އޮޑި އަށް ގެނައި ރެއާލް އަށް ކުޅުނު ރޮޑްރިގޭޒް، ކުލަބު ދޫކޮށް ގޮސްފި
2 ސެޕްޓެމްބަރު 2026 | ބުދަ 06:35އަންގާރަ ދުވަހުގެރޭ ރޮޑްރިގޭޒް ވަނީ އޭނާގެ ސޯޝަލް މީޑިއާ މެދުވެރިކޮށް އޭނާ އެނބުރި ޤައުމަަށް ދާން ނިންމާފައިވާ ކަމަށް ބުނެފައި. އަދި އޭނާ ވަނީ މިހާރު އެނބުރި ޤައުމަށް ގޮސްފައި
އޮޑިއާ ގުޅެން ރާއްޖެ އައި ރެއާލްގެ ކުރީގެ ކުޅުންތެރިޔާ ރޮޑްރިގޭޒް | އޮޑި ސްޕޯޓްސް ކުލަބު
އައު ސީޒަނަށް ތައްޔާރުވުމުގެ ގޮތުން ރާއްޖޭގެ އޮޑި ސްޕޯޓްސް ކުލަބަށް ގެނައި ހޯސޭ ރޮޑްރިގޭޒް ކުލަބު ދޫކޮށް ގޮސްފި އެވެ.
ރެއާލްގެ ކޯޗުކަމުގައި މީގެ ކުރިން ހޯސޭ މޮރީނިއޯ ހުރި ދުވަސްވަރު، ރޮޑްރިގޭޒް ވަނީ އެ ކުލަބުގައި ކުޅެފަ އެވެ. އޭނާ ވަނީ ސްޕެނިޝް ލީގުގެ އިތުރުން، ޔުއެފާ ޗެމްޕިއަންސް ލީގުގައި ވެސް ރެއާލް އަށް ކުޅެފަ އެވެ.
އުމުރުން 31 އަހަރުގެ ރޮޑްރިގޭޒް ރާއްޖޭގެ އޮޑިއާ ގުޅެން އުޅޭކަމުގެ އަޑުތަކެއް މީގެ ކުރިން ސޯޝަލް މީޑިއާގައި އޮތީ ފެތުރިފަ އެވެ. އެ އަޑުތައް ފެތުރިފައި ވަނިކޮށް، މީގެ ދުވަސްކޮޅެއް ކުރިން ރޮޑްރިގޭޒް ރާއްޖެ އައިސްފައިވާއިރު، އޮޑިން ވަނީ އޭނާ އެ ކުލަބާ ގުޅޭ ކަމަށް ސޯޝަލް މީޑިއާގައި ވެސް އިއުލާނު ކޮށްފަ އެވެ.
ނަމަވެސް، އަންގާރަ ދުވަހުގެރޭ ރޮޑްރިގޭޒް ވަނީ އޭނާގެ ސޯޝަލް މީޑިއާ މެދުވެރިކޮށް އޭނާ އެނބުރި ޤައުމަަށް ދާން ނިންމާފައިވާ ކަމަށް ބުނެފަ އެވެ. އަދި އޭނާ ވަނީ މިހާރު އެނބުރި ޤައުމަށް ގޮސްފަ އެވެ. ރޮޑްރިގޭޒްގެ އިންސްޓަގްރާމް ސްޓޯރީގައި ކޮށްފައިވާ ޕޯސްޓެއްގައި އޭނާ ބުނެފައި ވަނީ، އޭނާ އަށް ކުރި އިތުބާރާއި އޭނާއާ މެދު ބެހެއްޓި މެހުމާާންދާރީ އަށް އޮޑި އަށް ޝުކުރު އަދާކުރާ ކަމަށެވެ.
ރޮޑްރިގޭޒް އޭނާގެ އިންސްޓަގްރާމް ސްޓޯރީގައި ކޮށްފައިވާ ޕޯސްޓު | ސޯޝަލް މީޑިއާ
ރޮޑްރިގޭޒް ބުނީ އޮޑި އާއެކު ކުރިއަށް ނުދާން އޭނާ ނިންމާފައިވާ ކަމަށާއި، އެއީ އޭނާ ނަގަން ޖެހޭ ފިޔަވަޅު ނޫން ކަމަށް ޤަބޫލު ކުރާ ކަމަށެވެ. އޮޑިއާ ނުގުޅެ އެނބުރި ދާން ނިންމުމަކީ އޭނާ އަށް ވަރަށް އުނދަގޫވި ނިންމުމެއްކަން ފާހަގަކޮށް ރޮޑްރިގޭޒް ބުނީ، އެއީ އޭނާ އަށް އެންމެ ރަނގަޅު ޗޮއިސް ކަމަށެވެ.
އޮޑިއާ ނުގުޅެ ރޮޑްރިގޭޒް އެނބުރި ޤައުމަށް ދިޔަ ނަމަވެސް، އެ ނިންމުން ނިންމަން ޖެހުނު ސަބަބެއް އޭނާ ހާމަކޮށްފައި ނުވެ އެވެ. އަދި މިކަމުގައި އޮޑިން ވެސް ވަކި އެއްޗެއް ބުނެފައި ނުވެ އެވެ. އޮޑިއާ ގުޅެން ރޮޑްރިގޭޒް ރާއްޖެ އައި ނަމަވެސް، އެ ކުލަބުގައި އެއްބަސްވުމުގައި އޭނާ ސޮއިކޮށްފައި ނުވާ ކަމުގެ މައުލޫމާތު ލިބިފައިވެ އެވެ.
