އެމެރިކާގެ ޓެރަރިޒަމް ލިސްޓުން ސޫރިއާ އުނިކޮށްފި

އެމެރިކާއިން ޓެރަރިޒަމަށް ވާގިވެރިވާ ގައުމުތަކުގެ ލިސްޓުން ސޫރިއާ އުނިކޮށްފި އެވެ. ފާއިތުވި 47 އަހަރު އެ ލިސްޓުގައި ސޫރިއާ އޮތުމަށްފަހު، އެމެރިކާއިން މި ނިންމުން ނިންމީ އެ ގައުމުގެ އަމިއްލަ ވިޔަފާރިތަކަށް ހުރި ހުރަސްތައް ނައްތާލައި، ދުނިޔޭގެ އިގްތިސާދުގައި ސޫރިއާ އަލުން ބައިވެރިކުރުމަށް މަގުފަހިކުރުމުގެ ގޮތުން ކަމަށް އެމެރިކާއިން ބުނެ އެވެ.

އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ، މި ނިންމުމަކީ ބައިނަލްއަގުވާމީ ޓެރަރިޒަމްގެ އަމަލުތަކާ ސޫރިއާގެ މިހާރުގެ ސަރުކާރުން މުޅިން ދުރުހެލިވެފައިވާކަން ބަލައިގަތުމުގެ ގޮތުން ނިންމި ނިންމުމެއް ކަމަށެވެ.

ޑޮނަލްޑް ޓްރަމްޕްގެ ސަރުކާރުން މިހާރު ވަނީ ސޫރިއާގެ އާ ރައީސް އަހުމަދު އަލް-ޝަރާއާ ގާތް ގުޅުމެއް ބާއްވަން ފަށާފަ އެވެ. އޭނާއަކީ ކުރިން އަލްގައިދާގެ ގޮފިތަކުގެ ލީޑަރެއްގެ ގޮތުގައި ހަރަކާތްތެރިވެފައިވާ، އަދި އޭނާ ހައްޔަރުކުރުމަށް އެމެރިކާއިން އިނާމުވެސް އިއުލާންކޮށްފައިވާ ފަރާތެކެވެ.

އޭނާގެ އިސްލާމީ ޖަމާއަތް ކަމަށްވާ ހަޔާތު ތަހްރީރު އަލް-ޝާމް (އެޗް.ޓީ.އެސް) ވެސް މިހާރު ވަނީ އެމެރިކާގެ ބައިނަލްއަގުވާމީ ޓެރަރިސްޓް ޖަމާއަތްތަކުގެ ލިސްޓުން އުނިކޮށްފަ އެވެ.

ކުރިން އަލް-ނުސްރާ ފްރަންޓްގެ ނަމުން މަޝްހޫރުވި އެޗް.ޓީ.އެސް އަކީ 2016 ވަނަ އަހަރު ޝަރާއާ އެ ޖަމާއަތާ ގުޅުން ކަނޑާލުމާ ހަމައަށް ސޫރިއާގައި ހަރަކާތްތެރިވި އަލްގައިދާގެ ގޮތްޕެކެވެ.

2024 ވަނަ އަހަރުގެ ފަހުކޮޅު، ކުރީގެ ރައީސް ބައްޝާރު އަލް-އަސަދުގެ ވެރިކަން ވައްޓާލުމަށް ހަނގުރާމަވެރިން ކުރި މަސައްކަތުގައި އިސްކޮށް އޮތީ އެޗް.ޓީ.އެސް އެވެ. އަދި ޝަރާއާގެ އިންތިގާލީ ސަރުކާރުގައި އެންމެ ބޮޑު ބާރެއް އޮތީވެސް އެ ޖަމާއަތަށެވެ.

އެމެރިކާގެ އުންމީދަކީ ރަޝިޔާ ނުވަތަ ޗައިނާގެ ބަދަލުގައި ސޫރިއާއަކީ އެމެރިކާއާ ގާތް ގުޅުމެއް ބާއްވާ ގައުމަކަށް ހެދުމެވެ. ނަމަވެސް ސޫރިއާގެ ސަލާމަތީ ކަންކަން އަދިވެސް އޮތީ ނުރައްކާތެރި ފައްތަރެއްގަ އެވެ. އަދި އެ ގައުމަކީ އަވަށްޓެރި އިސްރާއީލާއި ތުރުކީއާ ދެމެދު އުފެދިފައިވާ ނުތަނަވަސްކަމުގެ މައި މަރުކަޒަށް ވުމުން ގިނަ ގޮންޖެހުންތަކެއް އެބަހުއްޓެވެ.

