އިސްރާއީލުން ދަނީ ފަލަސްތީނުގެ ނަސްލު ނައްތާލަމުން: އިނގިރޭސިވިލާތް

އިސްރާއީލުން އިސްތިއުމާރު ކޮށްފައިވާ ފަލަސްތީނުގެ ހުޅަނގު އައްސޭރީގައި ފަލަސްތީނުގެ ރައްޔިތުންގެ ނަސްލު ނައްތާލުމަށް ނަސްލުހޭދެއް ނުވަތަ "އެތުނިކް ކްލެންސިން" ހިންގަމުންދާ ކަމަށް އިނގިރޭސިވިލާތުގެ ސަރުކާރުން ފުރަތަމަ ފަހަރަށް ހާމަކޮށްފި އެވެ. މީގެ އިތުރުން، ފަލަސްތީނުގެ ބިންތަކަށް އިސްރާއީލުން ވެރިވެގަނެގެން ތިބުމަކީ ޣައިރު ގާނޫނީ ކަމެއް ކަމަށް އިނގިރޭސިވިލާތުން ވަނީ ކަނޑައަޅާފަ އެވެ. އަދި، ޣައިރު ގާނޫނީ ވަޒަންވެރިންނާ ދެކޮޅަށް ދަތިކުރުމުގެ ފިޔަވަޅުތަކެއް އަޅައި، އިސްތިއުމާރަށް އެހީތެރިވެދޭ ހުރިހާ ބާވަތެއްގެ ހަތިޔާރާއި ތަކެތި އެކްސްޕޯޓްކުރުން މަނާކުރާނެ ކަން ވެސް ވަނީ އިއުލާންކޮށްފަ އެވެ. މިއާ ގުޅިގެން، ފަރަންސޭސިވިލާތާއި ކެނެޑާއިން ވެސް ވަނީ އިސްރާއީލުން އަތްގަދަ ކޮށްފައިވާ ފަލަސްތީނުގެ ބިންތަކުގައި އުފައްދާ މުދާ އެ ގައުމުތަަކަށް އެތެރެކުރުން މަނާކުރާނެ ކަން ހާމަކޮށްފަ އެވެ.

އަންގާރަ ދުވަހުގެ އިނގިރޭސިވިލާތުގެ ގާނޫނުހަދާ މަޖިލީހުގައި ވާހަކަފުޅު ދައްކަވަމުން އިނގިރޭސިވިލާތުގެ ޚާރިޖީ ވަޒީރު އެޑް މިލިބެންޑް ވިދާޅުވީ، އިސްރާއީލުން އެ ސަރަހައްދުތަކުގައި ބާރު ގަދަކޮށް، ދާއިމީ ސިޔާދަތެއް ގާއިމުކުރުމަށް ކުރާ މަސައްކަތް އިނގިރޭސިވިލާތުން ބަލައިނުގަންނަ ކަމަށެވެ. އަދި، ޣައިރު ގާނޫނީ ވަޒަންވެރިން މެދުވެރިކޮށް އިތުރު ބިންތައް ފޭރިގަތުމުގެ ސިޔާސަތުގެ ސަބަބުން، އިސްރާއީލުގެ އިސްތިއުމާރަކީ ޣައިރު ގާނޫނީ ކަމެއް ކަމަށް އިނގިރޭސިވިލާތުގެ ސަރުކާރުން ރަސްމީކޮށް ބަލައިގަންނަ ކަމަށް އޭނާ ވިދާޅުވި އެވެ. މިއީ ބައިނަލްއަގުވާމީ އަދުލުގެ ކޯޓުން (އައިސީޖޭ) 2024 ވަނަ އަހަރު ނެރުނު އިސްތިޝާރީ ލަފާ އިނގިރޭސިވިލާތުން ބަލައިގަތުމެވެ. އެ ލަފާގައި ވަނީ އިސްރާއީލުގެ އިސްތިއުމާރަކީ ޣައިރު ގާނޫނީ ކަމެއް ކަމަށާއި، އެ ކަމާ ދެކޮޅަށް މަސައްކަތް ކުރުމަކީ ހުރިހާ ދައުލަތްތަކެއްގެ ވާޖިބެއް ކަމަށް ބަޔާންކޮށްފަ އެވެ.

