އިޓަލީގެ ބޮލޯނިއާގައި ފުލުހުން ބާރުގެ ބޭނުންކުރުމުގެ ތެރޭގައި މޮރޮކޯއަށް އުފަން މީހަކު މަރުވި މައްސަލައިގައި އިންސާފު ހޯދުމަށް ގޮވާލައި ކުރި މުޒާހަރާ ހޫނުވެއްޖެ
މި ހާދިސާގެ ތަހުގީގު ފަށާފައިވާއިރު، މުޒާހަރާގެ ތެރެއިން ފުލުހުންނާ ކުރިމަތިލައި ހިންގި ހަމަނުޖެހުންތަކުގައި ގިނަ އަދަދެއްގެ އޮފިސަރުންނަށް ވަނީ އަނިޔާވެފައި. ސަރުކާރުން މި ހަމަނުޖެހުންތައް ކުށްވެރިކުރި ނަމަވެސް، އިދިކޮޅު ފަރާތްތަކުން ދަނީ ފުލުހުންގެ އަނިޔާވެރިކަމާ މެދު ކަންބޮޑުވުން ފާޅުކުރަމުން
މޮރޮކޯއަށް ނިސްބަތްވާ ހިޖުރަވެރިއަކު ހައްޔަރުކުރުމުގެ ތެރޭގައި މަރުވުމާ ގުޅިގެން، އިޓަލީގެ ބޮލޯނިއާގައި މުޒާހަރާގެ ބައިވެރިންނާއި ފުލުހުންގެ މެދުގައި ވަރުގަދަ ކުރިމަތިލުންތަކެއް ހިނގައިފި | ސޯޝަލް މީޑިއާ
އިޓަލީގެ އުތުރުގެ ސިޓީއެއް ކަމަށްވާ ބޮލޯނިއާގައި، މޮރޮކޯއަށް އުފަން މީހަކު ދެ ފުލުހަކުވެގެން ބާރުގެ ބޭނުންކޮށް ހިފަހައްޓަން އުޅުމުގެ ތެރޭގައި މަރުވުމާ ގުޅިގެން އެ ގައުމުގައި ބޮޑެތި މުޒާހަރާތަކެއް ފަށައިފި އެވެ.
"އަބްދުއްރަހީމް ފަކީރުގެ މަރަށް އިންސާފު ހޯދައިދިނުމަށް" ގޮވާލައި، ހޯމަ ދުވަހުގެ ރޭ އެތައް ހާސް ބަޔަކު ވަނީ މަގުތަކަށް ނުކުމެފަ އެވެ.
މުޒާހަރާގެ ބައިވެރިންގެ ތެރެއިން ކުޑަ ގްރޫޕެއް ވަކިވެ، ރޭގަނޑުގެ ދަންވަރުގެ ވަގުތުތަކުގައި ފުލުހުންނާ ކުރިމަތިލުންތަކެއް ހިންގާފައިވެ އެވެ. ޕްރޮސެކިއުޓަރުން ވިދާޅުވާ ގޮތުގައި މި ހަމަނުޖެހުންތަކުގައި ފުލުހުންގެ 64 އޮފިސަރަކަށް ވަނީ އަނިޔާވެފަ އެވެ.
އިޓަލީގެ ބޮޑުވަޒީރު ޖޯޖިއާ މެލޯނީ ވިދާޅުވީ، ފަކީރު މަރުވި ގޮތުގެ ހަގީގަތް ހޯދުމަށް ތަހުގީގެއް ހިންގުމަކީ ކޮންމެހެން ކުރަންޖެހޭ ކަމެއް ކަމަށާއި، ނަމަވެސް "ގާނޫނު ތަންފީޒުކުރާ ފަރާތްތަކާ ދެކޮޅަށް ހިންގާ އެއްވެސް އަނިޔާވެރި އަމަލެއް ބަލައިނުގަނެވޭނެ" ކަމަށެވެ.
