އައިލެންޑް އޭވިއޭޝަންގެ ޑިރެކްޓަރުންގެ ބޯޑުގެ ނޮން-އެގްޒެކްޓިވް މެންބަރުކަމުގެ މަޤާމަށް އއ.ރަސްދޫ ފުނަމާލެ، އަހްމަދު ޝާކިރު އައްޔަނުކޮށްފި އެވެ.

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އަންގާރަ ދުވަހު އެކްސްގައި ކުރި ޕޯސްޓެއްގައި މި މައުލޫމާތު ހާމަކޮށްފައިވެ އެވެ.

އައިލެންޑް އޭވިއޭޝަންގެ ބޯޑަށް ވަޑައިގަތުމުގެ ކުރިން ޝާކިރު ހުންނެވީ އާސަންދަ ކޮމްޕެނީގެ ޑިރެކްޓަރުންގެ ބޯޑުގެ ނޮން-އެގްޒެކްޓިވް މެންބަރުކަމުގަ އެވެ. 2023 ވަނަ އަހަރުގެ ޑިސެމްބަރު މަހުގެ 24 ވަނަ ދުވަހު އާސަންދަ ބޯޑުގެ ނޮން-އެގްޒެކެޓިވް ޑިރެކްޓަރެއްގެ މަޤާމުގައި، ބޯޑުގެ ހުރިހާ ކޮމިޓީއެއްގައި އަލްފާޟިލް އަޙްމަދު ޝާކިރު ވަނީ މަސައްކަތް ކުރައްވާފަ އެވެ.

ޝާކިރު ވަނީ ސަރުކާރުގެ ސިއްހީ ދާއިރާގައި ވަރަށް ގިނަ މަޤާމުތައް ފުރުއްވާފަ އެވެ. މީގެ ތެރޭގައި މިނިސްޓްރީ އޮފް ހެލްތުގެ ޑިރެކްޓަރުކަމާއި، ހުޅުމާލެ ހޮސްޕިޓަލުގެ ޑިރެކްޓަރުކަމާއި، ރީޖަނަލް ހެލްތު އެޑްމިނިސްޓްރޭޓަރ ގެ މަޤާމު ފަދަ މަޤާމުތައް ހިމެނެ އެވެ.

ތަޢުލީމީ ދާއިރާއިން ބަލާއިރު، ޝާކިރު ވަނީ އިންޑިއާގެ އިންޓަރނޭޝަނަލް އިންސްޓިޓިއުޓް ފޮރ ޕޮޕިއުލޭޝަން ސައިންސްއިން ގްރެޖުއޭޓް ޑިޕްލޮމާ އިން ހެލްތު އެޑިއުކޭޝަން ޙާސިލުކުރައްވާފަ އެވެ. މީގެ އިތުރުން އެޑްވާންސް ސެޓިފިކޭޓް އިން ކޮމިއުނިޓީ ހެލްތު ވޯކަރ ވެސް ފުރިހަމަކުރައްވާފައިވެ އެވެ.