އެމްބާޕޭގެ ދެ ލަނޑުން މޮޅުވެ، ފްރާންސް އަނެއް ބުރަށް

މިހާރު ކުރިއަށްދާ ފީފާ ވޯލްޑް ކަޕްގެ ގުރޫޕު އައިގައި އިރާގްއާ ދެކޮޅަށް ކުޅުނު މެޗުން މޮޅުވެ، ފްރާންސް އިން މުބާރާތުގެ ގަދަ 32 ގެ ބުރުން ޖާގަ ހޯދައިފި އެވެ.

ހޯމަ ދުވަހުގެ ރޭ ދަންވަރު ކުޅުނު މެޗު ފްރާންސް އިން ކާމިޔާބު ކުރީ 3-0 އިންނެވެ. މި މެޗު ކުޅެމުން ދަނިކޮށް، ވިއްސާރަވެ މޫސުން ގޯސް ވުމުގެ ސަބަބުން މެޗު ވަނީ ގާތް ގަނޑަކަށް ދޮޅު ގަޑިއިރަށް މެދު ކަނޑާލައިފަ އެވެ.

މެޗު ފަށައިގެން 14 ވަނަ މިނެޓުގައި ފްރާންސް އަށް ލީޑު ނަގައިދިނީ ކެޕްޓަން ކީލިއަން އެމްބާޕޭ އެވެ. އެއީ މައިކަލް އޮލައިސޭ ތަނަވަސްކޮށްދިން ފުރުސަތެއްގައި އެމްބާޕޭ ޖެހި ލަނޑެކެވެ. އޭގެ ފަހުން މެޗުގެ ދެ ވަނަ ހާފު ފަށައިގެން ނުވަ ވަނަ މިނެޓުގައި އެމްބާޕޭ ވަނީ ދެ ވަނަ ލަނޑެއް ޖަހައި ފްރާންސްގެ ލީޑު ފުޅާ ކޮށްފައި އެވެ. މިއީ މިފަހަރުގެ ވޯލްޑް ކަޕްގައި އެމްބާޕޭ ޖެހި ހަތަރު ވަނަ ލަނޑެވެ.

މެޗުގައި ފްރާންސް އިން ރަނގަޅަށް ކުޅެމުން ދިޔައިރު، މެޗުގެ 66 ވަނަ މިނެޓުގައި ފްރާންސް އިން ވަނީ ތިން ވަނަ ލަނޑެއް ޖަހައިފަ އެވެ. އެ ލަނޑު ފްރާންސް އަށް ޖަހައިދިނީ އޮސްމާން ޑެމްބެލޭ އެވެ. މިއީ ޑެމްބެލޭގެ ކެރިއަރުގައި ވޯލްޑް ކަޕެއްގައި އޭނާ ޖެހި ފުރަތަމަ ލަނޑެވެ. 

މެޗުން މޮޅުވެ ފްރާންސް އިން ގަދަ 32 ވަނަ ބުރުން ޖާގަ ހޯދީ ގުރޫޕުގެ އެއް ވަނަ ޓީމުގެ ގޮތުގައި އެވެ. މިހާތަނަށް ކުޅެފައިވާ ދެ މެޗުން ވެސް މޮޅުވެ، ފްރާންސް އަށް ވަނީ ހަ ޕޮއިންޓު ލިބިފައި އެވެ. ގުރޫޕު ސްޓޭޖުގެ ފަހު މެޗުގައި ފްރާންސް ނިކުންނާނީ ނޯވޭއާ ދެކޮޅަށެވެ.