ފީފާ ވޯލްޑް ކަޕް ކޮލިފިކޭޝަންގައި އައިސްލެންޑާ ދެކޮޅަށް ކުޅުނު މެޗުން ފްރާންސް އެއްވަރުވެއްޖެ އެވެ.

ހޯމަ ދުވަހުގެ ރޭ ކުޅުނު މެޗު ނިމުނީ ދެ ޓީމު 2-2 އިން އެއްވަރު ވެގެންނެވެ. މެޗުގައި އައިސްލެންޑް އިން ލަނޑު ޖަހައި ކުރި ހޯދާފައި ވަނިކޮށް، ފްރާންސް އިން ފަހަތުން އަރައި ލީޑު ވެސް ނެގި އެވެ. ނަމަވެސް، ދެ ވަނަ ލަނޑެއް ޖަހައިގެން އައިސްލެންޑް އިން ވަނީ ފްރާންސްއާ އެއްވަރު ކޮށްފަ އެވެ.

މެޗުގެ ފުރަތަމަ ހާފުގައި ވެސް ފްރާންސް އިން ވަނީ ލަނޑު ޖަހަން ފުރުސަތު ތަކެއް ތަނަވަސްކޮށްފަ އެވެ. ނަމަވެސް ފުރަތަމަ ހާފުގެ 39 ވަނަ މިނެޓުގައި އައިސްލެންޑް އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ވިކްޓާ ޕައިސަން އެވެ.

ފްރާންސް އިން އެ ޓީމުގެ ދެ ލަނޑު ވެސް ޖެހީ މެޗުގެ ދެ ވަނަ ހާފުގަ އެވެ. އެގޮތުން މެޗުގެ 63 ވަނަ މިނެޓުގައި ފްރާންސް އަށް ނަތީޖާ ހަމަހަމަ ކޮށްދިނީ ކްރިސްޓޮފާ އެންކުންކޫ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ލޫކަސް ޑިގްނީ އެވެ.

އޭގެ ފަސް މިނެޓު ފަހުން ފްރާންސް އިން ވަނީ ދެ ވަނަ ލަނޑެއް ޖަހައި ލީޑު ނަގައިފަ އެވެ. އެ ލަނޑު ފްރާންސް އަށް ޖަހައިދިނީ ހުއާން ފިލިޕޭ މަޓޭޓާ އެވެ. ނަމަވެސް ފްރާންސް އަށް ލީޑު ގައި އޮވެވުނީ އެންމެ ދެ މިނެޓު އެވެ. އައިސްލެންޑްގެ ކްރިސްޓިއަން ލިންސަން ވަނީ ލަނޑު ޖަހައި އެ ޓީމަށް ނަތީޖާ ހަމަހަމަ ކޮށްދީފަ އެވެ.

މެޗަށް ފަހު ވާހަކަ ދައްކަމުން ފްރާންސްގެ ކޯޗު ޑިޑިއޭ ޑެޝޯމްޕްސް ބުނެފައި ވަނީ، މެޗުގައި އައިސްލެންޑަށް ލަނޑު ޖަހަން ލިބުނީ ދެ ފުރުސަތު ކަމަށާއި، އެ ދެ ފުރުސަތުގައި އެ ޓީމުން ދެ ލަނޑު ޖެހި ކަމަށެވެ. މެޗުގައި ފްރާންސް އިން ކުރަން ޖެހުނު ކަންކަން ކުރި ކަމަށާއި، ނަމަވެސް ބައި ކޮޅަށް ދެ ލަނޑު ވަނުމަކީ ހިތްހަމަ ނުޖެހޭ ކަމެއް ކަމަށް އޭނާ ބުންޏެވެ.

ޑެޝޯމްޕްސް ބުނީ މެޗުގައި ފްރާންސް އިން ރަނގަޅު ކަންތައްތަކެއް ކުރަން މަސައްކަތް ކުރި ކަމަށާއި، ނަމަވެސް ކުއްލި އަކަށް އެކަން ބަދަލުވީ ކަމަށެވެ. އޭގެ ސަބަބުން ފްރާންސް އަށް އުނދަގޫ ތަކެއް ކުރިމަތިވިކަން ފާހަގަކޮށް ޑެޝޯމްޕްސް ބުނީ، އެ މެޗުން އުންމީދު ކުރީ ތިން ޕޮއިންޓަށް ކަމަށެވެ.

މެޗު އެއްވަރުވީ ނަމަވެސް، މި ގުރޫޕުގެ އެއް ވަނައިގައި އޮތީ ފްރާންސް އެވެ. އެއީ މިހާތަނަށް އެ ޓީމު ކުޅެފައިވާ ހަތަރު މެޗުން 10 ޕޮއިންޓާ އެކު އެވެ. ދެ ވަނައިގައި އޮތް ޔުކްރެއިން އަށް ހަތަރު މެޗުން ލިބިފައި ވަނީ ހަތް ޕޮއިންޓެވެ. ފްރާންސް އަށް ދެން އޮންނާނީ ޔުކްރެއިންއާ ދެކޮޅަށް ކުޅޭ މެޗެވެ.