އިނގިރޭސިވިލާތުގެ އާރްއޭއެފް ބޭސްއަށް ދޭންއުޅުނު ކަމަށް ބުނާ ހަމަލާއާ ގުޅޭގޮތުން މިހާތަނަށް އިނގެނީ ކޮން މައުލޫމާތެއް؟
28 ސެޕްޓެމްބަރު 2026 | ހޯމަ 07:54އިނގިރޭސިވިލާތުގެ އާރްއޭއެފް ފެއާފަޑް އަސްކަރީ މަރުކަޒު ކައިރިން ޝައްކުކުރެވޭ ތިން އުޅަނދަކާއެކު ފަސް މީހަކު ހައްޔަރުކޮށް، ޓެރަރިޒަމްގެ ތުހުމަތުގައި މައްސަލަ ތަހުގީގު ކުރަން ފަށައިފި. މި ހާދިސާއާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން އެ ސަރަހައްދުގެ 85 ގެއަކުން މީހުން ހުސްކޮށްފައިވާއިރު، މިއީ ބޮޑު ގެއްލުމެއް ދިނުމަށް ރާވާފައިވާ ރޭވުމެއް ކަމަށް އެމެރިކާގެ ރައީސް ވަނީ ވިދާޅުވެފައި
އިނގިރޭސިވިލާތުގެ އާރްއޭއެފް ފެއާފަޑް އަސްކަރީ ވައިގެ ބަނދަރުގެ ތެރޭގައި އެމެރިކާގެ އަސްކަރީ އުޅަނދެއް ދުއްވަމުންދާ މަންޒަރު | އެކްސް
އިނގިރޭސިވިލާތުގެ ހުޅަނގުގައި އޮންނަ އަސްކަރީ ވައިގެ މަރުކަޒެއް ކަމަށްވާ ރޯޔަލް އެއާފޯސްގެ (އާރްއޭއެފް) ފެއާފަޑް އަސްކަރީ މަރުކަޒު ކައިރީގައި ނުރައްކާތެރި "ހާދިސާއެއް" ހިނގައިގެން އުޅޭ ކަމަށް އިއުލާނުކުރުމާ ގުޅިގެން، ގޮވާތަކެއްޗާއި ޓެރަރިޒަމްގެ ކުށްތަކުގެ ތުހުމަތުގައި ފަސް ފިރިހެނަކު ހައްޔަރުކޮށްފައިވާ ކަން އިނގިރޭސިވިލާތުގެ އިދާރާތަކުން ވަނީ ކަށަވަރު ކޮށްދީފަ އެވެ.
ގްލޮސްޓެޝާގައި ހުންނަ އާރްއޭއެފް ފެއާފަޑް ބޭސް ކައިރިން އަތުލައިގަތް ބައެއް އުޅަނދުތައް ބޮން ނައްތާލާ ފަންނީ ޓީމުތަކުން ބަލައި ފާސްކުރަމުން އަންނައިރު، އެ ސަރަހައްދުގެ ވަށައިގެންވާ ގިނަ އަދަދެއްގެ ގެތަކެއްގައި ދިރިއުޅޭ މީހުން ވަނީ ރައްކާތެރި ހިސާބުތަކަށް ބަދަލުކޮށްފަ އެވެ.
މި ހާދިސާއާ ގުޅިގެން މިހާތަނަށް ލިބިފައިވާ މައުލޫމާތުތަކުގެ ޚުލާސާއެއް ތިރީގައި މިވަނީ އެވެ.
އާރްއޭއެފް ފެއާފަޑް އޮންނަނީ ކޮންތަނަކު؟
އާރްއޭއެފް ފެއާފަޑް އޮންނަނީ ކޮޓްސްވޮލްޑްސްގައި، ކޯން ކޯރުގެ އައްސޭރީގައި އޮންނަ ފެއާފަޑްގެ ދެކުނުން ގާތްގަނޑަކަށް 4 މޭލު ދުރުގަ އެވެ. މި މަރުކަޒަކީ އެމެރިކާގެ އަސްކަރިއްޔާއާއެކު ދިގު ތާރީޚެއް ހިއްސާކުރާ ތަނަކަށް ވާއިރު، ފަހަކަށް އައިސް އީރާނަށް އަމާޒުކޮށް ދިން ހަމަލާތަކުގައި އެމެރިކާގެ އަސްކަރީ މަތިންދާބޯޓުތައް ފުރައިގެންދާ މައި މަރުކަޒެއްގެ ގޮތުގައި މި ބޭސް ވަނީ ބޭނުންކޮށްފަ އެވެ.