ހުޅަނގު އައްސޭރީގެ ބައެއް ސަރަހައްދުތަކުގައި އިސްރާއީލުގެ ސިފައިންނާއި ހަރުކަށި ވަޒަންވެރިން ފަލަސްތީނުގެ ރައްޔިތުންގެ ނަސްލު ނައްތާލަން ހިންގާ ލާއިންސާނީ އަމަލުތަކަކީ "އެތުނިކް ކްލެންސިން" ކަމަށް އިނގިރޭސިވިލާތުގެ ސަރުކާރުން ގަބޫލުކުރާ ކަމަށް މިލިބެންޑް ވިދާޅުވި އެވެ. އަދި، އިސްރާއީލު ސަރުކާރުގެ ބައެއް މެންބަރުން ފަލަސްތީނުގެ ރައްޔިތުން ގަދަބާރުން އެ މީހުންގެ ބިމުން ބާލަން ބާރުއަޅަމުންދާ ކަން އޭނާ ފާހަގަކުރެއްވި އެވެ. "އިސްރާއީލުން ޣައިރުގާނޫނީ ގޮތުން އިސްތިއުމާރު ކޮށްފައިވާ ބިންތަކުގައި އުފައްދާ މުދާ އަޅުގަނޑުމެންގެ ފިހާރަތަކާއި ސުޕަމާކެޓްތަކުން ލިބެން ހުރުމަކީ، އިނގިރޭސިވިލާތުގެ ރައްޔިތުން އެދޭނެ ކަމެއް ކަމަށް އަޅުގަނޑު ގަބޫލެއް ނުކުރަން. އެހެންކަމުން، އިސްތިއުމާރު ކޮށްފައިވާ ބިންތަކުގައި ހަދާފައިވާ ޣައިރުގާނޫނީ އާބާދުތަކުން އުފައްދާ މުދާ އިނގިރޭސިވިލާތަށް އެތެރެކުރުން މަނާކުރަން ނިންމައިފިން،" މިލިބެންޑް ރަސްމީކޮށް އިޢުލާނު ކުރެއްވި އެވެ.

ދީނީ ކަންކަމަށް ބައެއް އިސްތިސްނާތައް ދިން ނަމަވެސް، އިމާރާތްކުރުމާއި، އިންފްރާސްޓްރަކްޗާ ފައިނޭންސް ކުރުމާއި، ރިއަލް އެސްޓޭޓްގެ ޚިދުމަތްދޭ ކުންފުނިތަކާއި ފަރުދުންނާ ދެކޮޅަށް ދަތިކުރުމުގެ ފިޔަވަޅު އަޅާނެ ކަމަށް މިލިބެންޑް ވިދާޅުވި އެވެ. "ޣައިރުގާނޫނީ ވަޒަންވެރިންނަށް ފައިސާދޭ ނުވަތަ އެހީތެރިވެދޭ ފަރާތްތަކަށް ބުނެލަން އޮތީ، އިނގިރޭސިވިލާތުގެ ދަތިކުރުމުގެ ފިޔަވަޅުތަކުގެ އެންމެ ހަރުކަށި އަދަބު ތިޔަ ފަރާތްތަކަށް ލިބޭނެއޭ. އިސްތިއުމާރު ކޮށްފައިވާ ބިންތަކަކީ ޣައިރުގާނޫނީ ތަންތަން. އެ ކަންކަމަށް އަޅުގަނޑުމެންގެ ގައުމުގައި ހިތްވަރުދީގެން ނުވާނެ،" މިލިބެންޑް ވިދާޅުވި އެވެ. މީގެ އިތުރުން، އިނގިރޭސިވިލާތާއެކު ކެނެޑާ، ޑެންމާކް، ފިންލޭންޑް، ފަރަންސޭސިވިލާތް، އައިސްލެންޑް، އަޔަލެންޑް، ނޯވޭ، ޕޮލެންޑް، ޕޯޗުގަލް، ސްޕެއިން އަދި ސްވިޑަން ހިމެނޭހެން 11 ގައުމަކުން ވަނީ ގުޅިފައިވާ ބަޔާނެއް ނެރެ، އިސްރާއީލުން އިސްތިއުމާރު ކޮށްފައިވާ ފަލަސްތީނުގެ ބިންތަކުގައި އުފައްދާ މުދާ އެ ގައުމުތަކަށް އެތެރެކުރުން މަނާކުރުމަށް ގަސްދުކުރާ ކަމަށް ބުނެފަ އެވެ.

