އިސްރާއީލުގެ ސަރުކާރާ ދެކޮޅު ހަދާ ޑިމޮކްރެޓުންގެ އަދަދު ވަރަށް ބޮޑު: ނިއުސަމް

އެމެރިކާގެ އިދިކޮޅު ޑިމޮކްރެޓިކް ޕާޓީގެ ބޮޑު އަޣުލަބިއްޔަތަކުން އިސްރާއީލުގެ މިހާރުގެ ސަރުކާރާ "ވަރަށް ބޮޑަށް ދެކޮޅު" ކަމަށް 2028 ވަނަ އަހަރު އެމެރިކާގައި ބާއްވާ ރިޔާސީ އިންތިޚާބުގައި ވާދަކުރައްވާނެ ކަމަށް ބެލެވޭ ކެލިފޯނިއާގެ ގަވަރުނަރު ގެވިން ނިއުސަމް ވިދާޅުވެއްޖެ އެވެ. އަދި، "ޑިމޮކްރެޓިކް އަދި ރައްކާތެރި" އިސްރާއީލަކާ އިންވެގެން، "ރައްކާތެރި ޑިމޮކްރެޓިކް ފަލަސްތީނުގެ ދައުލަތެއް" އޮތުމަށް އެ ޕާޓީން ބޭނުންވާ ކަމަށް ވެސް އޭނާ ވިދާޅުވި އެވެ.

ޕީބީއެސް ނިއުސް އަވާގެ އަމްނާ ނަވާޒަށް ދެއްވި އިންޓަވިއުއެއްގައި، މީގެ ކުރިން އިސްރާއީލަކީ "އެޕާތައިޑް" ނުވަތަ ނަސްލީ ތަފާތުކުރުން ގެންގުޅޭ ދައުލަތެއްގެ ގޮތުގައި ސިފަކުރެއްވުމަށްފަހު ފަހުން އެ ވާހަކަ އަނބުރާ ގެންދެވި ނިއުސަމް ވިދާޅުވީ، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ހިންގަމުންދާ ޖަރީމާތަކަށް މިއަދު މުޅި ދުނިޔެ ކަހަލަ ގޮތަކަށް ދެކޮޅު ހަދަމުންދާ ކަމަށާއި، އެއީ މިހާރު ބަހުސް ކުރަންޖެހޭ ކަމެއް ނޫން ކަމަށެވެ. އަދި، ޑިމޮކްރެޓިކް ޕާޓީގެ ބައެއް މެންބަރުން ބޭނުންކުރައްވާ ބައެއް ބަސްމަގު ސިޔާސީ ހަތިޔާރެއްގެ ގޮތުގައި ބޭނުންކުރަމުންދާ ކަން ފާހަގަކުރައްވަމުން ނިއުސަމް ވިދާޅުވީ، "އެ ކަމުގައި [އިސްރާއީލުގެ ސަރުކާރާ ދެކޮޅު ހެދުމުގައި] ޕާޓީގެ ތެރޭގައި އެއްވެސް ޚިޔާލުތަފާތުވުމެއް ނެތް،" ކަމަށެވެ.

2023 ވަނަ އަހަރުގެ އޮކްޓޫބަރު މަހު އިސްރާއީލަށް ޒިޔާރަތްކުރައްވައި، ހަމާސްގެ ޖިހާދީ ހަމަލާތަކުގައި އަސަރުކުރި އާއިލާތަކާ ބައްދަލުކުރެއްވި އެމެރިކާގެ ސިޔާސީ ބޭފުޅުންގެ ތެރޭގައި ހިމެނިވަޑައިގަންނަވާ ނިއުސަމް ވިދާޅުވީ، ބައެއް ކެންޑިޑޭޓުން ބޭނުންކުރައްވާ ބަސްމަގުގެ ބައެއް ކަންކަމަކީ ކަންބޮޑުވާންޖެހޭ ކަންތައްތަކެއް ކަމަށެވެ. އަދި، ޣައްޒާގައި އިސްރާއީލުން ހިންގަމުންދާ ނަސްލުހޭދައިގެ ގަތުލުއާންމާ ގުޅޭގޮތުން ވާހަކަފުޅު ދައްކަވަމުން، މި މައްސަލައިގައި ޑިމޮކްރެޓިކް ޕާޓީ އޮތީ އެއްގަލަކަށް އަރާފައި ކަމަށް ފާހަގަކުރައްވައި އޭނާ ވިދާޅުވީ، "އެއީ ނަސްލު ނައްތާލުމުގެ ޖަރީމާތަކެއް ކަމަށް ގަބޫލުނުކުރާ މީހުންވެސް، އެއީ އަޚްލާގީ ގޮތުން ބޮޑު ކާރިސާއެއް ކަމަށް އެންމެންވެސް އެއްބަސްވޭ،" ކަމަށެވެ.