ހާދިސާ ހިނގައިދިޔަ ގޮތް
އާދީއްތަ ދުވަހު އިނގިރޭސިވިލާތުގެ ގަޑިން މެންދަމު 00:45 ހާއިރު، އާރްއޭއެފް ފެއާފޯޑާ ދިމާއަށް ދަތުރުކުރަމުން ދިޔަ "ޝައްކުކުރެވޭ ތިން އުޅަނދަކާ" ބެހޭ ކޯލެއް އެ އިދާރާއަށް ލިބުނު ކަމަށް ގްލޮސްޓެޝާ ފުލުހުން ހާމަކުރި އެވެ. މި މައުލޫމާތާ ގުޅިގެން، އެ މަރުކަޒުގެ އިރުދެކުނުން 2 މޭލު ދުރުގައި އޮންނަ ވެލްފަޑް އަވަށުގެ ކައިރިން ފަސް ފިރިހެނަކު ފުލުހުންގެ ބެލުމުގެ ދަށަށް ގެންދިޔަ އެވެ.
މި އުޅަނދުތައް ބަލައި ފާސްކުރުމަށް ޓަކައި ބޮން ނައްތާލާ ޓީމެއް ވެސް އެ އަވަށަށް ފޮނުވާފައިވާ ކަމަށް ފުލުހުން ބުނެފައިވެ އެވެ. އަދި، އެ އުޅަނދުތަކުގެ ވަށައިގެން 400 މީޓަރުގެ ސަރަހައްދެއް ވަނީ ބަންދުކޮށްފަ އެވެ. ވައިގެ މަގުން ނަގާފައިވާ ފޮޓޯތަކުން ފެންނަ ގޮތުގައި، ގަސްބޯ ސަރަހައްދެއްގައި ހުއްޓުވާފައި އޮތް ހުދު ކުލައިގެ ދެ ވޭނަކާ ދިމާއަށް ރިމޯޓް ކޮންޓްރޯލް ރޮބޮޓެއް ދަތުރުކުރެ އެވެ. ނަމަވެސް، އެ ފަދަ ރޮބޮޓެއް ބޭނުންކުރި ކަން ފުލުހުން ކަށަވަރުކޮށެއް ނުދެ އެވެ.
އިނގިރޭސިވިލާތުގެ އާރްއޭއެފް ފެއާފަޑް އަސްކަރީ ވައިގެ ބަނދަރަށް ހަމަލާދިނުމަށް ރާވަމުންދިޔަ ކަމަށް ބުނާ މީހުން ހައްޔަރުކޮށްފައިވާ ކަމަށް ބުނާ މަންޒަރު | ބީބީސީ
މި ހާދިސާގެ ތަހުގީގު އިސްވެ ކުރިއަށް ގެންދަނީ ކައުންޓަ ޓެރަރިޒަމް ޕޮލިސިން (ސީޓީޕީ) ގެ ފަރާތުން ކަމަށް މައުލޫމާތު ލިބެ އެވެ. ބީބީސީއަށް މައުލޫމާތު ލިބިފައިވާ ގޮތުގައި، މި އޮޕަރޭޝަނަކީ ކުރިން ލިބުނު ޖާސޫސީ މައުލޫމާތެއްގެ މައްޗަށް ބިނާކޮށް ހިންގި އޮޕަރޭޝަނެއް ނޫން ކަމަށް ވެ އެވެ.
