އިސްރާއީލްގެ އުދުވާނާއި "ވަޒަންވެރިންގެ ޓެރަރިޒަމް" އާ ދެކޮޅަށް ބްރިކްސްއިން ތެދުވަންޖެހޭ: އަންވަރު އިބްރާހީމް
14 ސެޕްޓެމްބަރު 2026 | ހޯމަ 04:19މެދުއިރުމަތީގެ ހަމަނުޖެހުންތަކުގެ ސަބަބުން ދުނިޔޭގެ އިގްތިސާދަށް ކުރާ ނޭދެވޭ އަސަރުތަކާ ދެކޮޅަށް ބްރިކްސްއިން ތެދުވަންޖެހޭ ކަމަށް މެލޭޝިޔާގެ ބޮޑުވަޒީރު އަންވަރު އިބްރާހީމް ވިދާޅުވެއްޖެ. ހުޅަނގުގެ ބާޒާރުތަކަށް ބަރޯސާވުން ކުޑަކޮށް، ތަރައްގީވަމުން އަންނަ ގައުމުތަކުގެ މާލީ ދަތިތަކަށް ހައްލު ހޯދުމަށް ބްރިކްސްގެ ގައުމުތަކުން ގުޅިގެން މަސައްކަތްކުރުމަށް އޭނާ ގޮވާލެއްވި.
ބްރިކްސް ސަމިޓުގައި މެލޭޝިޔާގެ ބޮޑުވަޒީރު އަންވަރު އިބްރާހީމް ވާހަކަފުޅު ދައްކަވަނީ | އެކްސް
އިސްރާއީލުން މެދުއިރުމަތީގައި ހިންގަމުންދާ އުދުވާންތަކުގެ ނުފޫޒު، ހަމަނުޖެހުންތަކުގައި ސީދާ ގޮތުން ބައިވެރިވާ ފަރާތްތަކަށްވުރެ މާ ބޮޑަށް ބޭރަށް ފެތުރިފައިވާތީ، އިސްތިއުމާރުކޮށް ބިންތައް ހިފުމާއި، ވަޒަންވެރިން އާބާދުކުރުމާއި، އަދި "ވަޒަންވެރިންގެ ޓެރަރިޒަމް" އާ ދެކޮޅަށް ބްރިކްސް އިއްތިހާދުން ތެދުވަންޖެހޭ ކަމަށް މެލޭޝިޔާގެ ބޮޑުވަޒީރު އަންވަރު އިބްރާހީމް ވިދާޅުވެއްޖެ އެވެ. އޭނާ މިހެން ވިދާޅުވީ އާދީއްތަ ދުވަހު އިންޑިއާގެ ނިއު ދެއްލީގައި ބޭއްވި އެ އިއްތިހާދުގެ އަހަރީ ސަމިޓުގައި ވާހަކަފުޅު ދައްކަވަމުންނެވެ.
އަންވަރު އިބްރާހީމް ވިދާޅުވީ، އިސްތިއުމާރުކޮށް ބިންތައް ހިފުމާއި، ވަޒަންވެރިން އާބާދުކުރުމާއި، އަދި ވަކިން ހާއްސަކޮށް "ވަޒަންވެރިންގެ ޓެރަރިޒަމް" އަކީ ނަސީބު ކަމުގައި ބަލައިގަނެވިގެން ނުވާނެ ކަމަށެވެ. މީގެ އިތުރުން، އެއްވެސް އިންސާނެއްގެ ފުރާނައަކީ އެ މީހަކު ދިރިއުޅޭ ތަނެއްގެ ސަބަބުން އަގުދަށް އެއްޗަކަށް ވެގެން ނުވާނެ ކަމަށް ބްރިކްސްއިން ސާފުކޮށް ބުނަންޖެހޭނެ ކަމަށް ވެސް އޭނާ ވިދާޅުވި އެވެ.
