ކައުންސިލް އިންތިޚާބާ ދިމާކޮށް ދެކުނުގެ ހަތަރު އަތޮޅު ވައިގެ މަގުން ގުޅާލައި، އަގުތައް އާއްމު ކޮށްފި
ފެބްރުއަރީ މަހުގެ ތެރޭގައި ގއ އަތޮޅު، ގދ އަތޮޅު، ފުވައްމުލަކު ސިޓީ އަދި އައްޑޫ ސިޓީ އަށް ދަތުރުތައް ފަށާނެ. އަދި މިހާރު ވަނީ ބުކިންއަށް ހުޅުވާލާފައި.
މޯލްޑިވިއަންގެ ފްލައިޓެއް މުލީ އެއަރޕޯޓުގައި- | މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓަކްޗަރ
ރާއްޖޭގެ ދެކުނުގެ ހަތަރު އަތޮޅު ވައިގެ މަގުން ގުޅާލައި، އަގުތައް އާއްމު ކޮށްފި އެވެ.
ހުކުރު ދުވަހު އައްޑޫ ސިޓީ އެއަރޕޯޓު ގައި ބޭއްވި ޚާއްސަ ރަސްމިއްޔާތެއް ދަތުރުތައް ފެށުމުގެ ހުއްދަ މޯލްޑިވިއަންއާ ހަވާލުކޮށްދެއްވީ ޓްރާންސްޕޯޓު މިނިސްޓަރު އަމީނެވެ. މޯލްޑިވިއަންގެ ފަރާތުން އެ ހުއްދައާ ހަވާލުވެވަޑައިގެންނެވީ އެ ކުންފުނީގެ މެނޭޖިން ޑިރެކްޓަރު އިބްރާހިމް އިޔާސްއެވެ.
މޯލްޑިވިއަން އިން ބުނީ ފެބްރުއަރީ މަހުގެ ތެރޭގައި ގއ އަތޮޅު، ގދ އަތޮޅު، ފުވައްމުލަކު ސިޓީ އަދި އައްޑޫ ސިޓީ އަށް ދަތުރުތައް ފަށާނެ ކަަމަށެވެ. އަދި މިހާރު ވަނީ ބުކިންއަށް ހުޅުވާލާފަ އެވެ.
މި ދަތުރުތައް ކުރުމަށް ހަމަޖެހިފައިވަނީ މޯލްޑިވިއަންގެ ކުދި ބޯޓުތައް، އެއްގަމު ރަންވޭ ތަކަށް ޖެއްސޭ ގޮތަށެވެ.
މިމަޝްރޫއާ ގުޅޭގޮތުން އައިލެންޑް އޭވިއޭޝަންގެ މެނޭޖިންގ ޑިރެކްޓަރު އިބްރާހިމް އިޔާސް ވިދާޅުވީ، މި ޚިދުމަތުގެ ސަބަބުން ދެކުނުގެ ރައްޔިތުންނަށް ވަރަށް ބޮޑު ލުޔެއް ލިބޭނެ ކަމަށާއި، ހަފުތާގެ ކޮންމެ ދުވަހަކު ވެސް މި ދަތުރުތައް ކުރާނެ ކަމަށެވެ.
މީގެ އިތުރުން ޓްރާންސްޕޯޓު މިނިސްޓަރު މުހައްމަދު އަމީން ވިދާޅުވީ މި މަޝްރޫއާއެކު ދެކުނުގެ ފަތުރުވެރިކަމާއި އިގުތިސާދަށް ކުރިއެރުން ލިބޭނެ ކަމަށެވެ. އަދި މިހާރު އެންމެ ބޮޑު ގޮންޖެހުމަކީ ދަތުރުފަތުރަށް އޮތް ދަތިކަމާއި އުދަނގޫކަން ކަމަށާއި، ނަމަވެސް ފްލައިޓްތައް ދަތުރު ކުރަން ފެށުމުން ދަތުރުފަތުރަށް ވަރަށް ބޮޑު ލުޔެއް ލިބޭނެ ކަމަށެވެ.
ހަތަރު އަތޮޅުތަކަށް ދަތުރުކުރާ އަގުތަކަކީ
- ގަން - ފުވައްމުލަކު: ކޮޅަކަށް 500 ރުފިޔާ
- ގަން - ކާޑެއްދޫ: ކޮޅަކަށް 900 ރުފިޔާ
- ގަން - ކޫއްޑޫ: ކޮޅަކަށް 900 ރުފިޔާ
- ފުވައްމުލަކު - ކާޑެއްދޫ: ކޮޅަކަށް 650 ރުފިޔާ
- ފުވައްމުލަކު - ކޫއްޑޫ: ކޮޅަކަށް 650 ރުފިޔާ
މި ޚިދުމަތަށް ބޭނުން ކުރަނީ ޑީއެޗްސީ-6-300 ޓްވިން އޮޓާ ބޯޓެވެ.
ރާއްޖޭގެ ދެކުނުގެ ހަތަރު އަތޮޅު ވައިގެ މަގުން ގުޅާލައި، އަގުތައް އާއްމު ކުރިއިރު، ކުރިއަށް އޮތް ލޯކަލް ކައުންސިލް އިންތިޚާބާ ދިމާކޮށް މިފަދަ ގިނަ ޚިދުމަތްތައް ފަށާނެ ކަމަށް ގިނަ ބަޔަކު ދަނީ ބުނަމުންނެވެ. އަދި އިންތިޚާބު ނިމުމާއެކު، ދަތުރުތައް ހުއްޓޭނެ ކަމަށް ވެސް ބައެއް މީހުން ތުހުމަތު ކޮށްފައިވެ އެވެ. މިއީ އިންތިޚާބާ ދިމާކޮށް، ކެންޕޭންގެ ހަރަކާތްތައް ކުރިއަށް ގެންދިއުމުގެ މަގުސަދުގައި ފެށި މަޝްރޫއެއް ކަމަށް ތުހުމަތުކޮށް ސަރުކާރަށް ފާޑު ކިޔާފައިވެ އެވެ.
މީގެ އިތުރުން ކުރީ ސަރުކާރުގައި ފަށާފައިވާ އާރްޓީއެލް ފެރީ ޚިދުމަތަށް ވަރަށް ބޮޑަށް މިސަރުކާރުން އިހުމާލުވަމުންދާ ކަމަށާއި، ފެރީ ދަތުރުތައް ކެންސަލް ކުރާ މައްސަލަ ވަނީ ބޮޑުވެފަ އެވެ. އަދި ކޫއްޑޫ އެއަރޕޯޓު އަދި ކާޑެއްދޫ އެއަރޕޯޓު އިތުރަށް ތަރައްގީ ނުކުރުމުގެ އިތުރުން ރަނގަޅު ޚިދުމަތެއް ނުލިބޭ ކަމަށް ގިނަ ބަޔަކު ބުނެ އެވެ.
