ސާކްގެ ގައުމުތަކުން ހިންގާ ސައުތު އޭޝިއަން ޔުނިވާސިޓީ އިން އަފްޣާނިސްތާނުގެ ދަރިވަރުންނަށް ދޭ ސްކޮލަޝިޕްތައް މެދުކަނޑާލައިފި

ސާކްގެ ގައުމުތަކުން ހިންގާ ސައުތު އޭޝިއަން ޔުނިވާސިޓީ (އެސްއޭޔޫ) އަށް އަފްޣާނިސްތާނުން ދައްކަންޖެހޭ ފައިސާ ނުދައްކާތީ، އެ ގައުމުގެ ދަރިވަރުންނަށް ދެމުން އައި ސްކޮލަޝިޕްތައް އެ ޔުނިވާސިޓީން މެދުކަނޑާލައިފި އެވެ. މި ފިޔަވަޅު އަޅާފައިވަނީ އަފްޣާނިސްތާނުން ފައިސާ ނުދައްކާ އޮތް ނަމަވެސް، އެ ގައުމުގެ ދަރިވަރުންނަށް ސްކޮލަޝިޕްގެ ފުރުސަތުތައް ލިބެމުންދާތީ އެކަމާ މެދު ބޫޓާނުން ކަންބޮޑުވުން ފާޅުކުރުމާ ގުޅިގެންނެވެ.

އެސްއޭޔޫގެ ރައީސް ކޭ.ކޭ. އަގަރްވާލް ވިދާޅުވީ، މާލީ ގޮތުން ހިއްސާނުވާ ގައުމަކަށް ސްކޮލަޝިޕްގެ މަންފާ ލިބެމުންދިއުމަކީ އިންސާފެއް ނޫން ކަމަށް ބޫޓާނުން ބުނެފައިވާ ކަމަށެވެ. އެހެންކަމުން، މެންބަރު ހުރިހާ ގައުމުތަކަކާ މެދުވެސް އަމަލުކުރަންޖެހޭނީ އެއް ހަމައަކުން ކަމަށްވާތީ، އަފްޣާނިސްތާނުގެ ދަރިވަރުންނަށް ދޭ ސްކޮލަޝިޕްތައް ހުއްޓާލަން މަޖުބޫރުވީ ކަމަށް އޭނާ ވިދާޅުވި އެވެ.

"ފައިސާ ގަވާއިދުން ދައްކަމުންދާ ގައުމުތަކުން ވަނީ މިކަމާ މެދު އިއުތިރާޒުކޮށްފައި. ހުރިހާ ގައުމުތަކަކަށް ވެސް ހަމަހަމަ ފުރުސަތުތަކެއް އޮންނަންޖެހޭނެ ކަމަށް ގަބޫލުކުރެވޭތީ، ސްކޮލަޝިޕްތައް މެދުކަނޑާލަން ނިންމީ،" 'ދަ ޓައިމްސް އޮފް އިންޑިއާ' އަށް ދެއްވި އިންޓަވިއުއެއްގައި އަގަރްވާލް ވިދާޅުވިއެވެ.

ޔުނިވާސިޓީގެ މާލީ ރެކޯޑުތަކުން ދައްކާ ގޮތުގައި 2021 ވަނަ އަހަރުން ފެށިގެން އަފްޣާނިސްތާނުން އެއްވެސް ފައިސާއެއް ދައްކާފައެއް ނުވެ އެވެ. އެ ގައުމުން އެންމެ ފަހުން ފައިސާ ދައްކާފައިވަނީ 2020 ވަނަ އަހަރު އެވެ. އެއީ 307,000 އެމެރިކާ ޑޮލަރެވެ. މީގެ އިތުރުން ސްރީލަންކާއިން ވެސް 2021 އިން ފެށިގެން ފައިސާ ދައްކާފައި ނުވި ނަމަވެސް، ޔުނިވާސިޓީން ބުނީ އެއީ ފައިސާ ނުދައްކަން އުޅުން ނޫން ކަމަށާއި، އެއީ ފައިސާ ދެއްކުން ލަސްވުމުގެ މައްސަލައެއް ކަމަށެވެ. ޕާކިސްތާނުން ގިނަ އަހަރުތަކެއް ވަންދެން ފައިސާ ނުދައްކާ އޮތުމަށްފަހު، 2025 ވަނަ އަހަރު ވަނީ 69,921 ޑޮލަރުގެ ޕޭމަންޓެއް ދައްކާފައެވެ.

ކަމާބެހޭ އޮފިޝަލުން ވިދާޅުވި ގޮތުގައި، މިވަގުތު އެސްއޭޔޫގައި ޕާކިސްތާނުގެ އެއްވެސް ދަރިވަރަކު ތައުލީމު ހާސިލުކުރަމުންނެއް ނުދެ އެވެ.

