ހިލޭ ޖެހުމެއްގައި މެސީ ހިތްގައިމު ލަނޑެއް ޖެހި ނަމަވެސް، ފަހު ވަގުތު މިއާމީ ބަލިވެއްޖެ

މޭޖާ ލީގު ސޮކާ (އެމެރިކާ ލީގު)ގައި ކޮލަމްބަސްއާ ދެކޮޅަށް ކުޅުނު މެޗުގައި އިންޓަރ މިއާމީގެ ކެޕްޓަން ލިއޮަނަލް މެސީ ހިތްގައިމު ލަނޑެއް ޖެހިއިރު، އެ މެޗުން މިއާމީ ބަލިވެއްޖެ އެވެ.

ހޯމަ ދުވަހުގެ ހެނދުނު ކޮލަމްބަސްއާ ދެކޮޅަށް ކުޅުނު މެޗުން ފަހު ވަގުތު މިއާމީ ބަލިވީ 2-1 އިންނެވެ. މެޗުގައި ކޮލަމްބަސް އިން ލީޑު ނަގާފައި ވަނިކޮށް، މިއާމީ އިން ނަތީޖާ ހަމަހަމަ ވެސް ކުރި އެވެ. ނަމަވެސް، ފަހު ވަގުތު ލަނޑު ޖަހައިގެން ކޮލަމްބަސް ވަނީ މެޗުން މޮޅުވެފައި އެވެ.

މެޗު ފަށައިގެން 28 ވަނަ މިނެޓުގައި ކޮލަމްބަސް އަށް ލިބުނު ޕެނަލްޓީ ކާމިޔާބުކޮށް ލީޑު ނަގައިދިނީ ޖޯސެފް މާޓިނޭޒް އެވެ. ނަމަވެސް، އޭގެ ފަސް މިނެޓު ފަހުން މިއާމީ އަށް ލިބުނު ހިލޭ ޖެހުމެއްގައި މެސީ ވަނި ހިތްގައިމު ލަނޑެއް ޖަހައި އެ ޓީމަށް ނަތީޖާ ހަމަހަމަ ކޮށްދީފައި އެވެ. މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޖަމާލް ތިއާރޭ ވަނީ ކޮލަމްބަސްގެ ދެ ވަނަ ލަނޑު ޖަހައި މެޗުން މޮޅު ކޮށްދީފައި އެވެ.

މެޗުން ބަލިވެ މިއާމީ އޮތީ ތިން ވަަނައިގައި އެވެ. އެއީ މިހާތަނަށް އެ ޓީމު ކުޅެފައިވާ 27 މެޗުން 46 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް ނިއު އިންގްލެންޑަށް 46 ޕޮއިންޓު ލިބޭއިރު، އެއް ވަނައިގައި އޮތް ނަޝްވީލް އަށް ލިބެނީ 60 ޕޮއިންޓެވެ.