ރަސްމާލެ މަޝްރޫއާ ގުޅިގެން ހައުސިންގ މިނިސްޓަރު މުއްތަލިބުގެ އެކައުންޓުތަކާއި މާލީ މުއާމަލާތްތައް ތަހުގީގުކޮށް ބަލަންޖެހޭ: ޒަރިޔަންދު
26 ސެޕްޓެމްބަރު 2026 | ހޮނިހިރު 07:05ރަސްމާލެ މަޝްރޫއުގެ އެއްބަސްވުމާ ގުޅިގެން ސަރުކާރުންގެ ބޭފުޅުން ދޮގު ހައްދަވާ ކަމަށް ވިދާޅުވެ، ހައުސިންގ މިނިސްޓަރު މުއްތަލިބު އާއި އޭނާގެ އާއިލާގެ މާލީ މުއާމަލާތްތައް ތަހުގީގުކުރަން މާލީ ތަޖުރިބާކާރު ޒަރިޔަންދު ވަނީ ގޮވާލައްވާފައި. މި މަޝްރޫއުގެ ސަބަބުން ގައުމަށް ނުރައްކާވެދާނެ ކަމަށް ފާހަގަކުރައްވައި، މިނިސްޓަރުންގެ އެކައުންޓުތަކާއި ރާއްޖެއިން ބޭރުން ބައްލަވައިގެންފައިވާ މުދަލެއް ހުރިތޯ ބަލަންޖެހޭ ކަމަށް އޭނާ ވިދާޅުވި
ރާއްޖެޓީވީގެ ޓީވީޓޯކް ޕްރޮގްރާމްގައި މާލީ ދާއިރާގެ ތަޖުރިބާކާރު ބޭފުޅެއް ކަމުގައިވާ އިސްމާއީލް ޒަރިޔަންދު ވާހަކަ ދައްކަވަނީ | ރާއްޖެއެމްވީ
ރަސްމާލެ މަޝްރޫއާ ގުޅިގެން ހައުސިންގ މިނިސްޓަރު ޑރ.އަބްދުﷲ މުއްތަލިބުގެ ފައިސާގެ އެކައުންޓުތަކާއި މާލީ މުއާމަލާތްތައް ތަހުގީގުކޮށް ބަލަންޖެހޭ ކަމަށް މާލީ ދާއިރާގެ ތަޖުރިބާކާރު ބޭފުޅެއް ކަމުގައިވާ އިސްމާއީލް ޒަރިޔަންދު ވިދާޅުވެއްޖެ އެވެ.
ރަސްމާލެ މަޝްރޫއުގެ ބޮޑުބައެއް އަބޫދާބީގެ އީގަލް ހިލްސް ކުންފުންޏަށް ދިނުމަށް ނިންމާފައިވާ އެއްބަސްވުމާ ގުޅިގެން ކަންބޮޑުވުން ފާޅުކުރައްވާ ރާއްޖެޓީވީގެ ޓީވީޓޯކް ޕްރޮގްރާމްގައި ޒަރިޔަންދު ވިދާޅުވީ، މި މަޝްރޫއިން ސަރުކާރުން ބޮޑު އާމްދަނީއެއް ލިބޭ ކަމަށް ބުނެ ދައްކާ ވާހަކަތަކަކީ ހަގީގަތެއް ނޫން ކަމަށާއި، މިހާރު މާ ބޮޑު އެއްޗެއް ދައުލަތަށް ނުލިބޭ ކަމަށެވެ. އަދި ސަރުކާރު އޮތީ ޑޮލަރަށް ވަރަށް ބޮޑަށް ބޭނުންވެފައި ކަމަށް ވެސް އޭނާ ފާހަގަކުރެއްވި އެވެ.
ރަސްމާލެ މަޝްރޫއަށް އިޝާރާތް ކުރައްވައި ޒަރިޔަންދު ވިދާޅުވީ، ރާއްޖޭގެ މާލީ މުއާމަލާތްތަކާ ގުޅޭގޮތުން ރައީސް މުއިއްޒުގެ އިތުރުން މިނިސްޓަރު މުއްތަލިބު އާއި ފިނޭންސް މިނިސްޓަރު ހަސަން ޒަރީރު ވެސް ހައްދަވަނީ ދޮގު ކަމަށެވެ. އަދި ދޮގު ހަދައި އޮޅުވާލެވޭ ވަރަށް ވުރެ މިހާރު ދިވެހި ރައްޔިތުން މާ ބޮޑަށް ހޭލުންތެރިކަމަށް އޭނާ ވިދާޅުވި އެވެ.
