ސޫރިޔާގެ ކުރީގެ ރައީސް އަލް-އަސަދުގެ ދެބެންގެދެދަރި ކޮއްކޮ ވަސީމް އަލް އަސަދު މަރަން ހުކުމްކޮށްފި

ސޫރިޔާގެ ކުރީގެ ރައީސް ބައްޝާރުލް އަސަދުގެ ދެބެންގެދެދަރި ކޮއްކޮ ވަސީމް އަލް އަސަދުގެ މައްޗަށް ކުށް ސާބިތުވެ، އޭނާ މަރަން އެ ގައުމުގެ ކޯޓަކުން އަންގާރަ ދުވަހު ހުކުމްކޮށްފި އެވެ. ކޯޓަށް ހާޒިރުކޮށް ހުކުމް އިއްވި ވަސީމްގެ އިތުރުން، ކުރީގެ ރައީސް ބައްޝާރުލް އަސަދުގެ ޣައިރު ހާޒިރުގައި ކުރިއަށްގެންދިޔަ ޝަރީއަތަށްފަހު، މިދިޔަ ހަފުތާގައި އޭނާ މަރަންވެސް ވަނީ ހުކުމްކޮށްފަ އެވެ.

އުމުރުން 46 އަހަރުގެ ވަސީމް އަލް އަސަދުގެ މައްޗަށް މި ހުކުމް އައީ، ސޫރިޔާގައި ގާތްގަނޑަކަށް 14 އަހަރަށް ދެމިގެންދިޔަ ދާޚިލީ ހަނގުރާމައިގައި، ބައްޝާރުލް އަސަދުގެ ވެރިކަމުގެ ދަށުން ހިންގާފައިވާ ލާއިންސާނީ ޖަރީމާތަކާ ގުޅިގެންނެވެ.

ގާޒީ ފަޚުރުއްދީން އަލް އަރްޔާން ވިދާޅުވި ގޮތުގައި، އަސަދުގެ ދެބެންގެދެދަރި ވަސީމްގެ މައްޗަށް ގިނަ ބަޔަކު މެރުމުގެ ކުށާއި، "އަނިޔާވެރިކަމާއެކު މީހުން މެރުމުގެ" ކުށް ވަނީ ސާބިތުވެފަ އެވެ. މި އަމަލުތަކަކީ އިންސާނިއްޔަތާ ޚިލާފު ޖަރީމާތަކެއްގެ ގޮތުގައާއި ހަނގުރާމައިގެ ކުށްތަކެއްގެ ގޮތުގައި ކޯޓުން ވަނީ ކަނޑައަޅާފަ އެވެ. އެހެންކަމުން އޭނާ މަރަން ހުކުމްކުރާ ކަމަށް ގާޒީ އިއުލާންކުރެއްވި އެވެ.

ސޫރިޔާގެ ކުރީގެ ސަރުކާރުން ޑިމޮކްރަސީއަށް ގޮވާލައި މުޒާހަރާކުރި މީހުންނާ ދެކޮޅަށް ބާރުގެ ބޭނުންކޮށް ހިންގި ލާއިންސާނީ އަމަލުތަކާ ގުޅިގެން، ބައްޝާރުލް އަސަދާއި އެހެނިހެން އިސްވެރިންގެ މައްޗަށް ޝަރީއަތް ހިންގަން ފަށާފައިވަނީ މިއަހަރުގެ އޭޕްރީލް މަހުގެ ތެރޭގަ އެވެ.

މި ހަމަނުޖެހުންތަކުގެ ތެރޭގައި ފަސްލައްކައަށްވުރެ ގިނަ މީހުން މަރުވެ، އެތައް މިލިއަން ބަޔަކު ވަނީ ގެދޮރު ދޫކޮށް ގޮސްފަ އެވެ. އަދި އެތައް ހާސް ބަޔަކު ވަނީ ވީނުވީއެއް ނޭނގި ގެއްލިފަ އެވެ.

