އައްޑޫ އެކުއެޓޯރިއަލް ހޮސްޕިޓަލަށް ފެން ފައިބައި، ބާލިދީ ބަހައްޓާފައި ހުރި ވީޑިއޯތަކެއް އާންމުވެއްޖެ
14 ސެޕްޓެމްބަރު 2026 | ހޯމަ 13:32ރާއްޖެއަށް ކުރަމުންދާ ވިއްސާރައިގައި އައްޑޫ އެކުއެޓޯރިއަލް ހޮސްޕިޓަލަށް ފެން ފައިބާތީ އާންމުން ކަންބޮޑުވުން ފާޅުކުރަމުންދާއިރު، މިކަމާ ގުޅޭގޮތުން ހޮސްޕިޓަލުގެ ބަހެއް ލިބޭގޮތް ވަނީ ނުވެފައި. ސިއްހީ ދާއިރާއަށް ބޮޑު ބަޖެޓެއް ކަނޑައަޅާފައިވާ ދަނޑިވަޅެއްގައި ހޮސްޕިޓަލުގެ ހާލަތު މިހާ ބޮޑަށް ގޯސްވުމުން ގިނަ ބައެއްގެ ފާޑުކިޔުން ސަރުކާރަށް ވަނީ އަމާޒުވެފައި
އައްޑޫ އިކުއެޓޯރިއަލް ހޮސްޕިޓަލަށް ފެން ފައިބާތީ ބާލިދީ ބަހައްޓާފައި ހުރި ވީޑިއޯތަކެއް އާންމުވެއްޖެ | ރާއްޖެ އެމްވީ
އައްޑޫ އެކުއެޓޯރިއަލް ހޮސްޕިޓަލުގެ ހާލަތު ގޯސްވެ، މުޅި ހޮސްޕިޓަލަށް ފެން ފައިބައި ވީޑިއޯއެއް އާންމުވެއްޖެ އެވެ.
އައްޑޫ އެކުއެޓޯރިއަލް ހޮސްޕިޓަލަށް ފެން ފައިބާތީ ބާލިދީ ބަހައްޓައި ތުވާލި އަޅާފައި ހުރި ވީޑިއޯތަކެއް ވަނީ ރާއްޖެއެމްވީއަށް ލިބިފަ އެވެ. އެގޮތުން، އެ ވީޑިއޯތަކުން ފެން ފައިބާ މަންޒަރާއި ފެން ހިއްކުމަށްޓަަކައި ބާލިދީ ބަހައްޓާފައި ހުރި މަންޒަރު ފެނެ އެވެ.
މިކަމާއި ގުޅޭ މައުލޫމާތު ހޯދަން ރާއްޖެޓީވީގެ "ފަށާއިރު" ޕްރޮގްރާމްގެ ތެރެއިން އައްޑޫ އެކުއެޓޯރިއަލް ހޮސްޕިޓަލަށް ގުޅުމުން ބުނެފައިވަނީ އެ މައުލޫމާތު ލިބޭނީ މީޑިއާގެ ފަރާތުން ކަމަށެވެ. ނަމަވެސް މީޑިއާ ސްޓާފް ޗުއްޓީގައި ހުރުމުން މިވަގުތު ހަވާލުވެ ހުންނެވި ބޭފުޅާގެ ނަންބަރު އައްޑޫ އެކުއެޓޯރިއަލް ހޮސްޕިޓަލް ކޯލް ސެންޓަރަށް ނޭނގޭ ކަމަށާއި ޔަގީންކޮށްފައި ގުޅާނެ ކަމަށް ބުންޏެވެ.
މިއަހަރުގެ ބަޖެޓު 'ސިއްހީ ދާއިރާގެ ބަޖެޓު' ގެ ނަމުން ނަން ދީފައިވާއިރު، މި ހާލަތަށް ރާއްޖެގައި ދެވަނައަށް އެންމެ އާބާދީ ބޮޑު ސިޓީގެ މައި ހޮސްޕިޓަލު ދިޔުމުން، ގިނަ ބަޔަކު އަންނަނީ ސުވާލު އުފައްދަމުންނެވެ. އަދި ސަރުކާރުން މިކަން ހައްލުކުރުމަށް މަސައްކަތް ކުރަމުން ނުދާތީ ގިނަ އަދަދެއްގެ ރައްޔިތުން އަންނަނީ ކަންބޮޑުވުން ފާޅުކުރަމުންނެވެ.