މި ހާލަތާ ގުޅިގެން އެމެރިކާގެ އަސްކަރިއްޔާއިން ބުނީ، "މި ހާލަތު ބަލައި، އޭގެ ސަބަބުން ކުރާނެ ނޭދެވޭ އަސަރުތައް ކުޑަކޮށް، އެމެރިކާގެ މުވައްޒަފުންނާއި، އެ މީހުންގެ އާއިލާތަކާއި، އަދި ސަރަހައްދީ މުޖުތަމައުގެ ރައްކާތެރިކަން ކަށަވަރުކުރުމަށް،" އިނގިރޭސިވިލާތުގެ ކަމާބެހޭ ފަރާތްތަކާ އެކު "ގާތުން މަސައްކަތް ކުރަމުންދާ،" ކަމަށެވެ.
އާދީއްތަ ދުވަހުގެ ފަތިހުގެ ވަގުތުތަކުން ފެށިގެން އެ ސަރަހައްދުގައި ކުއްލި ހާލަތްތަކުގައި ހަރަކާތްތެރިވާ ގިނަ އަދަދެއްގެ އޮފިސަރުން ދަނީ ހަރަކާތްތެރިވަމުންނެވެ. އަދި، ކުރިއަށް އޮތް ދުވަސްތަކުގައި ވެސް އެ ފަރާތްތައް އެ ސަރަހައްދުގައި ދެމިތިބޭނެ ކަމަށް ގްލޮސްޓެޝާ ފުލުހުންގެ ވަގުތީ ޗީފް ކޮންސްޓެބަލް މެގީ ބްލައިތު ވިދާޅުވި އެވެ.
އާދީއްތަ ދުވަހުގެ ހަވީރު ބޭއްވި ނޫސްވެރިންގެ ބައްދަލުވުމެއްގައި ބްލައިތު ވިދާޅުވީ، ކައުންޓަ ޓެރެރިޒަމް ޕޮލިސިންގއަށް (ސީޓީޕީ) އެހީތެރިކަން ފޯރުކޮށްދިނުމާއި ގައުމީ ފެންވަރުގެ އެހެން އިދާރާތަކާ ގުޅިގެން މަސައްކަތް ކުރުން ފުލުހުން ކުރިއަށް ގެންދާނެ ކަމަށެވެ. މީގެއިތުރުން، މި ހާދިސާއަކީ "ޓެރަރިސްޓް އަމަލެއްގެ" ގޮތުގައި ކަނޑައެޅުމުގެ އިޚުތިޔާރު ސީޓީޕީއަށް ދޫކޮށްލައްވާނެ ކަމަށް ވެސް އޭނާ ވިދާޅުވި އެވެ.
ތުހުމަތުކުރެވޭ ފަރާތްތަކުގެ ތަފުސީލު
ހައްޔަރުކުރި ފަސް ފިރިހެނުން ފުރަތަމަ ހިފެހެއްޓީ ގޮވާތަކެއްޗާ ބެހޭ ގާނޫނުގެ ދަށުން ކުށަކަށް އަރައިގަތް ކަމުގެ ތުހުމަތުގަ އެވެ. އޭގެ ފަހުން، ޓެރަރިޒަމްގެ އަމަލެއް ހިންގަން ތައްޔާރުވި ކަމުގެ ތުހުމަތުގައި އެ މީހުން ވަނީ ހައްޔަރުކޮށްފަ އެވެ. ފުލުހުންގެ ބަންދުގައި މިހާރު ވެސް ތިބި މި މީހުންގެ ނަންތައް ހާމަކޮށްފައެއް ނުވެ އެވެ. އަދި، އެ މީހުން ބައިތިއްބާފައި ވަނީ ކޮން ތަނެއްގައި ކަމެއް ވެސް ފުލުހުން ހާމައެއް ނުކުރެ އެވެ.