ޣައްޒާގައި ހަނގުރާމައިގެ ކުށްތައް ހިންގާ ކަމުގެ ހެކިތައް އިތުރުވަމުންދާއިރު، އިސްރާއީލަށް ދޫކޮށްފައިވާ 30 އަށް ވުރެ ގިނަ ހަތިޔާރުގެ ލައިސަންސް ސަސްޕެންޑްކޮށްފައިވާ ނިންމުން ދެމިއޮންނާނެ ކަމަށް ވެސް މިލިބެންޑް ވިދާޅުވި އެވެ. "އިސްތިއުމާރަށް އެހީތެރިވެދޭ ހުރިހާ ބާވަތެއްގެ ހަތިޔާރާއި އެހެނިހެން ތަކެތި އެކްސްޕޯޓްކުރުމަށް އެދޭ ލައިސަންސްތައް ދެން ދޫނުކުރާނަން. މިއީ ހަތިޔާރު ވިއްކުން ހުއްޓުވުމަށް އެޅޭ 'ޑަބަލް ލޮކް' އެއް،" އޭނާ ވިދާޅުވި އެވެ. ނަމަވެސް، އިސްރާއީލުން ފަލަސްތީނުގެ ރައްޔިތުންނާ ދެކޮޅަށް ގަތުލުއާންމެއް ހިންގާ ކަމަށް ސީދާ ތުހުމަތުކުރުމުން އޭނާ ދުރުހެލިވެވަޑައިގެންނެވި އެވެ. މި މައްސަލައިގައި އޭނާ ވިދާޅުވީ، "މި މައްސަލަ އައިސީޖޭއަށް ހުށަހެޅުމަކީ ރަނގަޅު ކަމެއް. އަދި، އެ ކޯޓުން ނިންމާ ނިންމުމަކަށް އަޅުގަނޑުމެން ތާއީދުކުރާނެކަން ސާފުކޮށްދޭން ބޭނުން،" ކަމަށެވެ. ވައިޓްހޯލްގެ މަސްދަރުތަކުން ބުނާ ގޮތުގައި މިއީ އިނގިރޭސިވިލާތުގެ ސިޔާސަތަށް ގެންނަމުންދާ އާ ބަދަލެއްގެ ފެށުމެކެވެ.

އިނގިރޭސިވިލާތުގެ ބޮޑުވަޒީރު އެންޑީ ބަރނަމްގެ ސަރުކާރުން އިސްރާއީލުން އިސްތިއުމާރު ކޮށްފައިވާ ބިންތަކުގައި އުފައްދާ މުދާ އިނގިރޭސިވިލާތަށް އެތެރެ ކުރުން މަނާކުރަން ނިންމާފައިވާކަން މިދިޔަ އޮގަސްޓް މަހު އެންމެ ފުރަތަމަ ހާމަކުރީ މިޑްލް އީސްޓް އައިއިންނެވެ. ޖުލައި މަހު ބޮޑުވަޒީރުކަމާ ހަވާލުވެވަޑައިގަތް ފަހުން ބަރނަމް، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާ ވާހަކަފުޅު ދައްކަވާފައެއް ނުވެ އެވެ. އަދި، މި ފިޔަވަޅުތަކާ ގުޅޭގޮތުން އޭނާ ވަނީ އެމެރިކާގެ ރައީސް ޑޮނަލްޑް ޓްރަމްޕަށް މައުލޫމާތު ދެއްވާފަ އެވެ. އެމެރިކާއިން މި ފިޔަވަޅުތައް ނޭޅުމަށް ސިއްރިއްޔާތުގައި ބާރުއެޅި ނަމަވެސް، އިނގިރޭސިވިލާތުން ނިންމީ ކުރިއަށް ދިއުމަށެވެ. އަދި ފަރަންސޭސިވިލާތާއި ކެނެޑާއިން ވެސް މި ފަދަ ފިޔަވަޅުތައް އެޅުމުން އިނގިރޭސިވިލާތުގެ ނިންމުމުގެ ބާރު ގަދަވި އެވެ. މިއީ، އެމެރިކާގެ އެންމެ ގާތް ތިން ބައިވެރިން ގުޅިގެން، އެ ގައުމުގެ މެދުއިރުމަތީގެ ސިޔާސަތުތަކަށް ދިން ވަރުގަދަ ރައްދެކެވެ.

