ކެތޭ ޕެސިފިކުން ދުބާއީ އަދި ރިޔާޟަށް ކުރާ ދަތުރުތައް ކެންސަލްކޮށްފި

އެމެރިކާއިން އީރާނާ ދެކޮޅަށް ފަށާފައިވާ ހަނގުރާމައިގެ ދަށުން އީރާންގެ ރަށްތަކަށް އަނެއްކާ ވެސް ހަމަލާދޭން ފެށުމާއެކު މަސްރަހު އިތުރަށް ނުތަނަވަސްވުމާ ގުޅިގެން މެދުއިރުމަތީގެ ބައެއް މަންޒިލުތަކަށް ކުރާ ދަތުރުކުރަން ކެންސަލްކުރަން ކެތޭ ޕެސިފިކް އެއާލައިނުން ނިންމައިފި އެވެ. މި ގޮތުން، ކެތޭ ޕެސިފިކުން ނިންމާފައި ވަނީ ޔުނައިޓެޑް އަރަބް އެމިރޭޓްސް (ޔޫއޭއީ) އަދި ސައުދީ އަރަބިއްޔާއަށް ކުރާ ދަތުރުތައް ކެންސަލް ކުރުމަށެވެ.

ހޮންގް ކޮންގުގެ އެއާލައިނުން ބުނީ، ޑިސެންބަރު 1 ގެ ކުރިން ޔޫއޭއީގެ ދުބާއީއާއި ސައުދީ އަރަބިއްޔާގެ ރިޔާޟަށް ކުރުމަށް ތާވަލުކޮށްފައިވާ ހުރިހާ ދަތުރުތަކެއް ކެންސަލް ކޮށްފައިވާ ކަމަށެވެ. މި ނިންމުމުގެ ސަބަބުން ދަތުރުފަތުރަށް ބުރޫއަރާ ފަރާތްތަކަށް، އެހެން ތާރީޚަކަށް ފްލައިޓް ބަދަލުކުރުމުގެ ފުރުސަތު ނުވަތަ އެހެން މަގަކުން ދަތުރުކުރުމުގެ އިޚުތިޔާރު ނުވަތަ ޓިކެޓަށް ފައިސާ އަނބުރާ ހޯދުމުގެ ފުރުސަތު ދޭނެ ކަމަށް އެ އެއާލައިނުން ބުނެ އެވެ.

މީގެ އިތުރުން، މެދުއިރުމަތީގެ މަސްރަހަށް އަންނަމުންދާ ބަދަލުތައް ކެތޭ ޕެސިފިކުން ވަރަށް ގާތުން ބަލަމުންދާނެ ކަމަށް ވެސް އެ އެއާލައިނުން ނެރެފައިވާބަޔާނުގައި ބުނެފައި ވެ އެވެ. ކެތޭ ޕެސިފިކުން މި ފިޔަވަޅު އަޅާފައި ވަނީ، މި ހަފުތާގެ ކުރީކޮޅު އެމެރިކާއިން އީރާނުގެ ލަރާކް ޖަޒީރާއަށް ދިން ހަމަލާއަކާ ގުޅިގެން، މަސްދުވަހުގެ މެދުކެނޑުމަކަށް ފަހު އީރާނާއި އެމެރިކާއާ ދެމެދު އަނެއްކާ ވެސް ހަމަލާ ބަދަލުކުރަން ފަށާފައިވާ ދަނޑިވަޅެއްގަ އެވެ. އެމެރިކާގެ ހަމަލާތަކުގެ ރައްދުގައި އީރާނުން ދަނީ މެދުއިރުމަތީގެ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ވަރުގަދަ ހަމަލާތަކެއް ދެމުންނެވެ.