ޕާކިސްތާނުން އަފްޣާނިސްތާނަށް ވައިގެ ހަމަލާތަކެއް ދީފި
21 ސެޕްޓެމްބަރު 2026 | ހޯމަ 07:13ޕާކިސްތާނުން އަފްޣާނިސްތާނުގެ ބައެއް ސަރަހައްދުތަކަށް ދިން ވައިގެ ހަމަލާތަކެއްގައި ތިން މީހުން މަރުވެ، ގިނަ ބަޔަކު ޒަޚަމްވެފައިވާ ކަމަށް ތާލިބާން ސަރުކާރުން ތުހުމަތުކޮށްފި. މި ހަމަލާތަކާ ގުޅިގެން އިސްލާމްއާބާދުން ވަކި އެއްޗެއް ބުނެފައި ނުވާއިރު، މިއީ ޕާކިސްތާނުގެ އެތެރޭގައި ހަނގުރާމަވެރިން ދޭ ހަމަލާތައް އިތުރުވެފައިވާ ދަނޑިވަޅެއްގައި ހިނގި ހާދިސާތަކެއް
ޕާކިސްތާނުގެ އަސްކަރިއްޔާއިން ދިން ވައިގެ ހަމަލާތަކެއްގައި އަފްޣާނިސްތާނުގެ ރަށެއްގައި ގެއްލުން ލިބިފައިވާ އިމާރާތްތަކެއް | އަނަދޮލު އޭޖެންސީ
ޕާކިސްތާނުން އަފްޣާނިސްތާނުގެ އިރުމަތީ ކުނާރު އަދި ޕަކްތިކާ ޕްރޮވިންސަށް ވައިގެ ހަމަލާތަކެއް ދީފައިވާ ކަމަށާއި، މި ހަމަލާތަކުގައި މަދުވެގެން ތިން މީހުން މަރުވެ އިތުރު ބަޔަކު ޒަޚަމްވެފައިވާ ކަމަށް އަފްޣާނިސްތާނުން ހޯމަ ދުވަހު ތުހުމަތުކޮށްފި އެވެ.
ކުނާރު ޕްރޮވިންސްގެ ނޫރުގަލް ޑިސްޓްރިކްޓަށް ވައިގެ ހަމަލާ ދީފައިވަނީ އެ ގައުމުގެ ގަޑިން ފަތިހު ގާތްގަނޑަކަށް 3:00 ހާއިރު ކަމަށް، އަފްޣާނިސްތާނުގައި ވެރިކަންކުރާ ތާލިބާން ސަރުކާރުގެ ތަރުޖަމާނުގެ ނައިބު ހަމްދުﷲ ފިތުރަތު ބުންޏެވެ. އެ ހަމަލާގައި ތިން މީހުން މަރުވެ، އިތުރު އެތައް ބަޔަކު ޒަޚަމްވެފައިވާ ކަމަށް އޭނާ ހާމަކުރެއްވި އެވެ. ޕަކްތިކާ ޕްރޮވިންސްގެ ބަރުމާލް ޑިސްޓްރިކްޓަށް ވެސް މަދުވެގެން ދެ ފަހަރު ވައިގެ ހަމަލާ އަމާޒުވި ކަމަށް ފިތުރަތު ބުނެ އެވެ. އަދި، މި ހަމަލާތަކުގައި އެއްވެސް މީހަކަށް އަނިޔާއެއް ލިބުނު ކަމަކަށް ރިޕޯޓްކޮށްފައެއް ނުވެ އެވެ.
ކާބުލްގެ މި ތުހުމަތުތަކާ ގުޅިގެން އިސްލާމްއާބާދުން ވަގުތުން އެއްވެސް ރައްދެއް ދީފައެއް ނުވެ އެވެ. މި ހަމަލާތައް ދީފައި މި ވަނީ، ޕާކިސްތާނުގެ ހުޅަނގު އުތުރުގައި ދިން ބޮމުގެ ހަމަލާތައް ހިމެނޭހެން، ހަނގުރާމަވެރިންގެ އާ ހަމަލާތަކެއް ފެށިފައިވާ ދަނޑިވަޅެއްގަ އެވެ. އެ ހަމަލާތަކުގައި ވޭތުވެދިޔަ ދުވަސްތަކުގެ ތެރޭގައި ސަލާމަތީ ބާރުތަކުގެ ގިނަ އަދަދެއްގެ ބަޔަކާއި އާންމުންގެ އެތައް ބަޔަކު ވަނީ މަރުވެފަ އެވެ.
ޕާކިސްތާނުގެ އެތެރޭގައި ދޭ "ޓެރަރިސްޓް" ހަމަލާތަކުގައި ބައިވެރިވާ ހަނގުރާމަވެރިންނަށް ކާބުލްއިން އެހީތެރިކަމާއި ހިމާޔަތްދޭ ކަމަށް އިސްލާމްއާބާދުން ތުހުމަތުކުރެ އެވެ. ނަމަވެސް، ތާލިބާނުންގެ ސަރުކާރުން މި ތުހުމަތުތައް ދޮގުކުރެ އެވެ.
މަސްދަރު: އަނަދޮލު އޭޖެންސީ
