އަމިއްލަ ކަމެއްގައި ގްރެގޯރިއޯ ކުލަބު ދޫކޮށްލުމުން، އޮޑިން އައު ކޯޗެއް ހަމަޖައްސައިފި

މި ސީޒަންގައި އޮޑި ސްޕޯޓްސް ކުލަބާ ހަވާލުވި ޕޯޗުގަލްގެ ރުއީ ގްރެގޯރިއޯ އަމިއްލަ ކަމެއްގައި އެ ކުލަބު ދޫކޮށްލުމުން، އޮޑިން އައު ކޯޗެއް ހަމަޖައްސައިފި އެވެ.

އޮޑިން ބުނެފައި ވަނީ ޕޯޗުގަލްގެ ގްރެގޯރިއޯ އަމިއްލަ ކަމެއްގައި ކުލަބު ދޫކޮށްލަން ބޭނުންވާ ވާހަކަ ބުނުމުން، އޭނާ އާއެކު މަޝްވަރާކުރުމަށް ފަަހު އެއްބަސްވުން އުވާލާފައިވާ ކަމަށެވެ. އަދި ގްރެގޯރިއޯ އެނބުރި ޕޯޗުގަލް އަށް ގޮސްފައިވާ ކަމަށް އޮޑިން ބުނެފައިވެ އެވެ.

އެއާއެކު އޮޑިން ބުނީ އެ ކުލަބުގެ އައު ކޯޗަކަށް އާޖެންޓީނާގެ ލޫޝިއާނޯ ތެއިލާ ހަމަޖައްސާފައިވާކަން ހާމަކޮށްފަ އެވެ. އުމުރުން 45 އަހަރުފެ ތެއިލާ އަކީ މީގެ ކުރިން ރާއްޖޭގެ ވިކްޓަރީ ސްޕޯޓްސް ކުލަބަށް ކުޅެފަ އެވެ. އޭނާ އަކީ ދެކުނު އެފްރިކާގެ ޕްރޯ ލައިންސަންސް އާއި ޔުއެފާ ޕްރޯ ލައިސަންސް ހާސިލުކޮށްފައިވާ ކޯޗެކެވެ. 

ތެއިލާ އޭނާގެ ކޯޗިން ކެރިއަރު ފަށާފައިވަނީ 2013 ވަނަ އަހަރު އެވެ. އެންމެ ފުރަތަމަ އޭނާ މަސައްކަތްކޮށްފައި ވަނީ އާޖެންޓީނާގެ ކުލަބު ސްޕޯޓިވޯ ބެލްގްރާނޯގެ އެސިސްޓެންޓު ކޯޗެއްގެ ގޮތުގަ އެވެ. އޭގެ ފަހުން އޭނާ ވަނީ ތަފާތު އެކި އެކި ކުލަބުތަކުގައި މަސައްކަތްކޮށްފަ އެވެ. ގިނައިން އާޖެންޓީނާގެ ކުލަބުތަކުގައި މަސައްކަތްކޮށްފައިވާ ތެއިލާ އެންމެ ފަހުން މަސައްކަތް ކުރީ، އިސްރާއީލްގެ މެކަބީ ހައިފާގެ އެސިސްޓެންޓް ކޯޗުގެ ގޮތުގަ އެވެ. ތެއިލާ ވަނީ ޔުއެފާ ކޮންފަރެންސް ލީގުގައި މެކަބީ ހައިފާ ކުޅުނުއިރު، އެ ޓީމުގެ ކޯޗިން ޓީމުގައި ވެސް ހިމެނިފަ އެވެ. 

ކުޅުންތެރިޔެއްގެ ގޮތުގައި ވެސް ގިނަ ތަޖުރިބާތަކެއް ހާސިލުކޮށްފައިވާ ތެއިލާ އޭނާގެ ކެރިއަރު ފެށީ، 1997 ވަނަ އަހަރު އާޖެންޓީނާގެ ކުލަބު ރެނާޓޯ ސެސަރިނީ އިންނެވެ. އޭގެ ފަހުން އޭނާ ވަނީ ބޮލީވިއާ، ސީރިއާ، ރާއްޖެ، ލުބުނާން، އިންޑޮނޭޝިއާ އަދި ބަންގްލަދޭޝްގައި ވެސް ކުޅެފަ އެވެ. 

ތެއިލާގެ އިރުޝާދުގެ ދަށުން އޮޑިން ކުޅޭ ފުރަތަމަ މެޗަކަށް ވާނީ ދިވެހި ޕްރިމިއާ ލީގުގައި ގދ. ގައްދޫއާ ދެކޮޅަށް ކުޅޭ މެޗެވެ. އިންޓަނޭޝަނަލް ބްރޭކަށް ފަހު ލީގުގެ ކުޅުން ފަށާއިރު، އެ މެޗު އޮތީ އޮކްޓޫބަރު މަހުގެ ނުވަ ވަނަ ދުވަހު އެވެ.