މެދުއިރުމަތީގައި ހިންގަމުންދާ އުދުވާންތަކުގެ ސަބަބުން ތަކެތީގެ އަގު އުފުލި، ނުތަނަވަސްކަން އިތުރުވެފައިވާ ކަމަށާއި، އޭގެ ނޭދެވޭ އަސަރު ހަމަނުޖެހުންތަކުގައި ސީދާ ބައިވެރިވާ ފަރާތްތަކަށްވުރެ ބޭރަށް ފޯރާފައިވާ ކަމަށް އަންވަރު ފާހަގަކުރެއްވި އެވެ. އަދި، ހަނގުރާމައިގެ ސަބަބުން ހަކަތައިގެ އަގުތައް އުފުލި، ގައުމުތަކުގެ އިގްތިސާދު ބިނާވެފައިވާ ކަނޑުގެ މަގުތަކަށް ނުރައްކާވަމުންދާ ދަނޑިވަޅެއްގައި، އެންމެން ހިމެނޭ ފަދަ ކުރިއެރުމަކާއި ތަނަވަސްކަމަކާ ބެހޭގޮތުން ވާހަކަ ނުދެއްކޭނެ ކަމަށް ވެސް އޭނާ ވިދާޅުވި އެވެ.
ފެބުރުވަރީ މަހުގެ 28 ވަނަ ދުވަހު އެމެރިކާއާއި އިސްރާއީލުން އީރާނާ ދެކޮޅަށް ހަނގުރާމައެއް ފެށުމާ ގުޅިގެން، އީރާނުން ވަނީ އިސްރާއީލަށާއި އެމެރިކާގެ އަސްކަރީ މަރުކަޒުތައް ހުރި ސަރަހައްދީ ގައުމުތަކަށް މިސައިލާއި ޑްރޯން ހަމަލާތަކެއް ދީފަ އެވެ. މީގެ އިތުރުން، އީރާނުން ހުރްމުޒް ކަނޑުއޮޅި ބަންދުކުރިކަން އިއުލާންކުރުމާ ގުޅިގެން، ދުނިޔޭގެ ހަކަތައިގެ ބާޒާރަށާއި ވިޔަފާރީގެ މުއާމަލާތްތަކަށް ވަނީ ބޮޑެތި ހުރަސްތަކެއް ކުރިމަތިވެފަ އެވެ.
މެލޭޝިޔާގެ ވެރިރަށް ކުއާލަލަމްޕޫރުގެ ސިޔާސަތަކީ ގައުމުތަކުގެ މިނިވަންކަމަށް އިހުތިރާމްކުރުމާއި، އާންމު ރައްޔިތުން ހިމާޔަތްކުރުމާއި، އަދި ދުނިޔޭގެ އިގްތިސާދީ މުހިންމު މަގުތައް ހަނގުރާމައިގެ މައިދާނުން ދުރުގައި ބެހެއްޓުން ކަމަށް އަންވަރު ތަފްސީލުކޮށްދެއްވި އެވެ. މިއާއެކު، ޓެކްނޮލޮޖީ ހަލުވިކަމާއެކު ކުރިއަރަމުންދިޔަ ނަމަވެސް، ތަރައްގީވަމުން އަންނަ ގިނަ ގައުމުތަކަށް އޭގެ އިގްތިސާދީ މަންފާ ނުލިބޭ ކަމަށާއި، ގިނަ ގައުމުތަކެއް ދަރަނީގެ ދަތިކަމާ ކުރިމަތިލާންޖެހިފައިވާ ނުވަތަ އެ ފަދަ ނުރައްކަލެއްގެ ތެރޭގައިވާ ކަމުގެ އިންޒާރު ވެސް އޭނާ ދެއްވި އެވެ.