އަގަރްވާލް އިތުރަށް ވިދާޅުވީ، އަފްޣާނިސްތާނުގެ ފައިސާގެ މައްސަލަ ހައްލުނުކުރެވި އޮތީ، އެ ގައުމުގައި މިހާރު އޮތް އިސްލާމިކް އެމިރޭޓްސް އޮފް އަފްޣާނިސްތާން (އައިއީއޭ) ނުވަތަ ތާލިބާން ސަރުކާރު އިންޑިއާއިން ރަސްމީކޮށް ބަލައިގެންފައި ނުވާތީ އެވެ. މީގެ ސަބަބުން އެ ގައުމުގެ ކަމާބެހޭ ފަރާތްތަކާ މުއާމަލާތް ކުރާނެ ރަސްމީ މަގެއް ނެތް ކަމަށް އޭނާ ފާހަގަކުރެއްވި އެވެ.

"އިންޑިއާ ސަރުކާރުން ތާލިބާން ސަރުކާރު ރަސްމީކޮށް ބަލައިގެންފައި ނުވާތީ، ފައިސާގެ މައްސަލަ ހައްލުކުރުމަށްޓަކައި އެ ގައުމާ ވާހަކަދެއްކޭނެ ރަސްމީ ނިޒާމެއް ޔުނިވާސިޓީއަކަށް ނެތް،" އޭނާ ވިދާޅުވި އެވެ.

ސްކޮލަޝިޕް ޕްރޮގްރާމް ހުއްޓާލި ނަމަވެސް، އަފްޣާނިސްތާނުގެ ކަމާބެހޭ ފަރާތްތަކުން ހުއްދަ ދީފިނަމަ، އެ ގައުމުގެ ދަރިވަރުންނަށް، ހާއްސަކޮށް އަންހެން ދަރިވަރުންނަށް އޮންލައިންކޮށް ކިޔަވައިދިނުމުގެ ފުރުސަތު ދޭން ތައްޔާރަށް އޮތް ކަމަށް އަގަރްވާލް ވިދާޅުވި އެވެ.

އޭނާ ވިދާޅުވި ގޮތުގައި، އަފްޣާނިސްތާނުގެ ގިނަ އަދަދެއްގެ ދަރިވަރުން ކިޔަވަން ބޭނުންވެގެން އަދިވެސް މެސެޖު ކުރަމުންދެ އެވެ. ނަމަވެސް އަންހެނުންނަށް ތައުލީމު އުނގެނުމުގައި އޮތް ހުރަސްތަކާއި ވިސާގެ ދަތިތަކާ ހުރެ ގިނަ ކުދިންނަށް ދަތުރުކުރެވޭ ގޮތް ނުވަނީ އެވެ.

"އަފްޣާނިސްތާނުގެ ގިނަ ދަރިވަރުންތަކެއް، ހާއްސަކޮށް އަންހެން ކުދިން، މިތަނުގައި ކިޔަވަން ބޭނުންވެގެން އީމެއިލް ކުރޭ. އެކަމަކު އަންހެނުން ކިޔެވުން މަނާކޮށްފައި އޮތުމާއި ވިސާގެ މައްސަލަތަކާ ހުރެ އެކުދިންނަށް އާދެވޭ ގޮތެއް ނުވޭ. ގައުމެއްގެ އާބާދީގެ ދެބައިކުޅަ އެއްބަޔަށް ތައުލީމު ނުލިބޭނަމަ އެ ގައުމެއް ކުރިއަރާނީ ކިހިނެއް؟" އޭނާ ވިދާޅުވި އެވެ.

އަގަރްވާލް އިތުރަށް ވިދާޅުވީ، ސާކްގެ އެހެން މެންބަރު ގައުމަކުން ނުވަތަ ބޭރުގެ އެހީދޭ އިދާރާއަކުން އަފްޣާނިސްތާނުގެ ހިއްސާ ދައްކައިދޭން އެއްބަސްވެއްޖެނަމަ، އަލުން ސްކޮލަޝިޕްތައް ދޭން ފަށާނެ ކަމަށެވެ. އަދި އިންޑިއާގެ އެޑިއުކޭޝަން މިނިސްޓްރީން ދޭ އައިސީސީއާރު ސްކޮލަޝިޕްތައް، އެސްއޭޔޫގައި ކިޔަވަން ބޭނުންވާ އަފްޣާން ދަރިވަރުންނަށް ފުޅާކޮށްދިނުމަށް ވެސް އޭނާ އެދިވަޑައިގަތެވެ.

