ރިޒާވް ހުސްވެ، ދަރަނި ދެއްކުމަށް ކަސްޓަމަރުންގެ ޑިޕޮސިޓް ފައިސާ ބޭނުންކުރަން ސަރުކާރުން ދަނީ ބޭންކަށް މަޖުބޫރުކުރަމުން: ނަޝީދު
21 ސެޕްޓެމްބަރު 2026 | ހޯމަ 05:26ރާއްޖޭގެ ބޭރުގެ ދަރަނިތައް ދެއްކުމަށް ބީއެމްއެލްގެ ކަސްޓަމަރުންގެ ޑިޕޮސިޓް ފައިސާ ބޭނުންކުރުމަށް ސަރުކާރުން މަޖުބޫރުކުރަމުންދާ ކަމަށް ވިދާޅުވެ، ކުރީގެ ރައީސް މުހައްމަދު ނަޝީދު ކަންބޮޑުވުން ފާޅުކުރައްވައިފި. ރިސޯޓުތަކުގެ އާމްދަނީ މާރުކުރުމުގެ ސިޔާސަތަކީ ހަރުދަނާ ސްޓްރެޓަޖީއެއް ނޫންކަން ފާހަގަކުރައްވައި، ބޭންކުގެ މާލީ ހާލަތު ދެފުށް ފެންނަ ގޮތަށް ހާމަކުރުމަށް އޮޑިޓް ފާމްތަކަށް އެމަނިކުފާނު ވަނީ ގޮވާލައްވާފައި
އެމްޑީޕީގެ ޗެއަރޕާސަން އަދި ކުރީގެ ރައީސް މުހައްމަދު ނަޝީދު | ރާއްޖެއެމްވީ
ދިވެހިރާއްޖޭގެ ރަސްމީ ރިޒާވްގައި ބޭނުންކުރެވޭނެ ބޭރު ފައިސާ މިވަގުތު ނެތް ކަމަށާއި، ދައުލަތުން ދައްކަންޖެހޭ ދަރަނިތައް ދެއްކުމަށްޓަކައި ބޭންކް އޮފް މޯލްޑިވްސް (ބީއެމްއެލް) ގައި ހުރި އާންމު ކަސްޓަމަރުންގެ ޑިޕޮސިޓް ފައިސާ ބޭނުންކުރުމަށް ސަރުކާރުން އެ ބޭންކަށް މަޖުބޫރުކުރަމުންދާ ކަމަށް އެމްޑީޕީގެ ޗެއަރޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރައީސް ނަޝީދު މިހެން ވިދާޅުވީ ރާއްޖޭގެ އިގުތިސާދީ ހާލަތާ ގުޅޭގޮތުން ކަންބޮޑުވުން ފާޅުކުރައްވާ، އެކްސްގައި ކުރެއްވި ޕޯސްޓެއްގަ އެވެ.
ރައީސް ނަޝީދު ވިދާޅުވި ގޮތުގައި، ރާއްޖޭގެ ބޭރުގެ ދަރަނިތަކުގެ ތެރެއިން ބައިލެޓްރަލް ނުވަތަ ދެ ގައުމުގެ ދެމެދުގައިވާ އެއްބަސްވުންތަކުގެ ދަށުން ދައްކަންޖެހޭ 50 މިލިއަން އެމެރިކާ ޑޮލަރު އަދިވެސް ނުދެއްކި އެބައޮތެވެ. ސަރުކާރުން ބޭންކަށް ފިއްތުންތައް ކުރިމަތިކުރުވައިގެން ކަސްޓަމަރުންގެ ފައިސާ ދަރަނި ދެއްކުމަށް ބޭނުންކުރަމުންދާތީ، އޭގެ ނަތީޖާއެއްގެ ގޮތުން ބޭންކުން ފައިސާ ނެގުމުގައި ކަސްޓަމަރުންނަށް ބޮޑެތި ދަތިތަކެއް ކުރިމަތިވެފައިވާ ކަމަށް ނަޝީދު ވިދާޅުވި އެވެ.
އަދި އަންނަ ހަފުތާގެ ތެރޭގައި ކަސްޓަމަރުންގެ މުއާމަލާތްތައް އާންމު ހާލަތަކަށް ގެނެވޭނެ ކަމަށް ބޭންކުން ބުނި ނަމަވެސް އެކަން ބިނާވެފައި ވަނީ ސަރުކާރުގެ އައު ސިޔާސަތުގެ މައްޗަށް ކަމަށް ނަޝީދު ވިދާޅުވި އެވެ. އެއީ ރިސޯޓުތަކަށް ލިބޭ އާމްދަނީގެ 40 އިންސައްތަ މަޖުބޫރުން ދިވެހި ރުފިޔާއަށް މާރުކޮށްގެން ހޯދަން އުންމީދުކުރާ 160 މިލިއަން ޑޮލަރު ލިބުން ކަމަށާއި ނަމަވެސް މިއީ ހަރުދަނާ މާލީ ސްޓްރެޓަޖީއެއް ނޫން ކަމަށް ނަޝީދު ވިދާޅުވި އެވެ. އަދި މިއީ ހަމައެކަނި ހަގީގަތެއް ނެތް އުންމީދުތަކެއްގެ މައްޗަށް ބިނާވެފައިވާ ކަމެއް ކަމަށް ވެސް އެމަނިކުފާނު ވިދާޅުވި އެވެ.
މީގެ އިތުރުން ރައީސް ނަޝީދު ވަނީ ބީއެމްއެލް އަކީ އާންމު ހިއްސާދާރުންގެ މަސްލަހަތު ހިމެނޭ ޕަބްލިކް ބޭންކަކަށް ވާތީ، އެ ބޭންކުގެ މާލީ ހިސާބުތަކާއި ހަގީގީ ހާލަތު އެއްވެސް އޮޅުވާލުމެއް ނެތި ހާމަކުރުމަށް ރާއްޖޭގައި މަސައްކަތްކުރާ ބައިނަލްއަގުވާމީ އޮޑިޓް ފާމްތަކަށް ވެސް ގޮވާލައްވާފަ އެވެ. އަދި އެއްވެސް ފޮރުވުމެއް ނެތި އެކަން އާންމުކުރުމަކީ އޮޑިޓް ފާމްތަކުގެ ޒިންމާއެއް ކަމަށް އެމަނިކުފާނު ވިދާޅުވި އެވެ.
ރާއްޖޭގެ ބޭރު ފައިސާގެ ރިޒާވް ތާރީޚީ މިންވަރަކަށް ދަށަށް ގޮސްފައިވާ މި ދަނޑިވަޅުގައި، އިގުތިސާދީ މާހިރުންނާއި އިދިކޮޅު ފަރާތްތަކުން ދަނީ ސަރުކާރުގެ މާލީ ސިޔާސަތުތަކަށް ވަރަށް ބޮޑަށް ފާޑުކިޔަމުންނެވެ. ހާއްސަކޮށް ބޭރުގެ ދަރަނި ދެއްކުމަށް ދިމާވެފައިވާ ގޮންޖެހުންތަކުގެ ސަބަބުން ރާއްޖޭގެ މާލީ ނިޒާމަށް އޮތް އިތުބާރު ކުޑަވެދާނެ ކަމުގެ ބިރު މިހާރު ވަނީ ބޮޑުވެފަ އެވެ.