އިންޓަނޭޝަނަލް ސެންޓަރ އޮފް ޖަސްޓިސް ފޯ ޕަލެސްޓީނިއަންސްގެ ޑައިރެކްޓަރު ތައްޔަބް އަލީ ވިދާޅުވީ، މިއީ އިނގިރޭސިވިލާތުގެ ސިޔާސަތަށް އައި ބޮޑު ބަދަލެއް ކަމަށާއި، މި ކަމުގެ ކްރެޑިޓް މިލިބެންޑަށް ހައްގުވާ ކަމަށެވެ. "ސަރުކާރުން މިހާރު ވަނީ އިސްތިއުމާރަކީ މުޅި އެކަމުގައި ވެސް ޣައިރުގާނޫނީ ކަމެއް ކަމަށް ގަބޫލުކޮށްފައި. އަދި ހަމައެކަނި އާބާދުތަކުގެ މުދަލަށްވުރެ ފުޅާކޮށް، ޚިދުމަތްތަކާއި ފައިނޭންސް ކުރުމާއި، އާބާދުތައް ފުޅާކުރަން އެހީވާ ފަރާތްތަކާ ދެކޮޅަށް ފިޔަވަޅު އެޅުމަށް ވަނީ ނިންމާފައި،" އޭނާ ވިދާޅުވިއެވެ. މި ފިޔަވަޅުތައް ތަންފީޒުކުރާ ގޮތް ވަރަށް ގާތުން ބަލަންޖެހޭ ކަމަށާއި، ކުންފުނިތަކަށާއި މާލީ އިދާރާތަކަށް މީގެ ތެރެއިން ރެކިގަނެވޭނެ އެއްވެސް ފުރުސަތެއް އޮވެގެން ނުވާނެ ކަމަށް ވެސް އޭނާ ވިދާޅުވި އެވެ.

ކައުންސިލް ފޯ އަރަބް-ބްރިޓިޝް އަންޑަސްޓޭންޑިންގްގެ ޑައިރެކްޓަރު ކްރިސް ޑޮއިލް ސިފަކުރެއްވި ގޮތުގައި، މިއީ އިސްރާއީލަށް ދެވުނު "ދެން މިކަން ހުއްޓާލަން ވެއްޖެ" ކަމުގެ ވަރުގަދަ ސިގްނަލެކެވެ. ލޭބަރ މުސްލިމް ނެޓްވޯކުން ވެސް މި ނިންމުމަށް މަރުހަބާ ކިޔާފައިވާއިރު، އޮޕީނިއަމްގެ ސާވޭއަކުން ދައްކާ ގޮތުގައި، އިނގިރޭސިވިލާތުގެ 46 އިންސައްތަ މީހުން މި ފިޔަވަޅުތަކަށް ތާއީދުކުރެ އެވެ. އަދި ދެކޮޅު ހަދަނީ އެންމެ 18 އިންސައްތަ މީހުންނެވެ. މި ފިޔަވަޅުތައް މި އެޅުނީ ޤުދުސްގެ އިރުމަތީގައި 'E1' ގެ ނަމުގައި މަޝްރޫއެއް ހިންގާ، ހުޅަނގު އައްސޭރި ދެބައިކޮށްލަން އިސްރާއީލުން މަސައްކަތް ފަށާފައިވާ ދަނޑިވަޅެއްގަ އެވެ. ޕަލެސްޓައިން ސޮލިޑަރިޓީ ކެމްޕޭންގެ ކުރީގެ ޑައިރެކްޓަރު ބެން ޖަމާލާއި، ގާނޫނުހަދާ މަޖިލީހުގެ މެންބަރު އެލިސްޓެއާ ކާމައިކަލް އަދި އދ. ގެ ސްޕެޝަލް ރެޕޯޓާ ފްރަންޗެސްކާ އަލްބަނޭޒޭ ވެސް ވަނީ މިއީ މުހިންމު ފިޔަވަޅެއް ކަމަށް ވިދާޅުވެފަ އެވެ. ނަމަވެސް، އިސްރާއީލުގެ ޚާރިޖީ ވަޒީރު ގިޑިއޮން ސާރް ވަނީ އިނގިރޭސިވިލާތާ ދެކޮޅަށް ފިޔަވަޅު އަޅާނެ ކަމަށް ބުނެ އިންޒާރު ދީފަ އެވެ.