އެމެރިކާއާއި އީރާނުން އަލުން މަޝްވަރާތައް ފަށަން ގަތަރުން ގޮވާލައިފި

އެމެރިކާއާއި އީރާނުން އަލުން ހަމަލާ ބަދަލުކުރަން ފަށައި، މަސްރަހު އިތުރަށް ގޯސްވުމާ ގުޅިގެން، އެމެރިކާއާއި އީރާނުން އަލުން މަޝްވަރާގެ މޭޒަށް އެނބުރި އައުމަށް، ދެ ޤައުމުގެ ދެމެދުގައި ކުރަމުންދާ މަޝްވަރާތަކުގައި މެދުވެރިއެއްގެ ދައުރު އަދާކުރާ ގަތަރުން  ގޮވާލައިފިއެވެ. އާދީއްތަ ދުވަހު ހޮރްމޫޒް ކަނޑުއޮޅީގައި އޮންނަ އީރާނުގެ ރަށަކަށް އެމެރިކާއިން ވަރުގަދަ ހަމަލާތަކެއް ދީފައިވާއިރު، އޭގެ ރައްދުގައި އީރާނުން ވަނީ ގަލްފުގެ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ވަގުތުން ހަމަލާދީފަ އެވެ.

އީރާނާ ދެކޮޅަށް އެމެރިކާއާއި އިސްރާއީލު ގުޅިގެން ފެށި ހަނގުރާމަ ހަ ވަނަ މަހަކަށް ދެމިގެން ގޮސްފައިވާއިރު، މަޝްވަރާތައް ވަނީ މަޑުޖެހިފައެވެ. އީރާނުން ދަނީ އިސްތިރާތީޖީ ގޮތުން މުހިންމު ހޮރްމޫޒް ކަނޑުއޮޅި ބަންދުކޮށް ކަނޑު ދަތުރުފަތުރަށް ހުރަސް އަޅަމުންނެވެ. އަދި މީގެ ރައްދުގައި އެމެރިކާއިން ދަނީ އީރާނުގެ ބަނދަރުތައް ބަންދުކޮށް ހިސާރުކުރުމުގެ މަސައްކަތް ކުރަމުންނެވެ.

ގަތަރުގެ ފޮރިން މިނިސްޓްރީގެ ތަރުޖަމާނު މާޖިދު އަލް-އަންސާރީ ވިދާޅުވީ، މި މައްސަލައަށް ހައްލެއް ނުހޯދައި ދޫކޮށްލުމާއި، ހޮރްމޫޒް ކަނޑުއޮޅި ބަންދުކޮށްފައި އޮތުމަކީ އާންމު ކަމަކަށް ހަދަން މަސައްކަތް ކުރުމަކީ މަސްރަހު އިތުރަށް ގޯސްވާނެ ކަމެއް ކަމަށް ފުރަތަމަ ދުވަހުން ފެށިގެން ވެސް ގަތަރުން ބުނަމުންދާ ކަމަށެވެ. އަދި، ފާއިތުވި ދެ ދުވަހު ފެނިގެން މި ދިޔައީ ހަމަ އެ މަންޒަރު ކަމަށް އޭނާ ވިދާޅުވިއެވެ.

މީގެ އިތުރުން، ދެ ފަރާތުން ވެސް ބުއްދީގެ ބޭނުންކޮށް މަޝްވަރާގެ މަގަށް އެނބުރި އައުމަށް އޭނާ ގޮވާލެއްވި އެވެ. އަދި މަޝްވަރާގެ މަގަށް ދެ ގައުމު ރުޖޫއަކުރުމަށް ޓަކައި، މެދުވެރިއެއްގެ ދައުރު އަދާކުރާ އެހެން ބައިވެރިންނާއެކު ގަތަރުން ކުރަމުންދާ މަސައްކަތްތައް އިތުރަށް ވަރުގަދަ ކުރާނެ ކަމަށް ވެސް އޭނާ ވިދާޅުވި އެވެ.

އަންގާރަ ދުވަހުގެ ކުރީކޮޅު އީރާނުގެ ރައީސް މަސްއޫދު ޕެޒެޝްކިއަން ވިދާޅުވީ، ހަނގުރާމަ ހުއްޓާލުމަށް ޖޫން މަހު އެކުލަވާލި އެއްބަސްވުމަށް އެމެރިކާއިން އަމަލުކުރަން ފަށައިފިނަމަ، އީރާނުންވެސް "ވަގުތުން" އެ އެއްބަސްވުމަށް ރުޖޫއަވާނެ ކަމަށެވެ.

އަލް އަންސާރީ ވިދާޅުވި ގޮތުގައި، ގަތަރަށާއި، މި ސަރަހައްދަށް އަދި މުޅި ދުނިޔެއަށް ވެސް މިހާރު އޮތް ހާލަތު މި ގޮތުގައި ދެމިއޮތުމަކީ ބަލައިގަނެވޭނެ ކަމެއް ނޫނެވެ. އަދި، މި މައްސަލައިގައި މެދުވެރިއެއްގެ ދައުރު އަދާކުރާ ޕާކިސްތާނާއި އޮމާން ފަދަ ގައުމުތަކާއެކު ކުރިއަށްދާ މަޝްވަރާތައް އަދިވެސް މެދުކެނޑުމެއް ނެތި ކުރިއަށްދާ ކަން އޭނާ ފާހަގަކުރެއްވި އެވެ.

މިދިޔަ ހަފުތާގައި ގަތަރުގެ ބޮޑުވަޒީރު ޝައިޚް މުޙައްމަދު ބިން އަބްދުއްރަޙްމާން އަލްޘާނީ ވަނީ މެދުވެރިއެއްގެ ދައުރު އަދާކުރެއްވުމުގެ ގޮތުން އީރާނުގެ ވެރިރަށް ތެހެރާނަށް ދަތުރުފުޅެއް ކުރައްވާފަ އެވެ. މި ދަތުރުފުޅު ކުރައްވާފައި ވަނީ، ހޮރްމޫޒް ކަނޑުއޮޅީގެ ބޯޑަރު ހިއްސާކުރާ އީރާނާއި އޮމާނުން، ކަނޑު ދަތުރުފަތުރު ކުރެވޭނެ ވަގުތީ މަގެއް ހުޅުވުމަށާއި ކަނޑަށް އަޅާފައިވާ މައިންތައް ނެގުމާ ގުޅޭގޮތުން މަޝްވަރާ ކުރަމުންދާ ކަމަށް ބުނެފައިވާ ދަނޑިވަޅެއްގަ އެވެ.