ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ކެމްޕެއިން މެނޭޖަރު އަދި ހިނގަމުންދާ ސަރުކާރުގެ ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރު މުޙައްމަދު އަމީނަށް 2 މިލިއަން ރުފިޔާގެ ބަދަލެއް ދިނުމަށް އައިލެންޑް އޭވިއޭޝަނުން ނިންމައިފިއެވެ.

މައްސަލައިގައި ކަން ހިނގާފައިވާ ގޮތަށް ބަލާއިރު، މުޙައްމަދު އަމީން އައިލެންޑް އޭވިއޭޝަން ސަރވިސަސް ލިމިޓެޑުގައި އަދާކުރަމުން ދިޔަ ޑިރެކްޓަރ ފްލައިޓް އޮޕަރޭޝަންސްގެ މަޤާމުން ވަކިކޮށް އެއަށްވުރެ ދަށް މަޤާމަކަށް ބަދަލުކުރަން ނިންމާފައިވަނީ ދެފަރާތުގެ ދެމެދު ވެފައިވާ ވަޒީފާގެ އެއްބަސްވުމާ ޚިލާފަށްކަމަށް ކަނޑައަޅައިދިނުމަށް އަމީންގެ ފަރާތުން ސިވިލް ކޯޓަށް މައްސަލައެއް ހުށައެޅިއެވެ.

އަދި އަމީން އަދާކުރަމުންދިޔަ ޑިރެކްޓަރ ފްލައިޓް އޮޕަރޭޝަންސްގެ މަޤާމު ނުވަތަ އެފެންވަރުގެ އެހެން މަޤާމެއް ހަމަޖެއްސުމަށާއި، ލިބެންޖެހޭ މުސާރަ އާއި އިނާޔަތް އަދި އެލަވަންސް ދިނުމަށް އައިލެންޑް އޭވިއޭޝަން ސަރވިސަސް ލިމިޓެޑަށް އެންގުމަށްވެސް އޭނާގެ ފަރާތުން އެދިފައިވެއެވެ.

ސިވިލް ކޯޓުން މި މައްސަލަ ނިމުނީ އަމީންއާ އެއްކޮޅަށެވެ. ވުމާއެކު، އައިލެންޑް އޭވިއޭޝަންގެ ފަރާތުން މި މައްސަލަ ހައިކޯޓުގައި އިސްތިއުނާފުކުރީއެވެ.

ހައިކޯޓުން މި މައްސަލައިގައި ޙުކުމްކޮށްފައިވަނީ 20 ނޮވެމްބަރު 2023ގައެވެ. ހައިކޯޓުން ކުރި ޙުކުުމުގައި ބުނެފައިވަނީ، މި މައްސަލަ ދެފަރާތުން ކޯޓުން ބޭރުގައި ޙައްލުކޮށްފައިވާ ކަމަށެވެ.

އަދި ސިވިލް ކޯޓުގެ ގަޒިއްޔާއާ އެއްގޮތަށް އޭނާގެ ވަޒީފާ އިއާދަކޮށް، 2،202،508.02 (ދެމިލިއަން ދެލައްކަ އައްޑިހަ ދެހާސް، ފަސްސަތޭކަ އަށް ރުފިޔާ ދެ ލާރި) ބަދަލުގެ ގޮތުގައި ދިނުމަށް ދެފަރާތުގެ ދެމެދުގައި މިހާރު އެއްބަސްވުމަކަށް އާދެވިފައިވުމާއެކު، ހައިކޯޓަށް ހުށައަޅާފައިވާ މައްސަލަ އަނބުރާ ގެންދިއުމަށް އައިލެންޑް އޭވިއޭޝަނުން ވަނީ ނިންމާފައެވެ.

އެގޮތުގެ މަތިން 16 ނޮވެމްބަރު 2023 ގައި އައިލެންޑް އޭވިއޭޝަނުން ވަނީ މި މައްސަލައިގެ ދައުވާ ފޯމު އަނބުރާ ގެންދިއުމަށް ކޯޓުގައި އެދިފައެވެ. އެއީ އައު ރައީސް ޑރ މުޙައްމަދު މުއިއްޒު ހުވާކުރެއްވުމުގެ އެއްދުވަސް ކުރިއެވެ.

އައިލެންޑް އޭވިއޭޝަނުން މިހާރު މި މައްސަލަ ކުރިއަށް ގެންދަން ބޭނުންނުވާތީ ހައިކޯޓުން ވަނީ އެ ކުންފުނީގެ އެދުމުގެ މަތިން މި މައްސަލައިގެ ދައުވާ ފޯމު ބާތިލުކޮށްދިނުމަށް އެދިފައެވެ.

އަމީނަކީ މި ސަރުކާރުގެ ޓްރާންސްޕޯޓާއި، ސިވިލް އޭވިއޭޝަންގެ ކަންކަން ބެލުމާ ޙަވާލުވެވަޑައިގެން ހުންނެވި ވަޒީރެވެ.