ބްރިކްްސްގެ ގުޅުންތައް އިތުރަށް ފުޅާކުރެވޭނެ ދާއިރާތަކަށް އަލިއަޅުއްވާލެއްވި
'ރެސިލިއަންސް، އިނޮވޭޝަން، ކޯޕަރޭޝަން އެންޑް ސަސްޓެއިނަބިލިޓީ: ޝޭޕިންގ ދި ފިއުޗާ ފޯ އިންކްލޫސިވް ގްލޯބަލް ގްރޯތް' ގެ ނަމުގައި ބޭއްވި ސެޝަނެއްގައި ވާހަކަފުޅު ދައްކަވަމުން އަންވަރު ވިދާޅުވީ، ބްރިކްސްގެ ގައުމުތަކުގެ ބާޒާރުގެ ވަރުގަދަކަމުގެ ސަބަބުން ވިޔަފާރި ފުޅާކުރުމަށާއި ހުޅަނގުގެ ބާޒާރުތަކަށް ބަރޯސާވާ މިންވަރު ކުޑަކުރުމުގެ ފުރުސަތު ލިބިގެންދާ ކަމަށެވެ. އަދި، ބޭއިންސާފު ވިޔަފާރީގެ އުސޫލުތައް ނައްތާލުމަށް ބްރިކްސްއިން ގުޅިގެން އަމަލީ ފިޔަވަޅުތައް އަޅަންޖެހޭ ކަމަށާއި، ތަރައްގީގެ ތަޖުރިބާ ހިއްސާކޮށް، ސެމީކޮންޑަކްޓަރާއި އާޓިފިޝަލް އިންޓެލިޖެންސް (އޭއައި) ފަދަ އަލަށް އުފެދޭ ދާއިރާތަކުން ފަންނީ އެއްބާރުލުމާއި ތަމްރީނު ވަރުގަދަކުރަންޖެހޭ ކަމަށް ވެސް އޭނާ ވިދާޅުވި އެވެ.
ގައުމުތަކަށް ނުއުފުލޭ ފަދަ ދަރަނިތައް ކުރިމަތިނުވާނެ ގޮތަށް އަސާސީ ބޭނުންތައް ފުއްދުމަށް މާލީ އެހީތެރިކަން ފޯރުކޮށްދޭންޖެހޭ ކަމަށް ވިދާޅުވެ، އާ ޑިވެލޮޕްމަންޓް ބޭންކާއި، ގައުމީ ފައިސާއިން މުއާމަލާތް ކުރުމާއި، އަދި އިސްލާމީ ކެޕިޓަލް މާކެޓްތައް މެދުވެރިކޮށް މަސައްކަތްތައް ކުރިއަށް ގެންދިއުމުގެ މުހިންމުކަން އަންވަރު ފާހަގަކުރެއްވި އެވެ. މީގެ އިތުރުން، ތިމާވެއްޓާ ރައްޓެހި 'ގްރީން ޓްރާންސިޝަން' އަށް މަސައްކަތް ކުރަންވާނީ ގައުމުތަކުގެ ހާލަތާއި، ތަރައްގީގެ މަރުހަލާތަކާއި، އަދި ކުރިއަރަމުންދާ ދުވެއްޔަށް ރިއާޔަތްކޮށްގެން ކަމަށް ވެސް އަންވަރު ވިދާޅުވި އެވެ.
ޖުމްލަ 11 ގައުމުގެ މައްޗަށް އެކުލެވޭ ބްރިކްސް އިއްތިހާދުގައި ހިމެނެނީ ބްރެޒިލް، ރަޝިޔާ، އިންޑިޔާ، ޗައިނާ، ދެކުނު އެފްރިކާ، މިސްރު، އިތިއޯޕިއާ، އިންޑޮނޭޝިޔާ، އީރާން، ސައުދީ އަރަބިއްޔާ، އަދި ޔުނައިޓެޑް އަރަބް އެމިރޭޓްސް (ޔޫއޭއީ) އެވެ. މީގެ އިތުރުން، ވިއެޓްނާމް، ބެލަރޫސް، ބޮލީވިޔާ، ކަޒަކިސްތާން، ކިޔުބާ، މެލޭޝިޔާ، ނައިޖީރިޔާ، ތައިލެންޑް، ޔުގާންޑާ، އަދި އުޒްބެކިސްތާން ވަނީ 2025 ވަނަ އަހަރު ޕާޓްނަރު ގައުމުތަކުގެ ގޮތުގައި އެ އިއްތިހާދާ ގުޅިފަ އެވެ.
ހޮނިހިރު ދުވަހު މި އިއްތިހާދުން ވަނީ 'ނިއުދިއްލީ ޑިކްލަރޭޝަން' ޤަރާރު ބަލައިގަނެ، އަލަށް އުފެދޭ މާކެޓްތަކާއި، ތަރައްގީވަމުން އަންނަ ގައުމުތަކާއި، އަދި ބްރިކްސްގެ ޕާޓްނަރު ގައުމުތަކާއެކު އޮންނަ އެއްބާރުލުން އިތުރަށް ބަދަހިކުރުމަށް އިގުރާރުވެފަ އެވެ.
މަސްދަރު: އަނަދޯލް އޭޖެންސީ