އާންމު ހައްޔަރުތަކުގައި ކޯޓު މުއްދަތު އިތުރުކުރުމަކާ ނުލައި މީހުން ބަންދުގައި ބޭތިއްބެނީ 24 ގަޑިއިރުގެ މުއްދަތަކަށް ނަމަވެސް، 2000 ވަނަ އަހަރުގެ ޓެރެރިޒަމް ގާނޫނުގެ ދަށުން ހައްޔަރުކުރެވޭ މީހުން އެއްވެސް ދައުވާއެއް އުފުލުމަކާ ނުލައި 14 ދުވަހާ ހަމައަށް ބަންދުގައި ބޭތިއްބުމުގެ ބާރު ލިބިދެ އެވެ. މި ހާދިސާއާ ގުޅިގެން އިތުރު ބަޔަކު ހޯދަމުންދޭތޯ ސުވާލުކުރުމުން، ބްލައިތު ވިދާޅުވީ މި މައްސަލަ މިހާރު އޮތީ "ކޮންޓްރޯލް ކުރެވިފައި" ކަމަށް ދެކެވަޑައިގަންނަވާ ކަމަށެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، ހައްޔަރުކުރެވުނު މީހުން މަސައްކަތް ކުރަމުން ދިޔައީ "ބޮޑު ގެއްލުމެއް ދިނުމަށް" ކަމަށެވެ. އަދި، "އަޅުގަނޑުމެން ގިނަ ދުވަސްތަކެއް ވަންދެން އެ މީހުންނަށް ފާރަލަމުން ދިޔައިން، އަދި އެ މީހުން އަތުލައިގަނެފިން،" އޭނާ ވިދާޅުވި އެވެ.
މި ފަސް މީހުން ހައްޔަރުކުރި ވަގުތު ދައްކުވައިދޭ ކަމަށް ބުނާ ފޮޓޯއެއް ބީބީސީގެ 'ޔުއާ ވޮއިސް' އަށް ވަނީ ލިބިފަ އެވެ. އެ ފޮޓޯއިން ފެންނަނީ އާރްއޭއެފް ފެއާފަޑްގެ ރަންވޭއަށް ވަދެވެން އޮންނަ 'ކްރޭޝް ގޭޓް 6އޭ' އާ ގާތްގަނޑަކަށް 350 މީޓަރު ދުރުގައި އޮންނަ ވެލްފަޑް އަވަށުގައި އެ މީހުން ހައްޔަރުކޮށްފައި ތިބި މަންޒަރެވެ. ބީބީސީއަށް މި ފޮޓޯގެ އަސްލު މަސްދަރު ސީދާ ކަށަވަރުކުރެވިފައި ނުވި ނަމަވެސް، 'ބީބީސީ ވެރިފައި' އިން ވަނީ އެ ފޮޓޯ ނެގި ތަން ޔަގީންކޮށް، އެއީ ސައްހަ ފޮޓޯއެއް ކަން ކަށަވަރުކޮށްފަ އެވެ.
'އެ މީހުންގެ ހުރިހާ ރޭވުމެއް ފެނަށްދިޔައީ އަޅުގަނޑު 999 އަށް ކުރި ކޯލުން'
ވެލްފަޑް އަވަށުގެ ތެރޭގައި އޮތް ހުދު ކުލައިގެ ތިން ވޭން ފެނިގެން ކުއްލި ހާލަތްތަކުގެ ގުޅަން ޖެހޭ 999 ނަންބަރަށް ގުޅައި މިކަން ރިޕޯޓްކުރި އެ ސަރަހައްދުގެ ރައްޔިތަކު ބުނީ، އެ އުޅަނދުތައް އޭނާއަށް ފެނުނީ "ހަމަ ނަސީބުން" ކަމަށެވެ. ނަން ހާމަކުރަން ބޭނުންނުވާ އެ އަންހެން މީހާ ބީބީސީ ރޭޑިއޯ 4 ގެ 'ޓުޑޭ' ޕްރޮގްރާމަށް މައުލޫމާތު ދެމުން ބުނީ، އޭނާ އެނބުރި ގެއަށް އައިއިރު ގޭގެ މަގާއި ޑްރައިވްވޭ ބަންދުވެފައި އޮތް ކަމަށާއި، އަދި "މޫނާއި ބޯ ނިވާކޮށްގެން ތިބި ގިނަ އަދަދެއްގެ ފިރިހެނުންތަކެއް" ފެނުނު ކަމަށެވެ.
