ޝައިޚް ހަސީނާގެ 7 މުޝީރަކަށް މަރުގެ އަދަބުދޭން ހުކުމްކޮށްފި
15 ސެޕްޓެމްބަރު 2026 | އަންގާރަ 08:53ބަންގްލަދޭޝްގެ ކުރީގެ ބޮޑުވަޒީރު ޝައިޚް ހަސީނާގެ އަރިސް ހަތް ބޭފުޅަކު އިންސާނިއްޔަތާ ޚިލާފު ޖަރީމާތައް ހިންގިކަން ސާބިތުވެ، އެ ބޭފުޅުން މެރުމަށް އެ ގައުމުގެ ކޯޓަކުން ހުކުމްކޮށްފި. މި މައްސަލާގައި ކުށް ސާބިތުވި ބައެއް ބޭފުޅުންގެ މުދާ ދައުލަތަށް ނަގައި، ހަމަނުޖެހުންތަކުގައި އަނިޔާވި އާއިލާތަކަށް ބަދަލު ދިނުމަށް ވެސް ވަނީ އަމުރުކޮށްފައި
ބަންގްލަދޭޝްގެ ވެރިރަށް ދާކާގައި ހުންނަ ޖަލެއްގެ ދޮރުމަތީގައި، ހަތިޔާރު އެޅި ފުލުހުން ސަފު ހަދައިގެން ފޯރިމަރަނީ | އަނަދޮލޫ
ވެރިކަމުން ދުރުކޮށްފައިވާ ބަންގްލަދޭޝްގެ ކުރީގެ ބޮޑުވަޒީރު ޝައިޚް ހަސީނާގެ އަރިސް ހަތް މުޝީރަކު، 2024 ވަނަ އަހަރުގެ އިންގިލާބުގެ ތެރޭގައި އިންސާނިއްޔަތާ ޚިލާފު ޖަރީމާތައް ހިންގިކަން ސާބިތުވެ، އެ ބޭފުޅުން މެރުމަށް އެ ގައުމުގެ ކޯޓަކުން އަންގާރަ ދުވަހު ހުކުމްކޮށްފި އެވެ.
ވެރިރަށް ދާކާގައި ގާއިމުކޮށްފައިވާ އިންޓަނޭޝަނަލް ކްރައިމްސް ޓްރައިބިއުނަލްގެ ތިން ފަނޑިޔާރުންގެ ބެންޗަކުން މި ހުކުމް އިއްވީ، ފަނޑިޔާރު ނަޒްރުލް އިސްލާމް ޗައުދަރީ ރިޔާސަތު ބެލެހެއްޓެވި މަޖިލީހެއްގަ އެވެ. މަރުގެ އަދަބުގެ ހުކުމާ ކުރިމަތިލައްވަން ޖެހިވަޑައިގަންނަވާ މި ހަތް ބޭފުޅުންނަކީ ވެސް މިވަގުތު ފިލައިގެން އިންޑިޔާ އަދި އެމެރިކާގައި އަމިއްލައަށް އަރުވާލެވިގެން ތިއްބެވި ބޭފުޅުން ކަމަށް ރިޕޯޓުތައް ބުނެ އެވެ.
މި މައްސަލާގައި ކުށް ސާބިތުވި ބޭފުޅުންގެ ތެރޭގައި ހަސީނާގެ އަވާމީ ލީގު ޕާޓީގެ ޖެނެރަލް ސެކްރެޓަރީ އުބައިދުލް ގާދިރާއި، ކުރީގެ އިންފޮމޭޝަން ސްޓޭޓް މިނިސްޓަރު މުހައްމަދު އަލީ އަރަފާތުގެ އިތުރުން ޖޮއިންޓް ޖެނެރަލް ސެކްރެޓަރީ އޭއެފްއެމް ބަހާއުއްދީން ނަސީމް ހިމެނިވަޑައިގަންނަވަ އެވެ. މީގެ އިތުރުން، އެ ޕާޓީގެ ޒުވާނުންގެ ގޮފީގެ ޗެއާމަން ޝައިޚް ފަޒްލޭ ޝަމްސް ޕަރާޝްއާއި ޖެނެރަލް ސެކްރެޓަރީ މުއީނުލް ހުސައިން ނިޚީލްގެ އިތުރުން، ދަރިވަރުންގެ ގޮފީގެ ރައީސް ސައްދާމް ހުސައިން އަދި ޖެނެރަލް ސެކްރެޓަރީ ޝައިޚް ވަލީ އާސިފް އީނާންގެ މައްޗަށް ވެސް ވަނީ ކުށް ސާބިތުވެފަ އެވެ.
