ފީފާ ރޭންކިންގެ އެއް ވަނަ އަށް ސްޕެއިން ޖެހިލައިފި

ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ރޭންކިންގެ އެއް ވަނަ އަށް، ސްޕެއިންގެ ޤައުމީ ފުޓުބޯޅަ ޓީމު ޖެހިލައިފި އެވެ.

ފީފާ އިން އެންމެ ފަހުގެ ރޭންކިން އާންމު ކޮށްފައިވާއިރު، ލުއިސް ޑި ލާ ފުއެންޓޭގެ އިރުޝާދުގެ ދަށުން ކުޅެމުން އަންނަ ސްޕެއިން އިން ރޭންކިންގެ އެއް ވަނަ އަށް ޖެހިލާފައިވާއިރު، އެ ޓީމުން އަންނަނީ ރަނގަޅު ނަތީޖާ ތަކެއް ނެރެމުންނެވެ.

ސްޕެއިންގެ ފަހަތުން ރޭންކިންގައި އޮތީ އެންމެ ފަހުން ފީފާ ވޯލްޑް ކަޕް ކާމިޔާބު ކުރި އާޖެންޓީނާ އެވެ. މިފަހަރު އާޖެންޓީނާ އިން ވަނީ ރޭންކިންގައި އެއް ދަރަޖައިގެ ކުރިއެރުމަށް ހޯދައިފަ އެވެ. މީގެ ކުރީގެ ރޭންކިންގައި އާޖެންޓީނާ އޮތީ ތިން ވަނައިގަ އެވެ. 2022 ވަނަ އަހަރު ޤަތަރުގައި ކުރިއަށް ދިޔަ ވޯލްޑް ކަޕް އާޖެންޓީނާ އިން ކާމިޔާބު ކުރި ފަހުން، އެތައް ދުވަހެއް ވަންދެން އެ ޓީމުން ވަނީ ރޭންކިންގެ އެއް ވަަނައިގައި އޮވެފަ އެވެ.

ހުކުރު ދުވަހު ފީފާ އިން ރޭންކިން އާންމު ކޮށްފައިވާއިރު، ތިން ވަނައިގައި އޮތީ ފްރާންސް އެވެ. ރޭންކިންގައި ފްރާންސް އިން ވަނީ އެއް ދަރަޖަ ފަހަތަށް ގޮސްފަ އެވެ. މީގެ ކުރީ ރޭންކިންގައި ފްރާންސް އޮތީ ދެ ވަނައިގަ އެވެ. ރޭންކިންގެ ހަތަރު ވަަނައިގައި އިނގިރޭސިވިލާތް އޮތްއިރު، ފަސް ވަނައިގައި އޮތީ ޕޯޗުގަލް އެވެ.

މީގެ ކުރިން ރޭންކިންގެ ހަތް ވަނައިގައި އޮތް ނެދަލެންޑްސް އިން ވަނީ އެއް ދަރަޖައިގެ ކުރިއެރުމަކާ އެކު ހަ ވަނަ އަށް ޖެހިލައިފަ އެވެ. ރޭންކިންގެ ހަ ވަނައިގައި މީގެ ކުރިން އޮތް ބްރެޒިލް ވަނީ އެއް ދަރަޖަ ފަހަތަށް ވެއްޓި، ހަތް ވަނަ އަށް ގޮސްފަ އެވެ. ބްރެޒިލްގެ ފަހަތުން ރޭންކިންގެ އަށް ވަަނައިގައި އޮތީ ބެލްޖިއަމް އެވެ.

ކުރީގެ ރޭންކިންގެ 10 ވަނައިގައި އޮތް އިޓަލީ އިން ވަނީ، މިފަހަރުގެ ރޭންކިންގެ ނުވަ ވަނަ އަށް ޖެހިލައިފަ އެވެ. މީގެ ކުރިން ރޭންކިންގެ 12 ވަަނައިގައި އޮތް ޖަރުމަނު، މިފަހަރު އޮތީ ރޭންކިންގެ 10 ވަނައިގަ އެވެ. ގަދަ 10 އެއްގައި މީގެ ކުރިން ކްރޮއޭޝިއާ އޮތް ނަމަވެސް، މިފަހަރުގެ ރޭންކިން ގައި އެ ޓީމު އޮތީ 11 ވަނައިގަ އެވެ.

ފީފާ އިން ދެން ރޭންކިން އާންމު ކުރާނީ އަންނަ ނޮވެމްބަރު މަހުގެ 21 ވަނަ ދުވަހު އެވެ.