"އެ މީހުންނަށް އަޅުގަނޑު ފެނުމުން އަޅުގަނޑުގެ ކުރިމަތިން ދުވެފައި ދިޔަ. ބައެއް މީހުން ޖަންގަލީގެ ތެރެއަށް، އަދި އަނެއްބައި މީހުން ކައިރީގައި އޮންނަ ކެމްޕްސްފަޑް އަވަށާ ދިމާލަށް. އެއިރުން އަޅުގަނޑަށް ވިސްނުނީ އާދަޔާ ޚިލާފު ކަމެއް ހިނގަމުންދާ ކަން،" އޭނާ ކިޔައިދިނެވެ.
އެ އަންހެން މީހާ ބުނީ، އޭނާ އާރްއޭއެފް ފެއާފަޑްގައި ތިބޭ ދިފާއީ ވުޒާރާގެ ފުލުހުންނަށް ގުޅި ކަމަށާއި، ނަމަވެސް އެ ކޯލަށް އެއްވެސް ޖަވާބެއް ނުލިބުނު ކަމަށެވެ. އެއަށްފަހު، އޭނާ 999 އަށް ގުޅި ކަމަށާއި، "10 މިނެޓުގެ ތެރޭގައި މުޅި އަވަށަށް ހަތިޔާރު އެޅި ފުލުހުން ފުރިގެން ދިޔަ،" ކަމަށް ވެސް އޭނާ ބުންޏެވެ. "އަޅުގަނޑު ގަބޫލުކުރާ ގޮތުގައި އަޅުގަނޑު 999 އަށް ކުރި ކޯލުގެ ސަބަބުން އެ މީހުންގެ އެންމެހައި ރޭވުންތައް ފެނަށް ދިޔައީ."
"އާންމު ރައްޔިތެއްގެ ގޮތުގައި މި ފަދަ ކަމެއް ފެނި ރިޕޯޓްކުރަން ޖެހުމުން އަޅުގަނޑު މި ހުރީ ހައިރާންވެ އަންތަރީސްވެފައި،" އޭނާ ބުންޏެވެ. އަދި، "މި ކަމުގައި ކޮންމެވެސް ބަޔަކު ވަރަށް ބޮޑަށް އިހުމާލުވެއްޖެ،" ކަމަށް ވެސް އޭނާ ބުންޏެވެ.
އިނގިރޭސިވިލާތުގެ އާރްއޭއެފް ފެއާފަޑް އަސްކަރީ ވައިގެ ބަނދަރަށް ހަމަލާދޭން އުޅުނު ކަމަށް ބުނާ މީހުން ބޭނުންކުރި އުޅަނދުތައް ހުއްޓުވައި، ރޮބޮޓެއް ބޭނުންކޮށްގެން ބަލާފާސްކުރަނީ | ބީބީސީ
މި ހާދިސާއާ ގުޅިގެން އެ ސަރަހައްދުގައި ދިރިއުޅޭ އެހެން ރައްޔިތަކު ވަނީ ފުލުހުން ތުހުމަތުކުރެވޭ މީހުން ހިފެހެއްޓި މަންޒަރު ފެނުުނު ގޮތް ކިޔައިދީފަ އެވެ. ޖެފް ކިޔާ މި މީހާ ބީބީސީއަށް މައުލޫމާތު ދެމުން ބުނީ، "އަޅުގަނޑުގެ ގޭގެ މައިދޮރު ކުރިމަތިން ހަޅޭއްލަވާ އަޑު،" އިވުނު ކަމަށެވެ. އެ އަޑު އައީ ކޮން ދިމާލަކުން ކަން ޔަގީން ނުވި ނަމަވެސް، ކުޑަދޮރުން ބޭރު ބަލައިލިއިރު "ބޭރުގައި ފުލުހުން މީހުންތަކެއް ހިފަހައްޓައިގެން ތިބި މަންޒަރު،" ފެނުނު ކަމަށް އޭނާ ބުންޏެވެ.