2021 ވަނަ އަހަރުން ފެށިގެން 2026 ޖޫން 30 އާ ހަމައަށް ޔުނިވާސިޓީއަށް ލިބުނު ފައިސާގެ ތަފާސްހިސާބުތަކަށް ބަލާއިރު، އެންމެ ބޮޑު ހިއްސާއެއް ދީފައިވަނީ އިންޑިއާއިންނެވެ. އެއީ 65.91 މިލިއަން ޑޮލަރެވެ. ބަންގްލަދޭޝްއިން 2.99 މިލިއަން ޑޮލަރު ދީފައިވާއިރު، ދިވެހިރާއްޖެއިން ވަނީ 1.82 މިލިއަން ޑޮލަރު ދީފަ އެވެ. މީގެ އިތުރުން ބޫޓާނުން 1.35 މިލިއަން ޑޮލަރު، ނޭޕާލުން 1.26 މިލިއަން ޑޮލަރު އަދި ޕާކިސްތާނުން 136,810 ޑޮލަރު ހިއްސާކޮށްފައިވެ އެވެ.

އެސްއޭޔޫއަށް ދަރިވަރުން ހޮވާ އުސޫލަކީ، ކޮންމެ ގައުމަކުން ދައްކާ ފައިސާގެ ނިސްބަތަށް ބަލައިގެން ޖާގަ ކަނޑައެޅުމެވެ. އެގޮތުން އިންޑިއާއަށް 50 އިންސައްތަ ޖާގަ ލިބޭއިރު، ބަންގްލަދޭޝް އަދި ޕާކިސްތާނަށް ކޮންމެ ގައުމަކަށް 10 އިންސައްތަ ޖާގަ ލިބެއެވެ. އަފްޣާނިސްތާން، ބޫޓާން، ދިވެހިރާއްޖެ، ނޭޕާލް އަދި ސްރީލަންކާއަށް ކޮންމެ ގައުމަކަށް 4 އިންސައްތަ ޖާގަ ކަނޑައަޅާފައިވާއިރު، ބާކީ 10 އިންސައްތަ ޖާގަ ހާއްސަކޮށްފައިވަނީ ސާކް ސަރަހައްދުން ބޭރުގެ ދަރިވަރުންނަށެވެ.

ޔުނިވާސިޓީގެ ރެކޯޑުތަކުން ދައްކާ ގޮތުގައި 2024-25 ވަނަ ދިރާސީ އަހަރު އެސްއޭޔޫގައި ކިޔަވަމުންދިޔައީ އަފްޣާނިސްތާނުގެ 10 ދަރިވަރުންނާއި، ބަންގްލަދޭޝްގެ 23 ދަރިވަރުންނާއި، ބޫޓާނުގެ 12 ދަރިވަރުންނާއި، އިންޑިއާގެ 526 ދަރިވަރުންނާއި، ނޭޕާލުގެ 25 ދަރިވަރުން އަދި ސްރީލަންކާގެ 3 ދަރިވަރުންނެވެ. ޕާކިސްތާނާއި ދިވެހިރާއްޖޭގެ އެއްވެސް ދަރިވަރަކު އެ އަހަރު ކިޔަވާފައެއް ނުވެއެވެ.

2026 ވަނަ އަހަރުގެ އެޑްމިޝަނަށް ބަލާއިރު، އަފްޣާނިސްތާނުގެ ދަރިވަރުންގެ ފަރާތުން 157 އެޕްލިކޭޝަން ލިބިފައިވެ އެވެ. މީގެ ތެރޭގައި ފުރަތަމަ ޑިގްރީ، މާސްޓާސް އަދި ޕީއެޗްޑީއަށް އެދި ހުށަހެޅި ކުދިން ހިމެނެ އެވެ. ނަމަވެސް، އެއްވެސް އަފްޣާން ދަރިވަރަކަށް މިފަހަރު ޔުނިވާސިޓީއަށް ވަނުމުގެ ފުރުސަތު ލިބިފައެއް ނުވެ އެވެ.

މިފަހަރު އަލަށް ގުޅުނު ދަރިވަރުންގެ ތެރޭގައި ހިމެނެނީ އިންޑިއާގެ 73 ދަރިވަރުންނާއި، ނޭޕާލުގެ 7 ދަރިވަރުންނާއި، ބަންގްލަދޭޝްގެ 6 ދަރިވަރުން އަދި ސްރީލަންކާގެ 2 ދަރިވަރުންނެވެ. އަފްޣާނިސްތާން، ބޫޓާން، ޕާކިސްތާން، ދިވެހިރާއްޖެ އަދި ސާކް ސަރަހައްދުން ބޭރުގެ އެއްވެސް އާ ދަރިވަރަކު މިފަހަރު ޔުނިވާސިޓީއާ ގުޅިފައެއް ނުވެ އެވެ.