ފްރާންސް އިން މީގެ ކުރިން އެއްވެސް ކޯޗަކަށް ނުދޭ ވަރުގެ ވަރުގަދަ ސެކިއުރިޓީއެއް ޒިދާން އަށް ދެނީ

ފްރާންސް ޤައުމީ ފުޓުބޯޅަ ޓީމުގެ ކޯޗުގެ މަޤާމާ ހަވާލުވި ޒިނެދިން ޒިދާން އަށް، އެ ޤައުމުގެ ފުޓުބޯޅަ ފެޑެރޭޝަން އިން ކުރިން ދުވަހަކު ވެސް ކޯޗަކަށް ދީފައި ނުވާ ފަދަ ވަރުގަދަ ސެކިއުރިޓީއެއް ދޭން ނިންމައިފި އެވެ.

މި ނިންމުމަކީ 1998 ވަނަ އަހަރުގެ ފީފާ ވޯލްޑް ކަޕް ކާމިޔާބުކޮށްދިން ލެޖެންޑަރީ މިޑްފީލްޑަރު އެނބުރި ޤައުމީ ޓީމާ ހަވާލުވުމާ ގުޅިގެން، ސަޕޯޓަރުންގެ ފަރާތުން ކުރިމަތިވެދާނެ ފިއްތުންތަކުން އޭނާ ރައްކާތެރިކުރުމަށް އެޅި ފިޔަވަޅެކެވެ.

ފްރާންސްގެ ޤައުމީ ޓީމަށް އައި މި އައު ބަދަލާއެކު، 2026 ވަނަ އަހަރުގެ ވޯލްޑް ކަޕަށް ފަހު މަޤާމުން ވަކިވި ޑިޑިއޭ ޑެޝޯމްޕްސްގެ ބަދަލުގައި ޒިދާން ވަނީ މިދިޔަ ހުކުރު ދުވަހު އޭނާގެ ފުރަތަމަ ރަސްމީ ސްކޮޑު އިއުލާންކޮށްފަ އެވެ. ނަމަވެސް ދަނޑުމަތީގެ ކަންކަމަށް ވުރެ ބޮޑަށް މިވަގުތު ސަމާލުކަން ހުއްޓިފައިވަނީ، ޒިދާންގެ ރައްކާތެރިކަމަށްޓަކައި ފްރާންސްގެ ފުޓުބޯޅަ ފެޑެރޭޝަން އިން ގެންނަން ނިންމި ބޮޑެތި ބަދަލުތަކަށެވެ.

ފްރާންސްގެ މަޝްހޫރު ކުޅިވަރު ނޫސް "ލެކީޕް" އިން ރިޕޯޓުކޮށްފައިވާ ގޮތުގައި، ޒިދާން އަށް ދޭ ސެކިއުރިޓީ އަކީ މީގެ ކުރިން ފްރާންސްގެ އެއްވެސް ކޯޗަކަށް ދީފައިވާ ފެންވަރުގެ ސެކިއުރިޓީއެއް ނޫނެވެ. އޭނާގެ ރައްކާތެރިކަން ބެލެހެއްޓުމަށްޓަކައި ޚާއްސަ ބޮޑީގާޑެއްގެ އިތުރުން، ސެކިއުރިޓީ އެޖެންޓެއް ވެސް ވަނީ ހަމަޖައްސާފަ އެވެ. މި އެޖެންޓަކީ މިދިޔަ މަހު ޒިދާންގެ ބެކްރޫމް ސްޓާފުންގެ ގޮތުގައި ތައާރަފުކުރި ޓީމުގެ ތެރޭގައި ހިމެނޭ މީހެކެވެ.

މި ފެންވަރުގެ ސެކިއުރިޓީއެއް އާންމުކޮށް ފެންނަނީ ދުނިޔޭގެ ވަރަށް މަޝްހޫރު ކުޅުންތެރިންގެ ފަރާތުންނެވެ. ޒިދާން އަށް މިފަދަ ޚާއްސަ ސަމާލުކަމެއް ދޭން ޖެހުނީ، 1998 ވަނަ އަހަރު ފްރާންސް އަށް ފުރަތަމަ ފަހަރަށް ވޯލްޑް ކަޕް ހޯދައިދިނުމަށް ފަހު އޭނާ އަށް އޮންނަ ތާއީދާއި ލޯބި އިންތިހާ އަށް ބޮޑުވުމުންނެވެ. މީގެ ކުރިން ވެސް އާންމު ތަންތަނަށް ނުކުމެ އުޅުމުގައި ޒިދާން އަށް ވަނީ ގިނަ ގޮންޖެހުންތަކަކާ ކުރިމަތިލާން ޖެހިފަ އެވެ.

ފްރާންސްގެ ފުޓުބޯޅަ އިދާރާގެ އަމާޒަކީ ކުރިއަށް އޮތް ހަތަރު އަހަރުގެ ދައުރުގައި، އެއްވެސް ބޭރުގެ ނުފޫޒެއް ނުވަތަ ނުރައްކަލެއް ނެތި ޒިދާން އަށް އޭނާގެ މަސައްކަތް ކުރިއަށް ގެންދިއުމުގެ ފުރުސަތު ފަހިކޮށްދިނުމެވެ. މިފަދަ ވަރުގަދަ ފިޔަވަޅުތަކެއް އެޅި ނަމަވެސް، ޤައުމީ ޓީމުގެ ކޭމްޕްގެ ތެރޭގައި އެއްވެސް ނުތަނަވަސްކަމެއް ނެތް ކަމަށް ރިޕޯޓުތައް ބުނެ އެވެ. އެ އިދާރާ އިން ބޭނުންވަނީ މިއީ ބޭނުންތެރި ރައްކާތެރިކަމުގެ ފިޔަވަޅެއްގެ ގޮތުގައި ދެކިގެން ކުރިއަށް ދިއުމަށެވެ.