ގެދޮރު ދޫކޮށް ދާންޖެހުނު މީހުންގެ އަދަދު
މި ހާދިސާއާ ގުޅިގެން ގެދޮރު ދޫކޮށް ދާންޖެހުނު ރައްޔިތުންނަށް އާދީއްތަ ދުވަހުގެ ރޭ އެނބުރި ގެއަށް ނުދެވޭނެ ކަމަށް އަންގާފައިވާ ކަމަށް ގްލޮސްޓެޝާ ފުލުހުން ހާމަކުރި އެވެ. ކޮޓްސްވޮލްޑް ޑިސްޓްރިކްޓް ކައުންސިލްގެ ޑެޕިއުޓީ ޗީފް އެގްޒެކެޓިވް ޑޭވިޑް ސްޓެންލީ ވިދާޅުވީ، އާއިލާއާއި ރައްޓެހިންގެ ގާތުގައި ތިބެވެން ނެތް ފަރާތްތަކަށް ރޭގަނޑު ހުރުމުގެ އިންތިޒާމު އެ ކައުންސިލުން ހަމަޖައްސައިދޭނެ ކަމަށެވެ.
މި ހާދިސާއާ ގުޅިގެން 85 ގެއަކުން މީހުން ހުސްކޮށްފައިވާއިރު، އެ މީހުން ކައިރީގައި ހުރި މަރުކަޒަކަށް ދިއުމަށް ވަނީ އިލްތިމާސްކޮށްފަ އެވެ. ބީބީސީއާ ވާހަކަދެއްކި ބައެއް މީހުން ބުނީ، އާދީއްތަ ދުވަހުގެ ފަތިހުގެ ވަގުތެއްގައި ފުލުހުން އައިސް އެ މީހުން ހޭލައްވައި، ވަގުތުން އެ ސަރަހައްދު ދޫކޮށް ދިއުމަށް އެންގި ކަމަށެވެ. "އަޅުގަނޑުމެންނަށް ޖެހުނީ ހަމަ އަންނައުނު އަޅައިގެން ނުކުންނަން. އަޅުގަނޑުމެންނަށް އެއްވެސް އެއްޗެއް ނޭނގެ،" ޖޯ ކިޔާ މީހަކު ބުންޏެވެ.
އެ ސަރަހައްދުގައި ދިރިއުޅޭ އެހެން ރައްޔިތެއް ކަމަށްވާ ޖޭސަން ބުނީ، "ހުރިހާ ކަމެއް ވެސް ހިނގައިދިޔައީ ވަރަށް އަވަހަށް. އަހަރެމެން ހަމައެކަނި ތަކެތި ބަންދުކޮށްގެން މިތަނަށް [މަރުކަޒަށް] އައީ،" ކަމަށެވެ. އެ މަރުކަޒުގައި ހުރި ބީބީސީގެ ރިޕޯޓަރު ބުނީ، އެ ތަނުގައި ތިބި ބައެއް މީހުން އަދިވެސް ތިބީ ނިދާ ހެދުމުގައި ކަމަށެވެ.
އިނގިރޭސި ސަރުކާރުން ބުނީ ކީކޭ؟
އިނގިރޭސިވިލާތުގެ ބޮޑުވަޒީރު އެންޑީ ބަރނަމް ވިދާޅުވީ، މި ހާދިސާއަކީ "އިންތިހާއަށް ކަންބޮޑުވާ،" ކަމެއް ކަމަށާއި، އަދި ރައްޔިތުން ހިމާޔަތްކުރުމަށް ޓަކައި ސަރުކާރުން "އަބަދުވެސް އަޅަންޖެހޭ ކޮންމެ ފިޔަވަޅެއް އަޅާނެ،" ކަމަށެވެ.
