އީރާނުން ވޮޝިންގޓަނަށް ސީދާ ގުޅައި، އެއްބަސްވުމަކަށް ދާން ހުށަހަޅައިފި: ޓްރަމްޕް
17 ސެޕްޓެމްބަރު 2026 | ބުރާސްފަތި 02:28އީރާނުން ސީދާ އެމެރިކާއާ މުއާމަލާތްކޮށް އެއްބަސްވުމަކަށް އަންނަން ބޭނުންވާކަމުގެ މެސެޖު ލިބިފައިވާ ކަމަށް ޑޮނަލްޑް ޓްރަމްޕް ވިދާޅުވެއްޖެ. މި ހަނގުރާމަ ނިމުމަކާ ގާތްވެފައިވާ ކަމަށް ޓްރަމްޕް ސިފަކުރެއްވިއިރު، މިއީ ސަރަހައްދީ މަސްލަހަތު ގޯސްވެ ދެގައުމުގެ ދެމެދުގައި ވަރުގަދަ ހަމަލާތަކެއް ބަދަލުކުރަމުންދާ ދަނޑިވަޅެއް
އެމެރިކާގެ ރައީސް ޑޮނަލްޑް ޓްރަމްޕް އުތުރު ކޮރެލައިނާއަށް ވަޑައިގަންނަވައި ނޫސްވެރިންނާ ވާހަކަފުޅު ދައްކަވަނީ | ފޮކްސް ނިއުސް
އީރާނުން ސީދާ ވޮޝިންޓަނާ މުއާމަލާތްކޮށް، އެއްބަސްވުމަކަށް އަންނަން ބޭނުންވާ ކަމަށް ބުނެފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުދަ ދުވަހު ވިދާޅުވެއްޖެ އެވެ. ޓްރަމްޕް މިހެން ވިދާޅުވީ މިހާރު ހިނގަމުންދާ ހަނގުރާމައިގެ ހާލަތާ ގުޅޭގޮތުން ވާހަކަފުޅު ދައްކަވަމުން، ހަނގުރާމަ ނިމުމަކާ ގާތްވެފައިވާ ކަމަށް ސިފަކުރައްވަމުންނެވެ.
އުތުރު ކެރޮލައިނާއަށް ވަޑައިގަންނަވައި ނޫސްވެރިންނާ ވާހަކަފުޅު ދައްކަވަމުން ޓްރަމްޕް ވިދާޅުވީ، އީރާނުން ބޭނުންވަނީ އެއްބަސްވުމެއް ގާއިމުކުރަން ކަމަށާއި، އެ ކަން ކުރިއަށްދާ ގޮތް ބައްލަވާނެ ކަމަށެވެ. އަދި، އީރާނުގެ ފަރާތުން މި މެސެޖު ލިބުނީ ސީދާކޮށްތޯ ނުވަތަ މެދުވެރިއަކު ބޭނުންކޮށްގެންތޯ ސުވާލުކުރުމުން، އޭނާ ވިދާޅުވީ އެ މައުލޫމާތު ލިބުނީ ސީދާ އީރާނުގެ ފަރާތުން ކަމަށެވެ. މީގެ އިތުރުން، މި ހަނގުރާމަ މިހާރު އޮތީ ކޮން މަރުހަލާއެއްގައިތޯ ނޫސްވެރިން ސުވާލުކުރުމުން، ޓްރަމްޕް ވިދާޅުވީ އުންމީދަކީ މިއީ ހަނގުރާމައިގެ އެންމެ ފަހު މަރުހަލާ ކަމަށްވުން ކަމަށެވެ.
ޓްރަމްޕް މިހެން ވިދާޅުވެފައި މި ވަނީ، ހުރްމުޒް ކަނޑުއޮޅި ހުޅުވާލުމަށާއި ސަރަހައްދީ ސުލްހައިގެ އެއްބަސްވުމަކަށް މަގުފަހިކުރުމަށް މިދިޔަ ޖޫން މަހު އެއްބަސްވުމެއްގައި ސޮއިކޮށްފައި ވަނިކޮށް، އީރާނާއި އެމެރިކާއާ ދެމެދު މަސްލަހަތު ވަރަށް ބޮޑަށް ގޯސްވެފައިވާ ދަނޑިވަޅެއްގަ އެވެ.
މިދިޔަ ފެބުރުވަރީ މަހު އެމެރިކާއާއި އިސްރާއީލުން ވަނީ އީރާނުގެ ސަރުކާރުގެ އިމާރާތްތަކަށާއި، އަސްކަރީ މަރުކަޒުތަކަށާއި، މިސައިލް އުފައްދާ ތަންތަނުގެ އިތުރުން ވައިގެ ދިފާއީ ނިޒާމުތަކަށް އަމާޒުކޮށް ވަރުގަދަ ހަމަލާތަކެއް ދީފަ އެވެ. މީގެ ރައްދުގައި އީރާނުން ވަނީ އިސްރާއީލަށާއި އެ ސަރަހައްދުގައި ހުރި އެމެރިކާގެ އަސްކަރީ މަރުކަޒުތަކަށް މިސައިލާއި ޑްރޯން ހަމަލާތަކެއް ދީފަ އެވެ. އަދި، އެތައް ބިލިޔަން ޑޮލަރެއްގެ ގެއްލުންތައް ދީފަ އެވެ. މި ހަމަނުޖެހުންތައް މުޅި ސަރަހައްދަށް ފެތުރިފައިވާއިރު، ހަނގުރާމަ ހުއްޓުވުމަށް ޓަކައި ޑިޕްލޮމެޓިކް ފެންވަރުގައި ގިނަ މަސައްކަތްތަކެއް ދަނީ ކުރެވެމުންނެވެ.
މަސްދަރު: އަނަދޯލް އޭޖެންސީ