ސޫރިޔާގެ ވެރިރަށް ދިިމިޝްގު ކައިރީގައި ދިން ނުރައްކާތެރި ހަމަލާތަކުގައި ބައިވެރިވި، ކުރީގެ ސަރުކާރަށް ވަފާތެރި ހަތިޔާރު އެޅި ދެ ގްރޫޕެއް ވަސީމް އަލް އަސަދު އުފައްދާފައިވާކަން ކޯޓަށް ވަނީ ސާބިތުވެފަ އެވެ.

މީގެ އިތުރުން، ދާޚިލީ ހަނގުރާމައާއި މަޒްހަބީ ފިތުނަ އުފެއްދުމަށް ހިތްވަރު ދިނުމާއި، މީހުންގެ މިނިވަންކަން ނިގުޅައިގަނެ އަނިޔާކުރުމުގެ ކުށްވެސް އޭނާގެ މައްޗަށް ވަނީ ސާބިތުވެފަ އެވެ.

ނަމަވެސް، މަސްތުވާތަކެތި އެތެރެކުރުމާއި އޭގެ ވިޔަފާރިކުރުމުގެ ދައުވާގައި އެކަށީގެންވާ ހެކި ނެތުމުން އޭނާ ކުށްވެރިނުވާކަމަށް ކޯޓުން ނިންމި އެވެ. އެހެންނަމަވެސް، އާ ހެކި ލިބިއްޖެނަމަ އެ މައްސަލަ އަލުން ހުޅުވާލުމުގެ އިޚްތިޔާރު ކޯޓަށް އޮންނާނެ އެވެ.

މި ހުކުމް ސޫރިޔާގެ އެންމެ މަތީ ޝަރުއީ އިދާރާ ކަމަށްވާ ކޯޓް އޮފް ކެސޭޝަންގައި އިސްތިއުނާފު ކުރުމުގެ ފުރުސަތު އޮންނާނެ އެވެ.

ސޫރިޔާގެ އިންތިގާލީ ލީޑަރުން ވަނީ ކުރީގެ ސަރުކާރުގެ ދަށުން ހިންގާފައިވާ ޖަރީމާތަކަށް އިންސާފު ގާއިމުކޮށް، އެކަމުގައި ޒިންމާވާންޖެހޭ ފަރާތްތައް ޖަވާބުދާރީ ކުރުވާނެ ކަމަށް ވައުދުވެފަ އެވެ.

ވަސީމް އަލް އަސަދު ހައްޔަރުކޮށްފައިވަނީ މިދިޔަ އަހަރު ލުބުނާނާއި ސޫރިޔާ ގުޅޭ ބޯޑަރު ކައިރިން ކަމަށްވާއިރު، އޭނާގެ ފުރަތަމަ ޝަރީއަތް ބާއްވާފައިވަނީ މިއަހަރުގެ ޖޫން މަހުގެ ފަހުކޮޅުގަ އެވެ.

ލަގްޒަރީ ކާރުތައް

ވަސީމް އަލް އަސަދަކީ ސަރުކާރުގެ މަތީ މަގާމެއް ފުރި ފަރާތަކަށް ނުވި ނަމަވެސް، އޭނާއަކީ ހަތިޔާރު އެޅި ޖަމާއަތެއްގެ އިސްވެރިއެއް ކަމަށާއި މަސްތުވާތަކެތީގެ ވިޔަފާރިކުރާ ނެޓްވޯކެއްގެ މުހިންމު މީހެއް ކަމަށް ބުނެ، 2023 ވަނަ އަހަރު އެމެރިކާގެ ޓްރެޜަރީން ވަނީ އޭނާއާ ދެކޮޅަށް ދަތިކުރުމުގެ ފިޔަވަޅު އަޅާފަ އެވެ.

ދާޚިލީ ހަނގުރާމައިގެ ދުވަސްވަރު، ވަސީމް އަލް އަސަދު ވަނީ ލަގްޒަރީ ކާރުތަކާއެކު ނަގާފައިވާ ފޮޓޯތަކާއި، އަސްކަރީ ހެދުމުގައި ހަތިޔާރު ހިފައިގެން ހުރި ފޮޓޯތައް ސޯޝަލް މީޑިއާގައި އާންމުކޮށްފަ އެވެ.