އިސްރާއީލުން އިސްތިއުމާރު ކޮށްފައިވާ ހުޅަނގު އައްސޭރީގައި އާބާދުކޮށްފައިވާ އިސްރާއީލުގެ ޔަހޫދީ ވަޒަންވެރިން ހިންގާ އަނިޔާވެރި ޖަރީމާތަކަށާއި، ދެ ދައުލަތުގެ ހައްލަށް ނަތަންޔާހޫ ދެކޮޅު ހަދާ މައްސަލައަށް އިޝާރާތް ކުރައްވަމުން ނިއުސަމް ވިދާޅުވީ، "އަޅުގަނޑުމެން ބޭނުންވަނީ ޑިމޮކްރެޓިކް އަދި ރައްކާތެރި އިސްރާއީލެއް، އަދި ހަމަމިއާއެކު އިންވެގެން އޮންނަ ރައްކާތެރި ޑިމޮކްރެޓިކް ފަލަސްތީނުގެ ދައުލަތެއް. މިއީ ބޮޑު ޚިޔާލުތަފާތުވުމެއް އޮތް ކަމެއް ކަމަކަށް އަޅުގަނޑު ނުދެކެން،" ކަމަށެވެ.

މީގެ އިތުރުން، އިސްރާއީލާއި އިސްރާއީލުގެ ސިފައިން ހިންގަމުންދާ ލާއިންސާނީ ޖަރީމާތަކަށް ތާއީދުކުރާ އެމެރިކާގެ ނުފޫޒުގަދަ ލޮބީ ގްރޫޕެއް ކަމަށްވާ އޭޕެކްއިން (AIPAC) އެހީ ގަބޫލުކުރާ ޑިމޮކްރެޓުންގެ އަދަދު މަދުވަމުންދާ ކަމަށް ވެސް ނިއުސަމް ޕީބީއެސްއަށް ވިދާޅުވި އެވެ. "އަޅުގަނޑު ވާހަކަދައްކާ ގިނަ ޑިމޮކްރެޓުން، ކުރިން އޭޕެކްގެ ފައިސާ ގަބޫލުކުރި މީހުންވެސް ހިމެނޭހެން، މިހާރު ވަނީ އެ ފައިސާ ނުނެގުމަށް ނިންމާފައި،" އޭނާ ވިދާޅުވިއެވެ. "މިއީ މިހާރު ޑިމޮކްރެޓިކް ޕާޓީގެ ތެރޭގައި އާންމުވަމުންދާ ވިސްނުމެއްކަން ފާހަގަކުރެވޭ."

އިސްރާއީލު ދަނީ ޚާރިޖީ މައިދާނުގައި އެކަހެރިވަމުން

އިސްތިއުމާރު ކޮށްފައިވާ ހުޅަނގު އައްސޭރީގައި ގަވާއިދާ ޚިލާފަށް ހަދާފައިވާ ޔަހޫދީ އާބާދީތަކާ ދެކޮޅަށް އިނގިރޭސިވިލާތުން ދަތިކުރުމުގެ ފިޔަވަޅުތައް އެޅުމާ ގުޅިގެން، މިއީ ބައިނަލްއަގުވާމީ މުޖުތަމައުން އިސްރާއީލު އެކަހެރިކޮށް ބާކީކުރަން ނަތަންޔާހޫ ހިންގަމުންދާ އަމަލުތަކުގެ ނަތީޖާކަމަށް އިސްރާއީލުގެ އިދިކޮޅު ސިޔާސީން ދަނީ ބުނަމުންނެވެ. އަދި، އެ ފަރާތްތަކުން ދަނީ ނަތަންޔާހޫގެ ސަރުކާރަށް އޮތް ނަފުރަތު ފާޅުކުރަމުންނެވެ.

