އަތޮޅުތެރޭގެ ނުވަ އެއަރޕޯޓެއް އެމްއޭސީއެލްގެ ދަށަށް ބަދަލުކޮށް، ރީޖަނަލް އެއަރޕޯޓް އުވާލުމުގެ މަސައްކަތް ދަނީ ކުރިޔަށް
ރީޖަނަލް އެއާޕޯޓްސް ކޮމްޕެނީގެ އެންމެހާ އޮޕަރޭޝަންތައް މޯލްޑިވްސް އެއާޕޯޓްސް ކޮމްޕެނީ ލިމިޓެޑްގެ ދަށަށް ވަނީ ބަދަލުކޮށްފަ
ޅ. މަޑިވަރުގައި ތަރައްގީކުރި އެއާޕޯޓް: ކުރިން ރީޖަނަލް އިން އޮޕަރޭޓް ކުރި ހުރިހާ އެއާޕޯޓެއް އެމްއޭސީއެލްގެ ދަށަށް ގެނައުމަށް ވަނީ ނިންމާފަ
ޑޮމެެސްޓިކް އެއަރޕޯޓްތައް ކުރިން ހިންގަމުން އައި ރީޖަނަލް އެއަރޕޯޓްސް ކޮމްޕެނީގެ ހުރިހާ އޮޕަރޭޝަންތަކެއް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ ދަށަށް ބަދަލުކޮށްފި އެވެ.
ރީޖަނަލް އެއަރޕޯޓްސްތައް އެމްއޭސީއެލްގެ ދަށަށް ބަދަލުކޮށް ރީޖަނަލް އެއަރޕޯޓްސް ކޮމްޕެނީ އުވާލުމަށް ސަރުކާރުން ވަނީ ނިންމާފަ އެވެ.
ދައުލަތުގެ ހަރަދު ކުޑަކުރުމުގެ ބޭނުމުގައި ރީޖަަނަލް އެއަރޕޯޓްސްގެ ދަށަށް ބަދަލުކުރަން ސަރުކާރުން ނިންމާފައިވާކަން މީގެ އަހަރެއްހާ ދުވަސް ކުރިން ރައީސް ޑރ. މުހައްމަދު މުއިއްޒު އޮތީ ހާމަކުރައްވައިފަ އެވެ.
މޯލްޑިވްސް އެއަރޕޯޓްސް ކޮމްޕެނީން ބުނީ މީގެ ދެ ހަފްތާއެއްހަ ދުވަސްކުރީން ފެށިގެން އަތޮޅުތެރޭގައި ރީޖަނަލް އެއާޕޯޓްގެ ދަށުގައި ހުރި ހުރިހާ އެއަރޕޯޓެއްގެ ހިންގުމާއި އެމްއޭސީއެލް އިން ހަވާލުވެފައިވާ ކަމަށެވެ. އެ ގޮތުން ޖުމްލަ ނުވަ އެއަރޕޯޓެއްގެ ހިންގުން އެ ކުންފުނީގެ ބެލުމުގެ ދަށަށް ވަނީ ގެނެސްފަ އެވެ.
މި ނިންމުމާއެކު އެއަރޕޯޓްތަކުގެ މަރާމާތު ކުރުމާއި ހިންގުން ހަރުދަނާކޮށް ހިދުމަތްތައް އިތުރަށް ރަނގަޅު ކުރާނެ ކަމަށް އެ ކުންފުނިން ވަނީ ބުނެފަ އެވެ.
ރީޖަނަލް އެއާޕޯޓްސް އިން ހިންގަމުން އައި ހުރިހާ އެއަރޕޯޓެއްގެ ގްރައުންޑް އޮޕަރޭޝަންތައް މިހާތަނަށް ބަލަހައްޓަމުން އައީ އައިލެންޑް އޭވިއޭޝަނުންނެވެ.
އެހެން ނަމަވެސް މި ނުވަ އެއަރޕޯޓުގެ ގްރައުންޑް އޮޕަރޭޝަނާ ވެސް މިހާރު ހަވާލުވެފައި ވަނީ އެމްއޭސީއެލް އަށެވެ. އަދި ރީޖަނަލް އެއާޕޯޓްސްގެ މުވައްޒަފުންގެ ކަންކަން ވެސް މިހާރު ވާނީ އެމްއޭސީއެލް އަށް ބަދަލުކޮށްފަ އެވެ.
ރީޖަނަލް އެއަރޕޯޓްސްގެ ދަށުން ހިންގަމުން އައި ހުރިހާ އެއަރޕޯޓަކާއި އެމްއޭސީއެލް އިން ހަވާލުވުމާ އެކު ސަރުކާރުން ކަނޑައަޅާފައިވާ ގޮތަށް ރީޖަނަލް އެއަރޕޯޓްސް ކޮމްޕެނީ އުވާލުމުގެ މަސައްކަތް ވަނީ ފަށާފަ އެވެ. އެހެން ނަމަވެސް އިދާރީ ހުރިހާ ކަމެއް ނިންމުމަށް ފަހު އެ ކުންފުނި އުވާލެވޭނެ ސީދާ ތާރީހެއް އަދި ނޭންގެ އެވެ.
އެ މަސައްކަތް ބާރު ސްޕީޑުގައި ކުރިއަށް ގެންދާނެ ކަމަށް ސަރުކާރުން ވަނީ ބުނެފަ އެވެ. އެގޮތުން މިހާރުވެސް ބައެއް އެއަރޕޯޓްތަކުގެ މަސައްކަތް ދަނީ ކުރިއަށެވެ.
އަދި ބައެއް އެއަރޕޯޓްތައް ވެސް އެޅުމަށް ނިންމާފައިވާއިރު، ބައެއް މަސައްކަތް ހަވާލުކޮށްފައި ވަނީވެސް އެމްއޭސީއެލްއަށެވެ. އެ ގޮތުން މަކުނުދޫ އެއާޕޯޓާއި މަތިވެރި އެއަރޕޯޓް އަޅަން ހަވާލުކޮށްފައި ވަނީ އެމްއޭސީއެލް އިންނެވެ.
ރީޖަނަލް އެއަރޕޯޓްސް ކުންފުނި އެމްއޭސީއެލްއާ އެއްކޮށްލަން ސަރުކާރުން ނިންމީ މިދިޔަ އަހަރުގެ ސެޕްޓެމްބަރުމަހު އެވެ. ސަރުކާރުގެ އެހެން ބައެއް ކުންފުނިތައް އެއްކޮށްލަން ވެސް އޭރު ނިންމި އެވެ.