ފުލުހުން އެ ސަރަހައްދަށް ގޮސްފައިވަނީ އާދީއްތަ ދުވަހުގެ ހެނދުނު، މަސައްކަތްތެރިން ދިރިއުޅޭ އަވަށެއް ކަމަށްވާ ޕިލާސްޓްރޯގައި ފަކީރު "އާދަޔާ ހިލާފު ގޮތްތަކަކަށް އުޅެ"، ގަރާޖުތަކުގެ ދޮރުތަކުގައި ކޮޅުފައިން ޖަހަމުންދާ ކަމަށް ބުނެ އަވަށްޓެރިއަކު ރިޕޯޓުކުރުމާ ގުޅިގެންނެވެ. ފުލުހުން މަސައްކަތް ކުރީ މަސްލަހަތު ހަމައަކަށް އެޅުވުމަށް ކަމަށްވިޔަސް، ފަހުން ވަނީ އޭނާއާ ދެކޮޅަށް ޕެޕަރ ސްޕްރޭ ބޭނުންކޮށްފަ އެވެ.
އިޓަލީގެ މީޑިއާތަކުގައި ދައުރުވަމުންދާ ވީޑިއޯއަކުން ފެންނަ ގޮތުގައި، ފަކީރު ބިންމަތީގައި ބޯވަތަށް ޖަހައިގެން އޮއްވައި ދެ ފުލުހަކު އޭނާގެ ގައިމަތީގައި އިށީނދެގެން ތިބެ އެވެ. އަދި އެކަން ހުއްޓާލުމަށް އެދި އޭނާ އާދޭސްކުރާ އަޑު އިވެ އެވެ. ފުލުހެއް ނޫން ތިންވަނަ މީހަކު އޭނާގެ ފައިގައި ހިފަހައްޓައިގެން އިންނައިރު، ކައިރީގައި އެމަޖެންސީ މަސައްކަތްތެރިން މަޑުކޮށްލައިގެން ތިބި ތަން ފެނެ އެވެ.
ވީޑިއޯ ފެށުނުތާ ދެ މިނެޓެއްހާއިރު ފަހުން، ފަކީރު ގެ ހަރަކާތްކުރުން ހުއްޓޭތަން ފެނެ އެވެ. ފުލުހުން އޭނާގެ އަތާއި ފައި ބަނދެފައިވާއިރު، އޭނާ ހަރަކާތް ނުކުރާކަން އެނގުމުން އެތަނުން އެއް އޮފިސަރަކު އޭނާގެ ކޮލުގައި ދެ ފަހަރަކު ޖަހަ އެވެ. އެމްބިއުލާންސްގެ މުވައްޒަފަކު އޭނާގެ ގާތަށް ދިޔައިރު، ފަކީރު އޮތީ ހޭނެތިފައިކަން ސާފުކޮށް އެނގެ އެވެ.
ބޮލޯނިއާގެ ޕްރޮސެކިއުޓަރުން މިހާރު ވަނީ، އެ ސަރަހައްދުގައި ތިބި ފުލުހުންނާއި ސިއްހީ މުވައްޒަފުންގެ މައްޗަށް އިހުމާލުން މީހަކު މަރުވުމުގެ ތަހުގީގެއް ފަށާފަ އެވެ.
މަންޒަރު ދުށް ބައެއް މީހުން އިޓަލީގެ މީޑިއާތަކަށް މައުލޫމާތު ދެމުން ބުނެފައިވަނީ، ފަކީރު ހުރީ ނަފްސާނީ ގޮތުން ބޮޑު ނުތަނަވަސްކަމެއްގެ ތެރޭގައި ކަމަށް ފެނުނު ނަމަވެސް، އޭނާ އެއްވެސް މީހަކަށް ނުރައްކަލެއް ކުރިމަތިނުކުރާ ކަމަށާއި އޭނާގެ އަތުގައި އެއްވެސް ހަތިޔާރެއް ނެތް ކަމަށެވެ.
"މިފަދަ ގޮތަކަށް މީހަކު މަރުވެގެން ނުވާނެ،" ފަކީރުގެ އަންހެން ކޮއްކޮ ޚަދީޖާ މީޑިއާތަކަށް ބުންޏެވެ. "އެމީހުން އޭނާ މަރާލީ އެއްވެސް ރަހުމެއް ނެތި. އަހަރެން ބޭނުމީ ހަގީގަތް އެނގެން."