ބައެއް ފަހަރު އޭނާ ހަތިޔާރު އެޅި އެހެން މީހުންނާއެކު ފެނިފައިވާއިރު، މިހާރު މަގާމުން ދުރުކޮށްފައިވާ ލީޑަރު ބައްޝާރުލް އަސަދަށްޓަކައި ހަނގުރާމަކުރުމަށް އެ މީހުންނަށް ހިތްވަރުދޭ މަންޒަރުވެސް ފެނިފައިވެ އެވެ.

ސޫރިޔާގެ އާ ސަރުކާރުން ކުރިއަށްގެންދިޔަ ޝަރީއަތަށްފަހު، ދާޚިލީ ހަނގުރާމައިގައި ހިންގި ޖަރީމާތަކާ ގުޅިގެން ބައްޝާރުލް އަސަދު މަރަން މިދިޔަ އަންގާރަ ދުވަހު ވަނީ ހުކުމްކޮށްފަ އެވެ. މިއީ އާ ސަރުކާރުގެ ދަށުން މިފަދަ ހުކުމެއް ކުރި ފުރަތަމަ ފަހަރެވެ.

މީގެ އިތުރުން، ސޫރިޔާ ސިފައިންގެ ހަތަރުވަނަ ޑިވިޜަންގެ އިސްވެރިޔާ އަދި ބައްޝާރުލް އަސަދުގެ ކޮއްކޮ މާހިރު ހިމެނޭހެން، ކުރީގެ އަސްކަރީ އަދި ސަލާމަތީ ހަ އޮފިޝަލަކު ޣައިރު ހާޒިރުގައި ކުރި ޝަރީއަތަށްފަހު އެ މީހުން މަރަންވެސް ވަނީ ހުކުމްކޮށްފަ އެވެ.

ސޫރިޔާގެ އިދިކޮޅު ހަރަކާތްތައް ފެށުނު ދަރްއާ ޕްރޮވިންސްގެ ސިޔާސީ ސަލާމަތީ ކަންކަމާ ބެހޭ އިސްވެރިޔަކަށް ހުރި އާތިފް ނަޖީބުވެސް ވަނީ މަރަން ހުކުމްކޮށްފަ އެވެ. އޭނާއަކީ ކޯޓަށް ހާޒިރުކުރެވުނު ހަމައެކަނި ކުރީގެ ސަލާމަތީ އޮފިޝަލެވެ.

އދ. އިން މަރުގެ އަދަބާ ދެކޮޅު ހެދި ނަމަވެސް، އިންސާފާއި ޒިންމާދާރުކުރުވުމަށް ކުރާ މަސައްކަތްތަކުގެ ސަބަބުން މުއައްސަސާތަކަށް އޮންނަ އިތުބާރު ބޮޑުވެ، ދެމެހެއްޓެނިވި ސުލްހައަކަށް މަގުފަހިވާނެ ކަމަށް މިދިޔަ ހަފުތާގައި އެ އިދާރާއިން ބުނެފައިވެ އެވެ.

ބައްޝާރުލް އަސަދު 2024 ވަނަ އަހަރުގެ ޑިސެމްބަރު މަހު ރަޝިޔާއަށް ފިލައިގެން ގޮސްފައިވަނީ އޭނާގެ އަރިސް މަދު ބަޔަކާއެކުގަ އެވެ. އޭނާ ފިލައިގެން ދިޔައީ ސަރުކާރުގެ އިސްވެރިންނާއި ސަލާމަތީ އޮފިޝަލުން ދޫކޮށްލުމަށްފަހުގަ އެވެ. އޭގެ ތެރެއިން ބައެއް މީހުން އަވަށްޓެރި ގައުމުތަކަށް ފިލައިގެން ގޮސްފައިވާ ކަމަށް ރިޕޯޓްތައް ބުނެ އެވެ.