އިނގިރޭސިވިލާތުގެ ދިފާއީ ވަޒީރު ވެސް ސްޓްރީޓިންގ ވަނީ، ކުރިއަށްދާ އޮޕަރޭޝަނަކާ ގުޅޭގޮތުން އެއްޗެއް ވިދާޅުވުމަށް އިންކާރުކުރައްވާފަ އެވެ. ނަމަވެސް، އެމެރިކާގެ ދިފާއީ ވަޒީރު ޕީޓް ހެގްސެތާ މުއާމަލާތް ކުރައްވާފައިވާ ކަމަށް އޭނާ ވިދާޅުވި އެވެ. ލިވަޕޫލްގައި ކުރިއަށްދިޔަ ލޭބާ ޕާޓީގެ ކޮންފަރެންސްގެ ހަވާސާގައި، މި ހާދިސާގައި އީރާނުގެ އެއްވެސް ބައިވެރިވުމެއް އޮތްތޯ ސުވާލުކުރުމުން ސްޓްރީޓިން ވިދާޅުވީ، "އެއްވެސް އެއްޗެއް ވިދާޅުވުމަށް ނުވަތަ ލަފާކުރެއްވުމަށް އަދި މާ އަވަސް ކަމަށާއި، އަދި އެ ފަދަ ގޮތަކަށް އަމަލުކުރެއްވުމަކީ ޒިންމާދާރުކަން ކުޑަ ކަމެއް،" ކަމަށެވެ.
އާރްއޭއެފް ފެއާފަޑް ބޭނުންކުރަނީ ކޮން ކަމަކަށް؟
އާރްއޭއެފް ފެއާފަޑަކީ ވޭތުވެދިޔަ އަހަރުތަކުގައި އެމެރިކާގެ ވައިގެ ސިފައިންގެ އޮޕަރޭޝަންތައް ހިންގާ މައި މަރުކަޒެއްގެ ގޮތުގައި ބޭނުންކުރަމުން އަންނަ ތަނެކެވެ. ފިނި ހަނގުރާމައިގެ ދުވަސްވަރުގައާއި، ފަހުން 1991 ވަނަ އަހަރުގެ ގަލްފު ހަނގުރާމައިގައި މި މަރުކަޒު ބޭނުންކުރީ އެމެރިކާގެ ވައިގެ ސިފައިންގެ އިސްތިރާޖީ އެއާ ކޮމާންޑުންނެވެ. މީގެއިތުރުން، 2003 ވަނަ އަހަރު އިރާގަށް ހަމަލާދިނުމަށް ބީ-52 މަރުކާގެ ބޮންއަޅާ ބޯޓުތައް އުދުއްސައިލާފައި ވަނީ ވެސް އެ ބޭސްއިންނެވެ.
އެމެރިކާގެ ވައިގެ ސިފައިން މި މަރުކަޒު އެންމެ ފަހުން ބޭނުންކޮށްފައި ވަނީ މާޗް މަހުގެ 1 ވަނަ ދުވަހު އެވެ. އެއީ އީރާނުގެ އަސްކަރީ ގާބިލުކަމަށް އަމާޒުކޮށް ދޭ ހަމަލާތަކަށް އާރްއޭއެފް ފެއާފަޑް ހިމެނޭހެން އިނގިރޭސި މަރުކަޒުތައް ބޭނުންކުރުމުގެ ހުއްދަ އިނގިރޭސިވިލާތުގެ ކުރީގެ ބޮޑުވަޒީރު ކީރް ސްޓާމާ ދެއްވުމާ ގުޅިގެންނެވެ.
މެދުއިރުމަތީގެ މަސްރަހު ހޫނުވެގެން ދިޔައީ، ފެބުރުވަރީ 28 ވަނަ ދުވަހު އެމެރިކާއާއި އިސްރާއީލް ގުޅިގެން އީރާނަށް ހަމަލާދޭން ފެށުމާ ގުޅިގެންނެވެ. އީރާނުން ވަނީ އޭގެ ރައްދުގައި އިސްރާއީލަށާއި ގަލްފުގައި ތިބި އެމެރިކާ ސިފައިންގެ މަރުކަޒުތަކަށް ރައްދުގައި ވަރުގަދަ ހަމަލާތަކެއްދީ، ބޮޑެތި ގެއްލުންތަކެއް ދީފަ އެވެ.
މަސްދަރު: ބީބީސީ