ވީޑިއޯއިން ފެންނަ ގޮތުގައި، ފަކީރު ބިންމަތީގައި ބޯވަތަށް ޖަހައިގެން އޮއްވައި ދެ ފުލުހަކު އޭނާގެ ގައިމަތީގައި އިށީނދެގެން ތިބޭ
ބޮލޯނިއާގެ މޭޔަރު މެޓިއޯ ލެޕޯރޭ އިޓަލީގެ 'ލާ ރިޕަބްލިކާ' ނޫހަށް ވިދާޅުވީ، އެ ވީޑިއޯ ބެލި ކޮންމެ މީހަކަށްވެސް ބޮޑު ސިހުމެއް ލިބިފައިވާ ކަމަށެވެ.
ހޯމަ ދުވަހުގެ ހަވީރު ބޮލޯނިއާގެ މަރުކަޒީ ސަރަހައްދުގައި ބޭއްވި މުޒާހަރާއަށް ގޮވާލެއްވީ މޭޔަރެވެ. އަދި އެއްވުމުގެ ސްޓޭޖަށް އެރުމަށް ފަކީރުގެ އާއިލާގެ މެންބަރަކަށް އޭނާ ދައުވަތު ދެއްވި އެވެ.
"އެއީ އަހަރެންގެ ބޮޑުބޭބެ. އޭނާއަކީ ހަމައެކަނި ނަންބަރެއް ނޫން، ނުވަތަ ޚަބަރެއްގެ ފޮޅުވަތެއް ނޫން... އޭނާއަކީ އެންމެންގެ ލޯބި ލިބިފައިވާ މީހެއް،" ފަކީރުގެ އާއިލާގެ ޔޮސްރާ ފަކީރު ބުންޏެވެ. "އޭނާއަކީ އެހީތެރިކަމާއި އަޅާލުން ބޭނުންވި، އަދި އިންސާނީ ކަރާމާތް ހައްގުވާ މީހެއް."
ހޯމަ ދުވަހުގެ ރޭ ބޭއްވި މައި މުޒާހަރާ އަމާންކަމާއެކު ކުރިއަށް ދިޔަ ނަމަވެސް، ގާތްގަނޑަކަށް 100 އެއްހާ މީހުން ފުލުހުންނާ ކުރިމަތިލައި، ދެ ކާރެއްގައި ވަނީ ރޯކޮށްލާފަ އެވެ.
މޭޔަރު ލެޕޯރޭ އަންގާރަ ދުވަހު ވިދާޅުވީ، ބޮލޯނިއާގެ މައިދާނުން ދެ މަންޒަރެއް ފެނިގެންދިޔަ ކަމަށެވެ. އެއީ "އަބްދުއްރަހީމް ފަކީރުގެ އާއިލާއަށް ތާއީދު ކުރުމަށް އެތައް ހާސް ބަޔަކު އަމާންކަމާއެކު އެއްވި މަންޒަރާއި"، އަދި "އަނިޔާވެރިކަމަށް އަނިޔާވެރިކަމުން ރައްދު ދެވިދާނެ ކަމަށް ގަބޫލުކުރާ" ކުޑަ ގްރޫޕެއްގެ އަމަލުތަކެވެ.
ފުލުހުންގެ ޔޫނިއަންގެ ސެކްރެޓަރީ ޖެނެރަލް ޑޮމެނިކޯ ޕިއަނޭސޭ ވަނީ، ފަހުން ހަމަނުޖެހުމަކަށް ބަދަލުވި މުޒާހަރާއަކަށް ގޮވާލެއްވުމަށް މޭޔަރު ނިންމެވި ނިންމެވުމަށް ފާޑުވިދާޅުވެފަ އެވެ. ބޮޑުވަޒީރު ޖޯޖިއާ މެލޯނީ ވެސް ވަނީ ހިނގައިދިޔަ ކަންތައްތަކަކީ "ބަލައިގަނެވޭނެ ކަންތައްތަކެއް ނޫން" ކަމަށް ވިދާޅުވެފަ އެވެ.
މުޒާހަރާގެ ތެރޭގައި ފުލުހުންގެ އުޅަނދެއްގައި ރޯކޮށްލާފައި
ފަކީރުގެ މަރު "ފުރިހަމައަށް ތަހުގީގު ކުރަންޖެހޭނެ" ކަމަށް ވިދާޅުވަމުން ބޮޑުވަޒީރު ވިދާޅުވީ، "ފުލުހުންނާ ދެކޮޅަށް ހިންގާ އަނިޔާވެރިކަން ދިފާއުކުރެވޭނެ އެއްވެސް އުޒުރެއް ނޯންނާނެ" ކަމަށެވެ.
