަށް ބޯކޮށް ވާރޭވެހި ފެންބޮޑުވެފައިވާ މަންޒަރާއި، ކަކުލާ ހަމައަށް ފެންބޮޑުވެފައިވާ މަގުތަކުގައި އާންމުން ހިނގާފައިދާ މަންޒަރު އޭއެފްޕީގެ ނޫސްވެރިންނަށް ވަނީ ފެނިފަ އެވެ.

ފެންބޮޑުވުމާ ގުޅިގެން ސްކޫލްތައް ބަންދުކޮށް، ގޭގައި ތިބެގެން މަސައްކަތް ކުރުމަށް އާންމުންނަށް ވަނީ އިލްތިމާސްކޮށްފަ އެވެ. ގިނަ ބަޔަކު އެ އިލްތިމާސަށް އިޖާބަދީފައިވާއިރު، ހޯމަ ދުވަހުގެ ހެނދުނު މަގުތަކާއި އާންމު ދަތުރުފަތުރުގެ ނިޒާމު އޮތީ ފާހަގަކުރެވޭ މިންވަރަށް ހަމަހިމޭންވެފަ އެވެ.

"ބެންގކޮކްގެ ބައެއް ސަރަހައްދުތަކުގައި އަދިވެސް ފެންގަނޑު އޮތީ އުފުލިފައި،" ނޫސްވެރިންގެ ބައްދަލުވުމެއްގައި ސަރުކާރުގެ ތަރުޖަމާނު އެއްކަޕޯޕް ޕިއަންޕީސެ ވިދާޅުވި އެވެ. ނަމަވެސް، ފެން ހިންދާ ނިޒާމުތަކުގެ ސަބަބުން، އިތުރު މީހުންނަށް ދަތުރުފަތުރު ކުރެވޭ މިންވަރަށް ފެންގަނޑު ތިރިކުރެވިފައިވާ ކަމަށް ވެސް ތަރުޖަމާނު ވިދާޅުވި އެވެ.

ތައިލެންޑަކީ އާންމުކޮށް ވެސް ވިއްސާރަ މޫސުމަށް ހޭނިފައިވާ ގައުމަކަށް ވެފައި، ސެޕްޓެންބަރު މަހަކީ ވިއްސާރަ މޫސުމުގެ އެންމެ ގަދަ ދުވަސްވަރު ކަމުގައި ވިޔަސް، މީގެ ކުރީގެ އަހަރުތަކާ އަޅާބަލާއިރު މި އަހަރުގެ ހާލަތު މާ ބޮޑަށް ގޯސް ކަމަށް ގިނަ ރައްޔިތުން ބުނެ އެވެ.