މިދިޔަ ޖުލައި މަހު ފުރަތަމަ ފަހަރަށް އިއުލާންކުރި މި ނިންމުމާ ގުޅޭގޮތުން ރޫބިއޯ ހޯމަ ދުވަހު ވިދާޅުވީ، މީގެ ސަބަބުން ސޫރިއާގެ ރައްޔިތުންނަށް ތަނަވަސްކަމުގެ މަގު ފަހިވެގެންދާނެ ކަމަށެވެ.

އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓް ވިދާޅުވީ، މިއަދުގެ މި ނިންމުމުގެ ސަބަބުން ސޫރިއާގެ ސިޔާސީ އަދި އިގްތިސާދީ ހަމަޖެހުމަށްޓަކައި އިތުރު އިންވެސްޓްމަންޓްތައް އެ ގައުމަށް ވަނުމަށް އެހީތެރިވެދޭނެ ކަމަށެވެ.

ސޫރިއާގެ ދައުލަތުގެ މީޑިއާ "ސަނާ" އިން ރިޕޯޓްކޮށްފައިވާ ގޮތުގައި، އެ ގައުމުގެ ފޮރިން މިނިސްޓަރު އަސަދު ހަސަން އަލް-ޝައިބާނީ ވަނީ މިއީ "ތާރީޚީ ފިޔަވަޅެއް" ކަމަށް ވިދާޅުވެ އެކަމަށް މަރުހަބާ ވިދާޅުވެފަ އެވެ.

އޭނާ ވިދާޅުވީ، އެކަހެރިވެފައި އޮތް އޮތުން ނިމުމަކަށް ގެނައުމަށާއި، ދެފުށް ފެންނަ، ދެފަރާތުގެ މަސްލަހަތާއި އިހުތިރާމުގެ މައްޗަށް ބިނާވެފައިވާ މާހައުލެއް ގާއިމުކުރުމަށް މަސައްކަތް ކުރައްވާނެ ކަމަށެވެ.

މިދިޔަ އަހަރުގެ ތެރޭގައި އެމެރިކާއިން ވަނީ އެޗް.ޓީ.އެސް އަކީ ބޭރުގެ ޓެރަރިސްޓް ޖަމާއަތެއްގެ ގޮތުގައި އޮތް އޮތުން ބާތިލުކޮށް، ޚާއްސަ ޓެރަރިސްޓުންގެ ލިސްޓުން ޝަރާއާގެ ނަންވެސް އުނިކޮށްފަ އެވެ.

1979 ވަނަ އަހަރުން ފެށިގެން އެމެރިކާގެ ޓެރަރިޒަމަށް ވާގިވެރިވާ ގައުމުތަކުގެ ލިސްޓުގައި ސޫރިއާ އޮތުމަށްފަހު، އެ ގައުމު އުނިކުރުމުން މިހާރު އެ ލިސްޓުގައި ބާކީ އޮތީ ކިއުބާ، އުތުރު ކޮރެއާ އަދި އީރާނެވެ.

މި ލިސްޓުގައި ގައުމެއް ހިމެނުމުން، އެ ގައުމަކަށް މާލީ ދަތިކުރުމުގެ ފިޔަވަޅުތައް އެޅުމާއި، އެމެރިކާގެ ބޭރުގެ އެހީތަކާއި ދިފާއީ ސާމާނު ވިއްކުން މަނާވެއެވެ. އަދި އެ ގައުމަކާ އެކު ވިޔަފާރިކުރާ އެހެން ގައުމުތަކާއި ފަރުދުންނަށްވެސް އަދަބު ދިނުމުގެ ބާރު އެމެރިކާއަށް ލިބިގެންވާ ކަމަށް އެ ގައުމުން ބުނެ އެވެ.