ކައުންސިލް އިންތިޚާބާ ދިމާކޮށް ދަރަވަންދޫ އެއަރޕޯޓުގެ އައު ޓާމިނަލުގެ ބިންގާ އެޅި ނަމަވެސް މިއަދު އެ މަޝްރޫއު އޮތީ ވާނުވާގައި!
19 ސެޕްޓެމްބަރު 2026 | ހޮނިހިރު 07:38ބ. ދަރަވަންދޫ އެއަރޕޯޓުގެ އައު ޓާމިނަލްގެ ބިންގާ އެޅިތާ ގިނަ މަސްތަކެއް ވީއިރުވެސް އަމަލީ މަސައްކަތް ނުފެށި މަޝްރޫއު ހުއްޓިފައިވާތީ އާޔަތުﷲ ވަނީ ކަންބޮޑުވުންފާޅު ކުރައްވާފައި. އޭނާ ވިދާޅުވީ އިންތިޚާބާ ދިމާކޮށް ސަރުކާރުގެ އިސްވެރިން ބިންގާ އެޅުއްވި ނަމަވެސް، މިހާރު އެ މަޝްރޫއަށް ވީނުވީއެއް ނޭނގޭ ކަމަށާއި މިއީ ރައްޔިތުންނަށް އޮޅުވާލުން ކަމަށް
ބ.ދަރަވަންދޫ އެއަރޕޯޓު، މި އެއަރޕޯޓުގެ ތަރައްގީއަށް އެއްވެސް މަސައްކަތެއް ކުރިއަށް ނުގެންދޭ | ޕީއެސްއެމް
ބ. ދަރަވަންދޫ އެއަރޕޯޓުގައި އައު ޓާމިނަލެއް އެޅުމަށް ބިންގާ އެޅިތާ މަސްތަކެއް ވެގެން ދިޔައިރު ވެސް އަމަލީ އެއްވެސް މަސައްކަތެއް ނުފެށި، މަޝްރޫއު ހުއްޓިފައިވާ ކަމަށް ބުނެ ކަންބޮޑުވުން ފާޅުކޮށްފި އެވެ.
ރާއްޖެޓީވީގެ ވައުދުނާމާ ޕްރޮގްރާމްގައި ވާހަކަދައްކަވަމުން އެމްޑީޕީ ގައުމީ މަޖިލީހުގެ ބ.ހިތާދޫ ދާއިރާގެ ރައީސް އާޔަތުﷲ ވިދާޅުވީ، ބ. އަތޮޅުގައި އޮތް ހަމައެކަނި އެއަރޕޯޓަކީ ދަރަވަންދޫ އެއަރޕޯޓު ކަމަށާއި، އެ އެއަރޕޯޓުގެ އައު ޓާމިނަލްގެ ބިންގާ އެޅީ ޓްރާންސްޕޯޓް މިނިސްޓަރު މުހައްމަދު އަމީން އާއި އައިލެންޑް އޭވިއޭޝަންގެ އިސްވެރިން އަދި ސަރުކާރުގެ އިސް ބޭފުޅުން ބައިވެރިވެވަޑައިގެން ކަމަށެވެ.
ރާއްޖެޓީވީގެ ވައުދުނާމާ ޕްރޮގްރާމްގައި އެމްޑީޕީ ގައުމީ މަޖިލީހުގެ ބ.ހިތާދޫ ދާއިރާގެ ރައީސް އާޔަތުﷲ ވާހަކަ ދައްކަވަނީ | ރާއްޖެއެމްވީ
ނަމަވެސް، ބިންގާ އެޅިފަހުން 6 އާއި 8 މަސް ދުވަސް ވެގެން ދިޔައިރު ވެސް އެ މަސައްކަތުގެ އެއްވެސް އަމަލީ ހަރަކާތެއް އެތަނުން ފެންނަން ނެތް ކަމަށް އޭނާ ވިދާޅުވި އެވެ.
ހަމައެކަނި އައިލެންޑް އޭވިއޭޝަންއަށް ފައިދާވާ އޮޕަރޭޓް ކުރާ އެއަރޕޯޓު އޮތީ ބ.ދަރަވަންދޫގައި. ވަރަށް ބޮޑަށް ފޫގަޅާފައި އައިލެންޑް އޭވިއޭޝަންގެ އެމްޑީ އާ ޓްރާންސްޕޯޓް މިނިސްޓަރު. އޭރު އަޅުގަނޑު ހަނދާން ވަނީ އަމީން ހުންނެވީ. އަމީނުއާ ބައިވަރު ސަރުކާރުގެ އެތައް ބަޔަކު ކައުންސިލް އިންތިޚާބު ތެރޭގައި އާ ޓާމިނަލެއް އަޅާނަމޭ ކިޔާ ބިންގާ އެޅީ. މިހާރު އެ ބޭފުޅުންނަކަށް އަޅުގަނޑަކަށް ހަނދާނެއް ނުވޭ މިހާރު ބިންގާ އެޅުނުކަމެއް ވެސް މިނިސްޓަރު އަމީނަށް ވެސް އެގިލައްވާ ކަމެއް. އެ ލެވެލްގައި އެ ބޭފުޅުން އެ ތިބެނީ. ހެޔޮ ނުވާނެ ރައްޔިތުންނަށް މިހާ ވަރަށް އޮޅުވާލާކަށްއާޔަތުﷲ
އާޔަތުﷲ ވިދާޅުވީ، ރައްޔިތުން އެ ޓާމިނަލަށް އިންތިހާއަށް ބޭނުންވެފައި ތިބި ނަމަވެސް، މިއަދު އެ މަޝްރޫއަށް ވީނުވީއެއް ނޭނގޭ ހިސާބަށް ކަންކަން ގޮސްފައިވާ ކަމަށެވެ.
މީގެއިތުރުން، ރައީސް މުއިއްޒުގެ މި ސަރުކާރުގައި ބ. އަތޮޅުގެ ހުރިހާ ރަށެއްގެ ވެސް ތަރައްގީގެ މަޝްރޫއުތައް ހިނގަމުންދަނީ ފިނިހަކަ ދުވެލީގައި ކަމަށާއި، މިހާރު މި މަޝްރޫއުތައް ކުރިއަށްދާނެ ކަމުގެ އެއްވެސް އުއްމީދެއް ވެސް ނެތް ކަމަށް އޭނާ ވިދާޅުވި އެވެ.