އިސްރާއީލުގެ ކުރީގެ ބޮޑުވަޒީރު ޔައިރު ލަޕީދު ބުނީ، ވަޒަންވެރިންނާ ދެކޮޅަށް ފިޔަވަޅު އެޅުމަށް އިނގިރޭސިވިލާތުން ނިންމި ނިންމުމަކީ "ނުރަނގަޅު" ނިންމުމެއް ކަމަށެވެ. ނަމަވެސް، އޭނާގެ ފާޑުކިޔުން ނަތަންޔާހޫގެ ސަރުކާރަށް އަމާޒުކުރަމުން އޭނާ ބުނީ، "މީގެ ކުރިން ދުވަހަކުވެސް ކުރިމަތިނުވާ ފަދަ ޚާރިޖީ އެކަހެރިކަމަކަށް" އިސްރާއީލު ކުރިމަތިލާންޖެހިފައި ވަނީ ނަތަންޔާހޫގެ ސަބަބުން ކަމަށެވެ. އަދި، ނަތަންޔާހޫގެ ސަރުކާރުން އަމާޒުކުރަމުންދާ މަލާމާތްތައް ބައިނަލްއަގްވާމީ މުޖުތަމައުން ބަލައިނުގަންނަ ކަމަށް ވެސް އޭނާ ބުންޏެވެ.

ހަމަމިއާއެކު، އިސްރާއީލުގެ ގާނޫނުހަދާ ކްނެސެޓުގައި ވާތުފިޔައިގެ ޑިމޮކްރެޓްސް ޕާޓީ ތަމްސީލުކުރާ ގިލާޑް ކަރީވް ވެސް ވަނީ އިސްތިއުމާރު ކޮށްފައިވާ ހުޅަނގު އައްސޭރީގައި ފަލަސްތީނުގެ ބިންތައް އިސްރާއީލުން އަތުލަމުންދާ މައްސަލައަށް އިޝާރާތްކޮށް، މި ފިޔަވަޅުތަކުގެ ޒިންމާ އިސްރާއީލުގެ ހަރުކަށި ކަނާތުފިޔައިގެ ސަރުކާރުން އުފުލަންޖެހޭނެ ކަމަށް ބުނެފަ އެވެ. ކަރީވް ބުނީ، ނަތަންޔާހޫގެ ޖަރީމާތަކުގެ ސަބަބުން އިސްރާއީލު "ބައިނަލްއަގުވާމީ އެކަހެރިކަމަކަށް" މިސްރާބު ޖަހާފައިވާ ކަމަށާއި، ދުނިޔޭގެ މަސްރަހުގައި ނަތަންޔާހޫއަކީ މިހާރު އެކަކުވެސް ގާތްވާން ބޭނުންނުވާ "ޖުޒާމް ބަލިޖެހިފައިވާ" ފަދަ މީހަކަށް ވެފައިވާ ކަމަށެވެ. އަދި، ނަތަންޔާހޫގެ ހަރުކަށި އިއްތިހާދު ސަރުކާރަށް އިޝާރާތްކޮށް  ކަރީވް ބުނީ، "ގައުމީ ހަރުކަށި ފިކުރުގެ މީހުންނާއެކު ނަތަންޔާހޫ ހަދާފައިވާ ކޮރަޕްޓް އިއްތިހާދުގެ އަގު އިސްރާއީލުގެ ރައްޔިތުން ދައްކަންޖެހިގެން ނުވާނެ" ކަމަށެވެ.

