ނިއު ރޭޑިއަންޓްގެ އެސިސްޓެންޓް ކޯޗަށް ސެޒެއިރު ހަމަލާ ދިން މައްސަލަ ފުލުހުން ބަލަން ފަށައިފި
22 ސެޕްޓެމްބަރު 2026 | އަންގާރަ 06:22މި މައްސަލައާ ގުޅިގެން ފުލުހުން ބުނީ، އެ މެޗުގައި މާރާމާރީ ހިންގި މައްސަލަ އެ އިދާރާ އަށް ހުށަހަޅާފައިވާ ކަމަށް. ނަމަވެސް، އެ މައްސަލަ ހުށަހެޅީ ކޮން ފަރާތަކުން ކަމެއް ފުލުހުން ބުނެފައި ނުވޭ
މާޒިޔާގެ އެސިސްޓެންޓް ކޯޗު ސުޒެއިރު | އިމޭޖަސް.އެމްވީ
މާޒިޔާ ސްޕޯޓްސް އެންޑް ރެކްރިއޭޝަންގެ އެސިސްޓެންޓް ކޯޗު އަޙުމަދު ސުޒެއިރު، ނިއު ރޭޑިއަންޓް ސްޕޯޓްސް ކުލަބުގެ އެސިސްޓެންޓް ކޯޗު ލޫޝިއާނޯ ސިގޭރާ ބާބޯސާ އަށް ހަމަލާ ދިން މައްސަލަ ދިވެހި ފުލުހުންގެ ޚިދުމަތުގެ ފަރާތުން ތަހުގީގު ކުރަން ފަށައިފި އެވެ.
ދިވެހި ޕްްރިމިއާ ލީގުގައި ނިއު ރޭޑިއަންޓް އާއި މާޒިޔާ ބައްދަލު ކުރި މެޗުގައި ހިނގައިދިޔަ ކަމެއްގެ ސަބަބުން ދެ ޓީމުގެ ކުޅުންތެރިންނާއި އޮފިޝަލުންގެ މެދުގައި ވަނީ ހަމަނުޖެހުން ހިނގައިފަ އެވެ. އެކަމުގެ ތެރޭގައި މާޒިޔާ އެސިސްޓެންޓް ކޯޗު ސުޒެއިރު ވަނީ، ނިއު ރޭޑިއަންޓުގެ އެސިސްޓެންޓް ކޯޗު ލޫޝިއާނޯގެ މޫނު މަތީގައި ޖަހައިފަ އެވެ. އެ މެޗުގައި ސުޒެއިރު އަށް ރަތް ކާޑު ވެސް ދެއްކި އެވެ.
މާޒިޔާގެ އެސިސްޓެންޓް ކޯޗު ސުޒެއިރު ހަމަލާދިން މައްސަލަ، ނިއު ރޭޑިއަންޓް އިން ހުށަހަޅައިފި
މި މައްސަލައާ ގުޅިގެން ފުލުހުން ބުނީ، އެ މެޗުގައި މާރާމާރީ ހިންގި މައްސަލަ އެ އިދާރާ އަށް ހުށަހަޅާފައިވާ ކަމަށެވެ. ނަމަވެސް، އެ މައްސަލަ ހުށަހެޅީ ކޮން ފަރާތަކުން ކަމެއް ފުލުހުން ބުނެފައި ނުވެ އެވެ. ފުލުހުން ބުނީ އެ މައްސަލައިގައި މިހާތަނަށް އެއްވެސް މީހަކު ހައްޔަރުކޮށްފައި ނުވާ ކަމަށެވެ.
އެ މެޗުގައި ސުޒެއިރުގެ އިތުރުން މާޒިޔާގެ ހަސަން ޝިފާޒު އާއި ނިއު ރޭޑިއަންޓްގެ އަބްދުﷲ މައިސާން އަށް ވެސް ރަތް ކާޑު ދެއްކި އެވެ. އަދި ނިއު ރޭޑިއަންޓްގެ ޔާޔާ ބިލީޓީ އާއި އީތަން އިބްރާހީމް ޒަކީ އަދި މާޒިޔާގެ އިޔާން އަބްދުލް އަލީމް އަށް ވަނީ ރީނދޫ ކާޑު ދައްކައިފަ އެވެ.
އެކަމާ ގުޅޭ ގޮތުން ނިއު ރޭޑިއަންޓް އިން ނެރެފައިވާ ބަޔާނެއްގައި ބުނެފައި ވަނީ، ސުޒެއިރުގެ މައްސަލަ އެފްއޭއެމް އަށް ހުށަހަޅާފައިވާ ކަަމަށެވެ. އަދި ޖިސްމާނީ ގޮތުން އަނިޔާ ދިނުމަކީ، ނުވަތަ ހަމަލާ ދިނުމަކީ ފުޓުބޯޅައިގައި ހިނގައިގެން ވާނެ ކަމެއް ނޫން ކަމަށް އެ ކުލަބުން ބުނެފައިވެ އެވެ. އެކަމުގެ ސަބަބުން ފުޓުބޯޅައިގައި އޮންނަން ޖެހޭ ރައްކާތެރިކަން އަދި ސަލާމަތްތެރިކަމަށް ހީނަރުކަން އަންނަ ކަމަށް ވެސް އެ ބަޔާނުގައި ވަނީ ބުނެފަ އެވެ.
ސުޒެއިރުގެ މައްސަލަ އެފްއޭއެމް އަށް ހުށަހަޅާފައިވާކަން ފާާހަގަކޮށް ނިއު ރޭޑިއަންޓް އިން ބުނީ، ސުޒެއިރުއާ ދެކޮޅަށް އެންމެ އެކަށީގެންވާ ފިޔަވަޅު އެޅުމަށް އެ ކުލަބުން ގޮވާލާ ކަމަށެވެ. ހަމައެހެންމެ އެ ޓީމުގެ ކުޅުންތެރިންނާއި އޮފިޝަލުންގެ ރައްކާތެރިކަން ޔަޤީން ކުރަން ބޭނުންވާ ކަމަށް ވެސް ނިއު ރޭޑިއަންޓް އިން ބުނެފައިވެ އެވެ.
އެ މެޗުގައި ނިއު ރޭޑިއަންޓް އިން ވަނީ 3-2 އިން މާޒިޔާ ބަލިކޮށްފަ އެވެ. މިއީ 2018 ވަނަ އަހަރުގެ ފަހުން ނިއު ރޭޑިއަންޓް އަށް މާޒިޔާ ބަލި ކުރެވުނު ފުރަތަމަ ފަހަރެވެ. ހަމައެހެންމެ، 2022 ވަނަ އަހަރުގެ ލީގުގެ ފަހުން، މާޒިޔާ ލީގުގެ މެޗަކުން ބަލިވި މިއީ ފުރަތަމަ ފަހަރެވެ.
