އިނގިރޭސިވިލާތުގައި އެމެރިކާ ސިފައިން ތިބޭ މަރުކަޒެއް ކައިރީ "ހާދިސާއެއް" ހިނގައި، އެ ސަރަހައްދު ބަންދުކޮށްފި
27 ސެޕްޓެމްބަރު 2026 | އާދީއްތަ 09:17ގޮވާތަކެއްޗާ ބެހޭ ގާނޫނުގެ ދަށުން ގިނަ ބަޔަކު ހައްޔަރުކުރުމާ ގުޅިގެން، އިނގިރޭސިވިލާތުގެ ވެލްފަޑް އަވަށުގައި ސަލާމަތީ ފިޔަވަޅުތައް ވަރުގަދަކޮށް ބޮޑު ހާދިސާއެއް އިއުލާނުކޮށްފި. މި މައްސަލައިގެ ތަހުގީގަށް އެ ސަރަހައްދުގެ ގެތައް ހުސްކޮށް އުޅަނދުތައް ބަލައިފާސްކުރަމުންދާއިރު، މިއީ އެމެރިކާގެ އަސްކަރީ މަތިންދާބޯޓުތައް ބޭނުންކުރާ މަރުކަޒެއް ކައިރީގައި ހިނގި ހާދިސާއެއް
އިނގިރޭސިވިލާތުގެ ގްލޮސްޓެޝާގައި ހިނގި "ހާދިސާއަކާ" ގުޅިގެން ފުލުހުންނާއި ގޮވާތަކެތި ނައްތާލާ ޚާއްސަ ޓީމުތަކުން އެ ސަރަހައްދުގައި ހަރަކާތްތެރިވަނީ | ރޮއިޓާސް
އެމެރިކާ ސިފައިން ހަރަކާތްތެރިވާ އިނގިރޭސިވިލާތުގެ ރޯޔަލް އެއާ ފޯސްގެ (އާރްއޭއެފް) މަރުކަޒެއް ކައިރީގައި އޮންނަ އަވަށެއްގައި "ބޮޑު ހާދިސާއެއް" ހިނގާފައިވާ ކަން އިއުލާނުކޮށް، އެ އަވަށުގައި ސަލާމަތީ ފިޔަވަޅުތައް ވަރުގަދަކޮށްފި އެވެ. ގިނަ އަދަދެއްގެ ފުލުހުން ވަނީ އެ އަވަށުގެ މަގުތައް ބަނދުކޮށް، ގެތައް ހުސްކޮށް، ގެތަކާއި އެއްގަމު އުޅަނދުފަހަރު ބަލައިފާސްކުރަން ފަށާފަ އެވެ.
އެ ސަރަހައްދުގައި ހިނގާފައި ވަނީ ކޮން ކަހަލަ ހާދިސާއެއް ކަން މިހާތަނަށް ސާފެއް ނުވެ އެވެ. ނަމަވެސް، ގޮވާތަކެއްޗާ ބެހޭ ގާނޫނުގެ ދަށުން ކުށުގެ ތުހުމަތުކުރެވޭ ގިނަ އަދަދެއްގެ ބަޔަކު ހައްޔަރުކޮށްފައިވާ ކަމަށް ގްލޮސްޓެޝާގެ ފުލުހުން ވަނީ ބުނެފަ އެވެ. އެ މީހުން ހައްޔަރުކޮށްފައި ވަނީ އާދީއްތަ ދުވަހުގެ ފަތިހުގެ ވަގުތެއްގައި ކަމަށް ފުލުހުން ބުނެ އެވެ. އަދި، މި މައްސަލައާ ގުޅިގެން އަސްކަރިއްޔާގެ ގޮވާތަކެތި ނައްތާލާ ޚާއްސަ ޓީމަކުން ގިނަ އަދަދެއްގެ އުޅަނދުތަކެއް ބަލައި ފާސްކުރަމުންދާ ކަމަށް ވެސް ފުލުހުން ވަނީ ހާމަކޮށްފަ އެވެ.
އާރްއޭއެފް ފެއާފަޑް ކައިރީގައި އޮންނަ ވެލްފަޑް އަވަށުގެ ރައްޔިތުންގެ ރައްކާތެރިކަމަށް ޓަކައި، ތަހުގީގު ކުރިއަށްދާ ވަގުތު އެ މީހުން ރައްކާތެރި ހިސާބަކަށް ބަދަލުކޮށްފައިވާ ކަމަށް ރިޕޯޓުތައް ބުނެ އެވެ. އެ ސަރަހައްދު މިހާރު ފުލުހުން ބަންދުކޮށްފައިވާ އިރު، މި ހާދިސާ މިހާރު ވަނީ ކޮންޓްރޯލް ކުރެވިފައި ކަމަށް ޤަބޫލުކުރެވޭ ކަމަށް ފުލުހުންގެ އޮފިސަރުން ވަނީ ބުނެފަ އެވެ. ނަމަވެސް، ނުރައްކާތެރި ސަރަހައްދުތަކުގައި ހަރަކާތްތެރިވާ ޚާއްސަ ޓީމެއް ހިމެނޭހެން، ކުއްލި ހާލަތްތަކުގައި ހަރަކާތްތެރިވާ އިދާރާތަކުގެ ގިނަ އަދަދެއްގެ އޮފިޝަލުން އަދިވެސް ދަނީ އެ ސަރަހައްދުގައި ހަރަކާތްތެރިވަމުންނެވެ.
މި ހާދިސާއާ ގުޅޭގޮތުން ގްލޮސްޓެޝާގެ ފުލުހުން ބުނީ: "ބޮޑު ހާދިސާއެއް އިއުލާނުކުރުމާ ގުޅިގެން ވެލްފަޑް ސަރަހައްދުގެ ގިނަ ގެތަކެއް މިހާރު ދަނީ ހުސްކުރަމުން. މިއީ، ގޮވާތަކެއްޗާ ބެހޭ ގާނޫނުގެ ދަށުން ކުށްތަކަކަށް ތުހުމަތުކުރެވިގެން ގިނަ ފިރިހެނުންތަކެއް ހައްޔަރުކުރުމާ ގުޅިގެން އަޅާފައިވާ ފިޔަވަޅެއް. އަޅުގަނޑުމެން މި ދަނީ އަޅުގަނޑުމެންގެ ބައިވެރިންނާއެކު ވަރަށް ގާތުން މަސައްކަތްކުރަމުން އަދި ކަމާގުޅޭ ފިޔަވަޅުތައް ތަންފީޒުކުރަމުން."
އާރްއޭފް ފެއާފަޑް އެއާބޭސްއަކީ، އީރާނާ ދެކޮޅަށް އެމެރިކާއިން ފަށާފައިވާ ޣައިރުގާނޫނީ ހަނގުރާމައިގައި އެމެރިކާގެ އަސްކަރިއްޔާއިން ބޭނުންކުރަމުންދާ ވައިގެ ބަނދަރެކެވެ. އެ އެއާޕޯޓުގައި އެމެރިކާގެ ވައިގެ ސިފައިންގެ ގިނަ އަދަދެއްގެ ބޮންއަޅާ މަތިންދާބޯޓުތައް ތިބި ކަމަށް މަސްރަހު ދިރާސާކުރާ ފަރާތްތަކުން ބުނެ އެވެ. އީރާނަށް ހަމަލާދިނުމަށް މި ވައިގެ ބަނދަރު ބޭނުންކުރަމުންދާ ކަމަށް ވެސް އެ ފަރާތްތަކުން ބުނެ އެވެ.
މަސްދަރު: ބީބީސީ
