އޭއެފްސީ 17 އަހަރުން ދަށުގެ އޭޝިއަން ކަޕް ކޮލިފައިންގެ ގުރު ނެގުން މި މަހު 27 ގައި ބާއްވަނީ

އުޒްބެކިސްތާންގައި 2027 ވަނަ އަހަރު ބޭއްވުމަށް ހަމަޖެހިފައިވާ އޭއެފްސީ 17 އަހަރުން ދަށުގެ އޭޝިއަން ކަޕަށް ކޮލިފައިވުމުގެ މަރުހަލާގެ ގުރު ނެގުން، މި ހިނގާ އޮގަސްޓް މަހުގެ 27 ވަނަ ދުވަހު މެލޭޝިޔާގެ ވެރި ރަށް ކުއާލަލަމްޕޫރުގައި ހުންނަ އޭއެފްސީ ހައުސްގައި ބޭއްވުމަށް ނިންމައިފި އެވެ.

އެ ދުވަހުގެ މެންދުރު ފަހު ބާއްވާ މި ރަސްމިއްޔާތުގައި، މުބާރާތުގައި ބައިވެރިވާ 35 ޤައުމެއް ހަތް ގުރޫޕަކަށް ބަހާލާނެ އެވެ. ކޮންމެ ގުރޫޕެއްގައި ފަސް ޓީމު ހިމެނޭއިރު، ކޮލިފައިން ބުރުގެ މެޗުތައް ކުރިއަށް ދާނީ 2026 ވަނަ އަހަރުގެ ނޮވެމްބަރު އަށް ވަނަ ދުވަހުން، 20 ވަނަ ދުވަހުގެ ނިޔަލަށެވެ. މި މެޗުތައް ކުޅުމަށް ހަމަޖެހިފައި ވަނީ ސެންޓްރަލައިޒްޑް އުސޫލުން، ކޮންމެ ގުރޫޕެއްގެ މެޗުތައް ވަކި ޤައުމެއްގައި އެވެ. ކޮލިފައިން ބުރުން މުބާރާތުގެ ފައިނަލް ބުރަށް ދަތުރު ކުރާނީ ކޮންމެ ގުރޫޕެއްގެ އެއް ވަނަ ހޯދާ ހަތް ޓީމެވެ.

މި ޓީމުތަކާ އެކު، 2026 ވަނަ އަހަރު ޤަތަރުގައި ބާއްވާ ފީފާ 17 އަހަރުން ދަށުގެ ވޯލްޑް ކަޕްގައި އޭޝިއާ ތަމްސީލުކުރާ ނުވަ ޤައުމެއް އޮޓޮމެޓިކުން މުބާރާތަށް ކޮލިފައިވާނެ އެވެ. އެ ޤައުމުތަކަކީ އޮސްޓްރޭލިއާ، ޗައިނާ، ޖަޕާން، ދެކުނު ކޮރެއާ، ޤަތަރު، ސައުދީ އަރަބިއްޔާ، ތަޖިކިސްތާން، އުޒްބެކިސްތާން އަދި ވިއެޓްނާމް އެވެ. މިއީ އޭއެފްސީ 17 އަހަރުން ދަށުގެ އޭޝިއަން ކަޕްގެ 22 ވަނަ މުބާރާތެވެ.

މި މުބާރާތުގެ ފައިނަލް ބުރުން ފުރަތަމަ ފަހަރަށް ޖާގަ ހޯދުމަށް 13 ޤައުމަކުން އަންނަނީ މަސައްކަތް ކުރަމުންނެވެ. އޭގެ ތެރޭގައި ދިވެހިރާއްޖެ، ބޫޓާން، ބުރުނާއީ، ކެމްބޯޑިއާ، ޗައިނީޒް ތައިޕޭ، ގުއާމް، ލުބުނާން، މޮންގޯލިއާ، ނޮދަން މަރިއާނާ އައިލެންޑްސް، ފަލަސްޠީން، ފިލިޕީންސް، ސްރީ ލަންކާ އަދި މަކާއޯ ހިމެނެ އެވެ.

ގުރު ނެގުމަށްޓަކައި ޓީމުތައް ފަސް ޕޮޓަކަށް ބަހާލާފައިވާއިރު، މީގެ އިތުރުން މުބާރާތް ބާއްވާ ޤައުމުތަކަށް ޚާއްސަ "ހޯސްޓްސް ޕޮޓް" އެއް ވެސް ވަނީ ތައްޔާރުކޮށްފައި އެވެ. ޓީމުތައް ސީޑު ކޮށްފައިވަނީ އެންމެ ފަހުން ބޭއްވި ތިން މުބާރާތުގެ ނަތީޖާ އަށް ބިނާކޮށް ދީފައިވާ ޕޮއިންޓު ތަކުންނެވެ.

މުބާރާތް ބާއްވާ ޤައުމު ތަކުގެ ޕޮޓުގައި ހިމެނެނީ ތައިލެންޑް، ޔުނައިޓެޑް އަރަބް އެމިރޭޓްސް (ޔޫއޭއީ)، އޮމާން، މެލޭޝިޔާ، މިޔަންމާ، ލާއޯސް އަދި ކިރިގިސްތާން އެވެ.