މީގެ އިތުރުން ޒަރިޔަންދު ވިދާޅުވީ، މިނިސްޓަރު މުއްތަލިބު އާއި އޭނާގެ އާއިލާގެ ބޭފުޅުން މިދިޔަ ތިން ހަތަރު މަސްދުވަހުގެ ތެރޭގައި ފްލެޓު ފަދަ ތަންތަން ބައްލަވައިގެންފައިވާނަމަ، އެކަންކަން ތަހުގީގު ކުރެވެންޖެހޭ ކަމަށެވެ. އަދި ފަހުގެ ތާރީޚެއްގައި ރާއްޖެއިން ބޭރުން އެއްވެސް މުދަލެއް ނުވަތަ ތަނެއް ބައްލަވައިގެންފައިވޭތޯ ވެސް ބަލަންޖެހޭ ކަމަށް ވިދާޅުވި އެވެ.
މިހާރު އެ ބޭފުޅުންނަށް ލިބުނު އެއްޗެއް ލިބުނު. އެހެންވީމާ އަޅުގަނޑު މި ދެންނެވީ ހައުސިންގ މިނިސްޓަރު މުއްތަލިބުގެ އެކައުންޓުތައް ވެސް އެބަ ޗެކްކުރެވެންޖެހޭ. ހައުސިންގ މިނިސްޓަރު މުއްތަލިބާއި މުއްތަލިބުގެ އާއިލާގެ ބޭފުޅުން ބައްލަވައިގެންފައި ހުރި ތަނެއް ހުރި ނަމަ، މިދިޔަ ތިންހަތަރު މަސްދުވަސް ތެރޭގައި މިސާލަކަށް ފްލެޓު، މި ކަހަލަ ތަންތަން ބައްލަވައިގެންފައި ހުރި ނަމަ، އެކަން ވެސް އިންވެސްޓިގޭޓް ކުރެވެންޖެހޭ. ފަހުގެ ތާރީޚެއްގައި. ރާއްޖެއިން ބޭރުގެ ތަނެއް ހުސްވެގެން އެބަޖެހޭ ބަލަންޖެހޭ. އެއީ މިއީ ވަރަށް ބޮޑު މައްސަލައެއް. އެއީ މި ރާއްޖޭގައި އަލަށް ދިމާވާ ކަމެއް ނޫންއިސްމާއީލް ޒަރިޔަންދު
ތާރީޚީ މިސާލުތަކަށް އަލިއަޅުއްވާލައްވައި ޒަރިޔަންދު ވިދާޅުވީ، މީގެ ކުރިން ވެސް ރާއްޖެ ބޭރުގެ ފަރާތްތަކުގެ ބާރުގެ ދަށަށް ގޮސްފައިވަނީ ވެރިކަމުގައި ތިބި ބަޔަކު އަމިއްލަ އެދުމަށްޓަކައި ކަންކަން ކުރުމުން ކަމަށެވެ. ރަސްމާލެ ދިގު މުއްދަތަށް ބޭރުގެ ބަޔަކަށް ދިނުމަކީ ގައުމަށް އޮތް ވަރަށް ބޮޑު ނުރައްކަލެއް ކަމަށާއި، ޔަހޫދީންނަށް ރާއްޖޭގައި ވަޒަންވެރިވުމުގެ ފުރުސަތު ދެވިގެން ނުވާނެ ކަމަށް އޭނާ ވިދާޅުވި އެވެ. އަދި އިދިކޮޅު ފަރާތްތަކުން މިކަންކަން ވަރަށް ރަނގަޅަށް ބަލައި އަޅަންޖެހޭ ފިޔަވަޅުތައް އެޅުމަށް ޒަރިޔަންދު ގޮވާލެއްވި އެވެ.
