ސޫރިޔާގެ ހަތިޔާރު ގުދަނެއްގައި ބާރުގަދަ ގޮވުންތަކެއް ގޮވައި، ހަތަރު މީހުން ޒަޚަމްވެއްޖެ
21 ސެޕްޓެމްބަރު 2026 | ހޯމަ 08:02ސޫރިޔާގެ ޙަލަބު ސިޓީގެ ދެކުނުގައި ހުންނަ އަސްކަރީ މަރުކަޒެއްގެ ހަތިޔާރު ގުދަނެއްގައި ބާރުގަދަ ގޮވުންތަކެއް ގޮވައި، ހަތަރު މީހަކު ޒަޚަމްވެއްޖެ. މި ހާދިސާއާ ގުޅިގެން އާންމުންގެ ރައްކާތެރިކަމަށް ޓަކައި އެ ސަރަހައްދުގެ މަގުތައް ބަންދުކޮށް، ކުއްލި ހާލަތަށް ތައްޔާރުވުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައި. ސޫރިޔާގެ އެކި ސަރަހައްދުތަކުގައި މި ފަދަ ނުރައްކާތެރި ގޮވުންތައް ދަނީ ތަކުރާރުވަމުން
ސޫރިޔާގެ ޙަލަބުގައި ހުރި ހަތިޔާރު ގުދަނެއްގައި ބާރުގަދަ ގޮވުންތަކެއް ގޮވާ މަންޒަރު | އެކްސް
ސޫރިޔާގެ އުތުރުގައި ހުންނަ ހަތިޔާރު ގުދަނެއްގައި ބާރުގަދަ ގޮވުންތަކެއް ގޮވައި، މަދުވެގެން ހަތަރު މީހަކު ޒަޚަމްވެފައިވާ ކަމަށް އެ ގައުމުގެ ދައުލަތުގެ މީޑިއާއިން ރިޕޯޓްކޮށްފި އެވެ. އަދި، އެ ސަރަހައްދާ ދުރަށް ދިއުމަށް ކަމާބެހޭ އޮފިޝަލުން ވަނީ އާންމުންނަށް އިލްތިމާސްކޮށްފަ އެވެ.
މި ގޮވުންތައް ހިނގާފައި ވަނީ ހޯމަ ދުވަހުގެ ހެނދުނު ޙަލަބު ސިޓީގެ ދެކުނުން، އަލްޢީސް އަވަށުގެ ކައިރީގައި އޮންނަ ސޫރިޔާ ސިފައިންގެ މަރުކަޒެއްގައި ކަމަށް ދައުލަތުން ހިންގާ ސަނާ ނޫސް އޭޖެންސީން ވަނީ ހާމަކޮށްފަ އެވެ. މި ހާދިސާ ހިނގަން މެދުވެރިވި ސަބަބު ވަގުތުން ސާފުވެފައެއް ނުވެ އެވެ. ހާދިސާ ހިނގި ސަރަހައްދުން އަނިޔާވި ހަތަރު މީހަކު މީހުން ސަލާމަތްކުރާ ޓީމުތަކުން މިހާރު ނެރެފައިވާ ކަމަށް، ޙަލަބުގެ ސިވިލް ޑިފެންސް އޮޕަރޭޝަންސްގެ ވެރިޔާ ފައިޞަލް މުޙައްމަދު ޢަލީ ވިދާޅުވި އެވެ.
ފުރަތަމަ ގޮވުމަށް ފަހު ވިދިވިދިގެން އިތުރު ގޮވުންތަކެއް ގޮވާފައިވާ ކަމަށް، ޙަލަބުގައި ހުރި އަލް ޖަޒީރާގެ ރިޕޯޓަރު ބުންޏެވެ. "އެ ސަރަހައްދާ މަދު ކިލޯމީޓަރުތަކެއްގެ ދުރުމިނަށް ވެސް ގޮވުންތަކުގެ އަޑު އިވޭ. މިހާރު ފެންނަނީ އެ ސަރަހައްދާ ދިމާއަށް ގިނަ އަދަދެއްގެ އެމްބިއުލާންސްތަކާއި އަލިފާން ނިއްވާ ލޮރީތައް ވަންނަމުންދާ މަންޒަރު،" އޭނާ ރިޕޯޓުކޮށްފައިވެ އެވެ.