"މި ހާދިސާ ބޭނުންކޮށްގެން ސިޓީގައި ހުޅުޖަހައި، ފުލުހުންނަށް ހަމަލާދީ، ހަމަނުޖެހުން އުފެއްދި މީހުންނަކީ ހަގީގަތް ހޯދަން އުޅުނު ބައެއް ނޫން. އެމީހުން ބޭނުންވީ ކުރިމަތިލުންތަކެއް ހިންގަން،" ބޮޑުވަޒީރު ވިދާޅުވި އެވެ.
އިޓަލީގެ މީޑިއާތަކުން ރިޕޯޓުކުރާ ގޮތުގައި، ފަކީރުގެ އާއިލާ އިޓަލީއަށް ހިޖުރަކުރީ މީގެ 30 އަހަރަށްވުރެ ކުރިންނެވެ. އޭގެ ފަހުން އެމީހުން ދިރިއުޅެމުން ދިޔައީ ބޮލޯނިއާ ކައިރީގަ އެވެ. ފަކީރަކީ މުދާ އުފުލުމާއި ޑެލިވަރީގެ ކުޑަ ވިޔަފާރިއެއް ހިންގަމުން ދިޔަ މީހެކެވެ.
އޭނާގެ ރެސިޑެންސީ ޕާމިޓްގެ ކަންކަމުގައި މަސައްކަތް ކުރެއްވި ގާނޫނީ ވަކީލު ބާބަރާ ސްޕިނެއްލީ ފޭސްބުކްގައި ލިޔުއްވާފައިވަނީ، ފަކީރަކީ "މަސައްކަތްތެރި، ހިތްހެޔޮ މީހެއް" ކަމަށެވެ. އަދި "އޭނާގެ ފުރާނަ ރައްކާތެރިކޮށްދިނުމުގެ މުއައްސަސާގެ ޒިންމާ އޮތް ބައެއްގެ އަތްމަތީގައި އޭނާ މަރުވާންޖެހުނު ސަބަބާ މެދު ސުވާލު އުފެއްދުމަށް" ވަކީލު އެދިފައިވެ އެވެ.
ބޮލޯނިއާގެ މުޒާހަރާގައި ބޭނުންކުރި ބައެއް ބޯޑުތަކުގައި، ފުލުހުންގެ ބެލުމުގެ ދަށުގައި ހުއްޓާ މަރުވި އެހެން މީހުންގެ ހަނދާންތައް އާކޮށްފައިވެއެވެ. އޭގެ ތެރޭގައި 2009 ވަނަ އަހަރު ހަ ދުވަސް ވަންދެން ފުލުހުންގެ ބެލުމުގެ ދަށުގައި ހުއްޓާ މަރުވި ސްޓެފަނޯ ކޫޗީގެ މައްސަލަ ހިމެނެ އެވެ.
ސްޓެފަނޯގެ އަންހެން ކޮއްކޮ އަދި މިހާރުގެ ސެނެޓަރެއް ކަމަށްވާ އިލާރިއާ ކޫޗީ ވަނީ، ފުލުހުންނަށް ތާއީދުކޮށް ސަރުކާރުން ދައްކަމުންދާ ވާހަކަތަކަށް ފާޑުވިދާޅުވެފަ އެވެ.
އިދިކޮޅު އެހެން މެންބަރުންވެސް ވަނީ ފުލުހުންގެ އަމަލުތަކަށް ސަރުކާރުން ހިމާޔަތް ދޭތީ އެކަމަށް ފާޑުވިދާޅުވެފަ އެވެ.
"ކަނާތު ފިޔައިގެ ސިޔާސީ ފަރާތްތަކުން އެމެރިކާގެ އައި.ސީ.އީ (ICE) މޮޑެލް މި ގައުމަށް ތައާރަފްކުރަން ބޭނުންވާނަމަ، މިއީ އެކަމަށް އެންމެ އެކަށީގެންވާ ގައުމެއް ނޫން،" ޑިމޮކްރެޓިކް ޕާޓީގެ ފްރާންސެސްކޯ ބޮޗިއާ މީޑިއާތަކަށް ވިދާޅުވި އެވެ.
