މިއާމީ އާއެކު ޗެމްޕިއަންސް ކަޕް ކާމިޔާބުކޮށް، މެސީ އަށް ކެރިއަރުގެ 49 ވަނަ ތަށި

އެމެރިކާގެ އިންޓަރ މިއާމީ އާއެކު ޗެމްޕިއަންސް ކަޕް ކާމިޔާބުކޮށް، ލިއޮނަލް މެސީގެ ކެރިއަރުގައި 49 ވަނަ ތަށި ކާމިޔާބުކޮށްފި އެވެ.

ބުރާސްފަތި ދުވަހުގެ ފަތިހު ކުޅުނު މެޗުގައި މިއާމީ އިން ވަނީ 2-0 އިން ކްރޫޒް އަޒުލް ބަލިކޮށްފަ އެވެ. މެޗުގެ ފުރަތަމަ ހާފުގައި މިއާމީ އިން އެއް ލަނޑު ޖެހިއިރު، އަނެއް ލަނޑު ޖެހީ ދެ ވަނަ ހާާފުގަ އެވެ.

މެޗު ފަށައިގެން 24 ވަނަ މިނެޓުގައި މިއާމީ އަށް ލީޑު ނަގައިދިނީ މެސީ އެވެ. މިއީ 2023 ވަނަ އަހަރު މިއާމީ އަށް ބަދަލުވި މެސީ އެ ކުލަބަށް ޖަހައިދިން 100 ވަނަ ލަނޑެވެ. މެސީ ވަނީ މިހާތަނަށް މިއާމީގައި 115 މެޗު ކުޅެފައި އެވެ. މެޗުގައި މިއާމީގެ ދެ ވަނަ ލަނޑު 81 ވަނަ މިނެޓުގައި ޖެހީ ކަސެމީރޯ އެވެ.

މެޗުން މޮޅުވެ މިއާމީ އިން ޗެމްޕިއަންސް ކަޕް ކާާމިޔާބުކުރިއިރު، މިއީ މެސީ މިއާމީ އާއެކު ކާމިޔާބު ކުރި ފަސް ވަނަ ތައްޓެވެ. މީގެ ކުރިން މެސީ ވަނީ މިއާމީ އާއެކު މޭޖާ ލީގު ސޮކާ ކަޕް އާއި ލީގްސް ކަޕް، އީސްޓާން ކޮންފަރެންސް އަދި ސަޕޯޓާސް ޝީލްޑު ވެސް ކާމިޔާބުކޮށްފަ އެވެ. 

އަނެއްކޮޅުން މިއީ މެސީގެ ކެރިއަރުގައި އޭނާ ކާމިޔާބު ކުރި 49 ވަނަ ތައްޓެވެ. މެސީ އަކީ ފުޓުބޯޅައިގައި މިހާތަނަށް އެންމެ ގިނަ ތަށި ކާމިޔާބުކޮށްފައިވާ ކުޅުންތެރިޔާ އެވެ. މެސީ ވަނީ ބާސެލޯނާ އާއެކު 35 ތަށި، ޕެރިސް ސެއިންޓް ޖާމަން (ޕީއެސްޖީ) އާއެކު ތިން ތަށި، އިންޓަރ މިއާމީ އާއެކު ފަސް ތަށި އަދި އާޖެންޓީނާ އާއެކު ހަ ތަށި ކާމިޔާބުކޮށްފަ އެވެ.