ޙަލަބުގެ ރައްޔިތުން ވަގުތީ ގޮތުން ގެދޮރުން ބޭރަށް ނުނިކުތުމަށް އެ ސިޓީގެ ގަވަރުނަރު ޢައްޒާމް އަލްޣަރީބު ވަނީ އިލްތިމާސްކުރައްވާފަ އެވެ. މިއާއެކު، "ހޮސްޕިޓަލްތަކާއި އެމްބިއުލާންސް އަދި ކުއްލި ހާލަތްތަކުގައި ހަރަކާތްތެރިވާ ޓީމުތައް ތިބީ ފުރިހަމަ ތައްޔާރީ ހާލަތުގައި" ކަމަށް ވެސް އޭނާ ވިދާޅުވި އެވެ. އަނެއްކޮޅުން، ގޮވުންތައް ހިނގި ސަރަހައްދަށް ދެވެން ހުރި މަގުތައް ބަންދުކޮށްފައި ވަނީ "އާންމުންގެ ރައްކާތެރިކަން ކަށަވަރުކުރުމަށް ޓަކައި" ކަމަށް ޙަލަބުގެ އިންޓާނަލް ސެކިއުރިޓީ ކޮމާންޑުން ވަނީ ބުނެފަ އެވެ.
އޭނާއަށް "ބާރުގަދަ ގޮވުމެއްގެ" އަޑު އިވުނު ކަމަށާއި، ފުރާޅުމައްޗަށް އެރުމުން "ދުރުން ބޮޑެތި އަލިފާންގަނޑުތަކެއް" ފެންނަން ހުރި ކަމަށް، އޭއެފްޕީ ނޫސް އޭޖެންސީއާ ވާހަކަދެއްކި ޙަލަބުގެ އަލްޙަމްދާނިއްޔާ އަވަށުގެ ރައްޔިތަކު ބުންޏެވެ.
2024 ވަނަ އަހަރުގެ ފަހުކޮޅު، ގިނަ ދުވަސްތަކެއް ވަންދެން ވެރިކަން ކުރެއްވި ބައްޝާރު އަލް-އަސަދުގެ ވެރިކަން ވައްޓާލުމާ ގުޅިގެން، ދިހަ އަހަރަށް ވުރެ ގިނަ ދުވަސްވީ ދާޚިލީ ހަނގުރާމައިގެ ތެރެއިން ސޫރިޔާ އަރައިގަންނަމުން އަންނައިރު، މީގެ ކުރިން ވެސް މި ފަދަ އެތައް ހާދިސާތަކެއް އެ ގައުމުގައި ވަނީ ހިނގާފަ އެވެ. މި ގޮތުން، ހުކުރު ދުވަހު އިރުމަތީ ޕްރޮވިންސެއް ކަމަށްވާ ދައިރުއްޒޫރުގެ އަސްކަރީ މަރުކަޒެއްގައި ހިނގި ގޮވުމެއްގައި 11 މީހުން ވަނީ މަރުވެފަ އެވެ. އަދި، މި މަހުގެ ކުރީކޮޅު ސޫރިޔާގެ ހުޅަނގު އުތުރު އިދްލިބު ޕްރޮވިންސްގައި ހުންނަ ދިފާޢީ ވުޒާރާގެ ހަތިޔާރު ގުދަނެއްގައި ހިނގި ގޮވުމެއްގައި 14 މީހުން މަރުވެ، 11 މީހުން ވަނީ ޒަޚަމްވެފަ އެވެ. ހަމަމިއާއެކު، އޭގެ ހަފުތާއަކަށް ވުރެ ކުޑަ ދުވަސްކޮޅެއް ކުރިން ހަމަ އެ ސަރަހައްދުގައި ހަތިޔާރު އުފުލި އުޅަނދެއް ގޮވައިގެން ވެސް ފަސް މީހަކު ވަނީ މަރުވެފަ އެވެ.
މަސްދަރު: އަލް ޖަޒީރާ