އިސްރާއީލުގެ ކުރީގެ އެޓާނީ ޖެނެރަލް މައިކަލް ބެން-ޔައިރު ވެސް ވަނީ، އިނގިރޭސިވިލާތުން އިސްރާއީލާ ދެކޮޅަށް އަޅާފައިވާ ފިޔަވަޅުތަކަށް މަރުހަބާ ކިޔާފަ އެވެ. އޭނާ ބުނީ، އިސްރާއީލުގެ ބައިވެރިއަކު އަޅާ ފިޔަވަޅަކަށް އުފާނުވި ނަމަވެސް، މިއީ މުހިންމު ފިޔަވަޅެއް ކަމަށެވެ. "މެޑިޓެރޭނިއަން ކަނޑާއި އުރުދުން ކޯރާ ދެމެދު ދިރިއުޅޭ ހަތް މިލިއަން ޔަހޫދީންނާއި ހަތް މިލިއަން ފަލަސްތީނު މީހުންނަށް ސުލްހައާއި ރައްކާތެރިކަން" ލިބޭނެ ސިޔާސީ ހައްލެއް ދެމެހެއްޓުމަށް ޓަކައި، އިނގިރޭސިވިލާތުން އަޅާފައި ވަނީ ވަރަށް ބޭނުންތެރި ފިޔަވަޅުތަކެއް ކަމަށް އޭނާ ބުންޏެވެ. އަދި، މި ފިޔަވަޅުތަކުގެ ސަބަބުން ދައުލަތެއްގެ ގޮތުގައި އިސްރާއީލުގެ ގާނޫނީ ސައްހަކަމާއި، ފަލަސްތީނުގެ ބިންތަކަށް ވެރިވެގަނެގެން އުޅޭ އުޅުން ވަކިކޮށްދޭ ކަމަށް ވެސް އޭނާ ބުންޏެވެ. އަދި، ފަލަސްތީނުގެ ބިންތައް އިސްތިއުމާރު ކުރުމަކީ "އަޚްލާގީ، ސިޔާސީ އަދި ގާނޫނީ ގޮތުން ބަލައިގަނެވޭނެ ކަމެއް ނޫން" ކަމަށް ވެސް އޭނާ ބުންޏެވެ.

އޭނާ މިހެން ބުނެފައި މި ވަނީ، އިސްރާއީލުން އިސްތިއުމާރު ކޮށްފައިވާ ފަލަސްތީނުގެ ބިންތަކުގައި ދިރިއުޅޭ އިސްރާއީލުގެ ވަޒަންވެރިންނާ ދެކޮޅަށް ދަތިކުރުމުގެ ފިޔަވަޅު އަޅާނެކަން އިނގިރޭސިވިލާތުގެ ޚާރިޖީ ވަޒީރު އެޑް މިލިބެންޑް އިއުލާން ކުރެއްވުމާ ގުޅިގެން، އިނގިރޭސިވިލާތާ ދެކޮޅަށް ބަދަލުހިފުމުގެ ފިޔަވަޅުތަކެއް އަޅާނެކަން އިސްރާއީލުން އިއުލާންކޮށްފައިވާ ދަނޑިވަޅެއްގަ އެވެ. މިލިބެންޑް ވިދާޅުވީ، އިންސާފެއް ނެތް އަމަލުތަކާއި ފަލަސްތީނުގެ ރައްޔިތުން ތަހައްމަލު ކުރަމުންދާ އަނިޔާތަކާ ދެކޮޅަށް ހަމައެކަނި ބަހެއް ބުނެލައިގެން އިނގިރޭސިވިލާތުގެ ސަރުކާރަށް ދެން ނޯވެވޭނެ ކަމަށާއި، އިސްރާއީލުގެ އާބާދީތައް ފުޅާކުރުމާ ދެކޮޅަށް އަމަލީ ގޮތުން މަސައްކަތް ކުރަންޖެހޭ ކަމަށެވެ. އަދި "މިއަދު އަޅުގަނޑުމެން މި ނިންމީ، އިތުރު އަނިޔާތަކާއި ދެ ދައުލަތުގެ ހައްލު ހަލާކުވެގެންދާއިރު ބަލަން ނުތިބުމަށް،" ކަމަށް ވެސް އޭނާ ވިދާޅުވި އެވެ. އިނގިރޭސިވިލާތުގެ ސަރުކާރުން ނިންމާފައި ވަނީ، އިސްރާއީލުން އިސްތިއުމާރު ކޮށްފައިވާ ފަލަސްތީނުގެ ބިންތަކުގައި އުފައްދާ މުދާ އިނގިރޭސިވިލާތަށް އެތެރެ ކުރުން ހުއްޓާލުމަށެވެ.