ފުރަތަމަ ހާފުގައި ފަސް ލަނޑުންް ފަހަތުގައި އޮތުމަކީ ފަސޭހަ ކަމެއް ނޫން، ދެވަނަ ހާފުގައި ކުޅުން ރަނގަޅު ކުރި: އުރުބާނީ

ފުރަތަމަ ހާފުގައި ފަސް ލަނޑުން ބަލިވެފައި އޮތުމަކީ އެއްވެސް ކޯޗަކަށް ފަސޭހަ ވާނެ ކަމެއް ނޫން ކަމަށާއި، ކިރްގިސްތާންއާ ދެކޮޅަށް ކުޅުނު މެޗުގެ ދެވަނަ ހާފުގައި ރާއްޖެ އިން ކުޅުން ރަނގަޅު ކުރި ކަމަށް، ރާއްޖޭގެ ކޯޗު އިސްތަވާން އުރްބާނީ ބުނެފި އެވެ.

އުރުބާނީ މިހެން ބުނީ، ބައިނަލްއަޤުވާމީ ރަހުމަތްތެރިކަމުގެ މެޗެއްގައި ހޯމަ ދުވަހުގެރޭ ރާއްޖެ އިން ކިރްގިސްތާންއާ ދެކޮޅަށް ކުޅުނު މެޗަށް ފަހު ނޫސްވެރިންނާ ވާހަކަ ދައްކަމުންނެވެ. އެ މެޗުގައި ކިރްގިސްތާން އިން 5-0 އިން ރާއްޖެ ބަލިކުރިއިރު، އެ ޓީމުން ފަސް ލަނޑު ވެސް ޖެހީ ފުރަތަމަ ހާފުގަ އެވެ.

Raajje.mv

ފުރަތަމަ ހާފުގައި ޖެހި ފަސް ލަނޑާއެކު، ބޮޑު ތަފާތަކުން ކިރްގިސްތާން އިން ރާއްޖެ ބަލިކޮށްފި

އުރުބާނީ ބުނީ، ފުރަތަމަ ހާފުގައި ފަސް ލަނޑުން ބަލިވެފައި އޮތުމަކީ އެއްވެސް ކޯޗަކަށް ފަސޭހަ ކަމަކަށް ނުވާނެ ކަމަށެވެ. އެހެން ނަމަވެސް، ޓީމަށް ގެނައި ބަދަލުތަކާ އެކު ދެވަނަ ހާފުގައި ރާއްޖެ އިން ކުޅުން ރަނގަޅު ކުރި ކަމަށް އުރުބާނީ ބުންޏެވެ. އެގޮތުން ދެވަނަ ހާާފުގައި ރާއްޖެ އިން ލަނޑެއް ޖެހުމާ ގާތަށް ވެސް ޖެހިލި ކަމަށް އުރުބާނީ ފާހަގަކުރި އެވެ.

މީގެ އިތުރުން އުރުބާނީ ބުނީ، ކިރްގިސްތާން އަކީ މިވަގުތު ވަރަށް ފެންވަރު ރަނގަޅު ޓީމެއް ކަމަށާއި، ރާއްޖެ އަށް ވުރެ އެ ޓީމުގެ ފެންވަރު ހުރިހާ ގޮތަކުން ވެސް ރަނގަޅު ކަމަށެވެ. ކިރްގިސްތާން އިން މިވަގުތު ތައްޔާރުވަމުން އަންނަނީ 2027 ވަނަ އަހަރުގެ ޖަނަވަރީ މަހު އޮންނަ އޭޝިއަން ކަޕަށް ތައްޔާރުވަމުން ކަމަށް ވެސް އުރުބާނީ ފާހަގަކޮށްފައިވެ އެވެ.

ރާއްޖޭގެ ކޯޗުކަމާ ތިން ވަނަ ފަހަރަށް އުރުބާނީ ހަވާލުވީ ފަހުން، ސީނިއާ ޓީމުން މިހާތަނަށް ވަނީ ހަ މެޗެއް ކުޅެފަ އެވެ. އޭގެ ތެރެއިން ރާއްޖެ މޮޅުވެފައި އެންމެ މެޗަކުންނެވެ. އެއް މެޗު އެއްވަރުވެފައިވާއިރު، އަނެއް ހަތަރު މެޗުން ވަނީ ބަލިވެފަ އެވެ. ދެން ރާއްޖެ އަށް އޮންނާނީ މި ހަފުތާގެ ބުރާސްފަތި ދުވަހު ލުބުނާންއާ ދެކޮޅަށް ކުޅޭ މެޗެވެ.