ހައުސިންގ މިނިސްޓްރީގެ މުވައްޒަފުންނަށް ފާރަވެރިވުމަށް އިމާރާތުގެ އެތެރޭގައި ކެމެރާ ހަރުކޮށްފި
28 ސެޕްޓެމްބަރު 2026 | ހޯމަ 09:38ރަސްމާލެ މަޝްރޫއުގެ ލިޔެކިޔުންތަކެއް ހުރި ލޮކަރުތަކެއް އުސޫލުން ބޭރުން ހުޅުވާފައި ހުރި މައްސަލައެއް ފުލުހުން ތަހުގީގު ކުރާކަން ވަނީ ހާމަކޮށްފައި. މި ހާދިސާއާ ގުޅިގެން ހައުސިންގ މިނިސްޓްރީގެ ސަލާމަތީ ކަންކަން ވަރުގަދަކޮށް ފުލުހުން ފޯރިމަރަން ފަށާފައިވާއިރު، މުވައްޒަފުންގެ މެދުގައި ވަނީ ނުތަނަވަސްކަން އުފެދިފައި
އިސްލާމިކް ޑިވެލޮޕްމަންޓް ބޭންކް (އައި.ޑީ.ބީ) ގްރޫޕްގެ ރީޖަނަލް ހަބް، ޑާކާގެ އިސްވެރިޔާ އަލީ މުޙައްމަދު ޚާން، މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. ޢަބްދުﷲ މުއްޠަލިބްއާ ބައްދަލުކުރައްވަނީ | ހައުސިންގ މިނިސްޓްރީ
ހައުސިންގ މިނިސްޓްރީގެ މުވައްޒަފުންނަށް ފާރަވެރިވުމަށް އިމާރާތުގެ އެތެރޭގައި ކެމެރާ ހަރުކޮށްފި އެވެ.
ސެކިއުރިޓީ ކެމެރާ ހަރުކުރީ، އެ މިނިސްޓްރީން ރަސްމާލެ މަޝްރޫއާ ގުޅޭ މުހިންމު ލިޔެކިޔުންތަކެއް ގެއްލިގެން އުޅޭ ވާހަކަ ފެންމަތިވެފައިވަނިކޮށް، އެ މިނިސްޓްރީގައި ފުލުހުން ފޯރިމަރަން ފަށައިފާ ދަނޑިވަޅެއްގަ އެވެ.
އެ މިނިސްޓްރީގެ މުވައްޒަފަކު ނަން ނުޖެހުމަށް ޝަރުތުކޮށް މައުލޫމާތު ދިން ގޮތުގައި، ވޭތުވެދިޔަ ދެ ރޭތަކުގައި ފުލުހުން ވަނީ ހައުސިންގ މިނިސްޓްރީ ހިނގަމުންދާ އިމާރާތުގެ ދޮރުމަތީގައި ފާރައަށް ތިބެފަ އެވެ.
އޭނާ އިތުރަށް ބުނި ގޮތުގައި މިކަމުގެ ސަބަބުން މުވައްޒަފުންގެ މެދުގައި ނުތަނަވަސްކަން އުފެދި، އެކަން އެގޮތައް ކުރަން މިނިސްޓަރު އަބްދުﷲ މުއްތަލިބު ނިންމެވީ، މުވައްޒަފުންނަށް އިތުބާރު ނުކުރާތީ ކަމަށް ބައެއް މުވައްޒަފުން ބުނެފައިވާ ކަމުގަ އެވެ.
އަނެއްކޮޅުން އިމާރާތުގެ ތެރޭގައި ކެމެރާ ހަރުކުރުމާ ގުޅިގެން އިތުރަށް މި ނުތަނަވަސްކަން ބޮޑުވެފައިވާ ކަމަށް މި ނޫހާ ވާހަކަ ދެއްކި މުވައްޒަފަކު ވަނީ ބުނެފަ އެވެ.
ފުލުހުންގެ ފޮރެންސިކް ޓީމަކުން މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓް އަށް ވަދެ ތަހުގީގެއް ހިންގިކަން ހާމަވީ، މިދިޔަ ހުކުރު ދުވަހުގެރޭ 7:30 ހާއިރު ހިންގި އޮޕަރޭޝަންއަކާ ގުޅިގެންނެވެ.
ރަސްމާލެ މަޝްރޫއުގެ މުހިންމު ލިޔެކިޔުންތަކެއް ގެއްލިގެން އުޅޭ ކަމަށް ބެލެވޭތީ، ފުލުހުންގެ ފޮރެންސިކް ޓީމުން އެ މިނިސްޓްރީގައި ހަރަކާތްތެރިވިކަން މަސްދަރުތަކުން ކަށަވަރުކޮށްދީފައިވަނިކޮށް ފުލުހުން ނެރުނު ބަޔާނެއްގައި ބުނީ އެ މިނިސްޓްރީ ގައި ހުރި ރަސްމީ ލިޔެކިޔުުންތަކެއް އަޅާފައިވާ ލޮކަރުތަކެއް، އޮންނަ އުސޫލުން ބޭރުން ހުޅުވާފައި ހުރިކަމަށް އެ މިނިސްޓްރީ އިން ކުރި ރިޕޯޓަކާ ގުޅިގެން، 2026 ސެޕްޓެމްބަރު 25 ވީ ހުކުރު ދުވަހުގެ ރޭ، 07:18 ހާއިރު ފުލުހުން އެ މިނިސްޓްރީ އަށް ހާޒިރުވި ކަމަށެވެ.