މި ހުކުމުގައި ވަނީ ގާދިރު، ނަސީމް، އަރަފާތު އަދި ޕަރާޝްގެ މުދަލުގެ ދެބައިކުޅަ އެއްބައި ދައުލަތަށް ނެގުމަށް ވެސް އަމުރުކޮށްފަ އެވެ. ދައުލަތަށް ނަގާ މި މުދާތައް، ޖުލައި މަހުގެ ހަމަނުޖެހުންތަކުގައި މަރުވި މީހުންގެ އާއިލާތަކަށާއި އަނިޔާވި މީހުންނަށް ބަދަލުގެ ގޮތުގައި ދިނުމަށް ޓްރައިބިއުނަލުން ވަނީ އަންގާފަ އެވެ.
ޝައިޚް ހަސީނާގެ ވެރިކަން ވައްޓާލި 2024 ވަނަ އަހަރުގެ އިންގިލާބުގައި ހިންގި ލޭއޮހޮރުވުން ބޮޑު އަމަލުތަކާއި އިންސާނިއްޔަތާ ޚިލާފު ޖަރީމާތަކުގެ ކުށް ސާބިތުވެ، ހަމަ މި ޓްރައިބިއުނަލުން ވަނީ ނިމިދިޔަ ނޮވެމްބަރު މަހު އޭނާއަށް މަރުގެ އަދަބު ދިނުމަށް ވެސް ހުކުމްކޮށްފަ އެވެ. އދ. އިން ހާމަކޮށްފައިވާ ތަފާސްހިސާބުތަކަށް ބަލާއިރު، ހަސީނާގެ ސަލާމަތީ ބާރުތަކުންނާއި އަވާމީ ލީގު ޕާޓީގެ ސަޕޯޓަރުން ހިންގި މި ހަމަނުޖެހުންތަކުގައި މަދުވެގެން 1،400 މީހުން މަރުވެ، އެތައް ހާސް ބަޔަކަށް ވަނީ އެކިވަރުގެ އަނިޔާތައް ލިބިފަ އެވެ.
ގައުމުން ފިއްލަވައިގެން ވަޑައިގަތުމަށްފަހު ހަސީނާ މިހާރު ދިރިއުޅުއްވަމުން ގެންދަވަނީ އަވައްޓެރި އިންޑިޔާގަ އެވެ. ނަމަވެސް، ކުރިއަށް އޮތް ޑިސެންބަރު މަހު އެނބުރި ބަންގްލަދޭޝްއަށް ވަޑައިގަންނަވާނެ ކަމަށް އޭނާ ވަނީ ވިދާޅުވެފަ އެވެ.
ދެ ޓްރައިބިއުނަލަކުން މިހާތަނަށް އިއްވި ހަތް ހުކުމެއްގައި ޖުމްލަ 68 މީހެއްގެ މައްޗަށް ކުށް ސާބިތުވެފައިވާއިރު، އޭގެ ތެރެއިން 22 މީހަކަށް ވަނީ މަރުގެ އަދަބު އިއްވާފަ އެވެ. ކުށް ސާބިތުވި މީހުންގެ ތެރެއިން 18 މީހަކު އަދިވެސް ފިލައިގެން އުޅޭއިރު، ހަތަރު މީހަކު މިހާރު ތިބީ ބަންދުގަ އެވެ.
މަސްދަރު: އަނަދޯލް އޭޖެންސީ
