ބައިނަލްއަގުވާމީ އެއަރލައިނެއް އުފައްދަން އައިލެންޑް އޭވިއޭޝަނާއި އެމްއެފްއެމްސީއިން އެއްބަސްވުމެއްގައި ސޮއިކޮށްފި

މޯލްޑިވްސް ފަންޑް މެނޭޖްމަންޓް ކޯޕަރޭޝަން (އެމްއެފްއެމްސީ) އާއި އައިލެންޑް އޭވިއޭޝަނާ ދެމެދު އައު ބައިނަލްއަގުވާމީ އެއަރލައިނެއް އުފެއްދުމުގެ އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގައި ސޮއިކޮށްފައިވަނީ އިކޮނޮމިކް މިނިސްޓްރީގައި އެކަމަށްޓަކައި ބުރާސްފަތި ދުވަހު ބޭއްވި ހާއްސަ ރަސްމިއްޔާތެއްގައެވެ. މި އެއްބަސްވުމަކީ ވައިގެ ދަތުރުފަތުރާއި، ކަނެކްޓިވިޓީއަށް ބައިނަލްއަޤްވާމީ ފެންވަރުގައި އިންގިލާބީ ބަދަލުތަކެއް ގެނައުމަށް ފެށުނު ވަރަށް އުއްމީދީ ދަތުރެއްކަމަށް އެމްއެފްއެމްސީން ބުންޏެވެ. އަދި މި އެއްބަސްވުމަކީ މޯލްޑިވްސް ފަންޑް މެނޭޖްމަންޓް ކޯޕަރޭޝަނާއި އައިލެންޑް އޭވިއޭޝަން ގުޅިގެން ސްޓްރެޓެޖިކް ގޮތުން ކުރިއަށް ދިއުމަށް ލިބުނު ވަރަށް ބޮޑު ކުރިއެރުމެއްކަމަށް ވެސް ބުންޏެވެ.

އެމްއެފްއެމްސީން ބުނެފައިވާ ގޮތުގައި މި އެއްބަސްވުމުގެ ދަށުން ތައާރަފު ކުރެވިގެންދާނީ ރާއްޖޭގެ ރީތިކަމާއި މެހޭމާންދާރީގެ ފުރިހަމަކަން ދައްކުވައިދޭ ވޯލްޑް ކްލާސް އިންޓަރނޭޝަނަލް އެއަރލައިނެއް ކަމަށެވެ. އަދި މިއީ ރާއްޖެ، ދުނިޔެއާ ގުޅުވައި، ރާއްޖޭގެ އިގްތިސާދީ ކުރިއެރުމަށް އެހީތެރިކަން ފޯރުކޮށްދިނުމުގެ ވިސްނުމަކާއެކު ތައާރަފު ކުރާ އެއަރލައިނެއް ކަމަށް ވެސް އެ ކޯޕަރޭޝަނުން ބުންޏެވެ.

މި ބައިނަލްއަޤްވާމީ އެއަރލައިންގެ އަމާޒަކީ އެކި މަންޒިލްތަކާއި ދިވެހިރާއްޖެ ގުޅުވާލަދީ، ފަސިންޖަރުންނަށް ފަސޭހަކަމާއެކު ދަތުރުކުރެވޭނެ ފެންވަރު ރަނގަޅު ވައިގެ ދަތުރުފަތުރުގެ ޚިދުމަތެއް ފޯރުކޮށްދިނުމެވެ. އެގޮތުން މިއީ ހަމައެކަނި ޗައިނާ، ޔޫރަޕް އަދި ރަޝީއާ މަކެޓްތަކަށް ބަރޯސާވުމުގެ އިތުރުން، އައު މަންޒިލްތަކަށްވެސް ރާއްޖެ ހުޅުވާލުމަށް މަސައްކަތްކުރާނެ އެއަރލައިނަކަށް ވެގެންދާނެ ކަމަށް އެމްއެފްއެމްސީން ބުންޏެވެ.

މިއީ ދެމެހެއްޓެނިވިގޮތެއްގައި ރާއްޖޭގެ ފަތުރުވެރިކަމާއި އިގްތިސާދު ކުރިއެރުވުމުގެ އިތުރުން ވައިގެ ދަތުރުފަތުރުގެ ދާއިރާވެސް އައު ހަރުފަތަކަށް ގެންގޮސްދޭނެ މުހިންމު ޕްރޮޖެކްޓެއްގެ ގޮތުގައި ދެ ކުންފުނިން ވެސް ފާހަގަކުރެއެވެ.