ބަންގްލަދޭޝްގެ އާ ރައީސް މަގާމުގެ ހުވައި ކުރައްވައިފި

ބަންގްލަދޭޝްގެ ނޭޝަނަލިސްޓް ޕާޓީ (ބީއެންޕީ) ގައި އެންމެ ގިނަ ދުވަހު ސެކްރެޓަރީ ޖެނެރަލްގެ މަގާމު ފުރުއްވި ތަޖުރިބާކާރު ސިޔާސީ ޝަޚުސިއްޔަތު، މިރްޒާ ފަޚްރުލް އިސްލާމް އާލަމްގީރު، އެ ގައުމުގެ އާ ރައީސް ކަމުގެ ހުވާ ކުރައްވައިފި އެވެ. ބަންގްލަދޭޝްގެ ރިޔާސީ ގަނޑުވަރު، ބަންގަބަވަންގައި ބޭއްވި މި ރަސްމިއްޔާތަކީ ފަޚްރުލްގެ ފަންސާސް އަހަރުވީ ދިގު ސިޔާސީ ދަތުރުގެ އެންމެ އުސްމިނަށް ވާސިލުވުން ކަމަށް ބަންގްލަދޭޝްގެ މީޑިއާތަކުން ރިޕޯޓުކޮށްފައިވެ އެވެ.

ބަންގްލަދޭޝްގެ ރައީސްގެ ރަސްމީ އޮފީސް އަދި ގެކޮޅު ކަމަށްވާ ބަންގަބަވަންގެ ދަރުބާރު ހޯލުގައި ހުކުރު ދުވަހުގެ ރޭ އިރާކޮޅު ބޭއްވި ރަސްމިއްޔާތުގައި، އުމުރުން 78 އަހަރުގެ ފަޚްރުލްއަށް ރައީސްކަމުގެ ހުވާލައިދެއްވީ ޖާތިޔާ ސަންގްސަދު (ޕާލަމެންޓް) ގެ އެކްޓިންގ ސްޕީކަރު ކައިސަރު ކަމާލެވެ.

ދައުލަތުގެ މި މުހިންމު ރަސްމިއްޔާތުގައި، މަގާމުން ވަކިވެވަޑައިގަންނަވާ އެކްޓިންގ ރައީސް ހާފިޒުއްދީން އަހުމަދާއި، ބޮޑުވަޒީރު ތާރިގް ރަހުމާނާއި، އުއްތަމަ ފަނޑިޔާރު ޒުބައިރު ރަހުމާން ޗައުދަރީ ބައިވެރިވެވަޑައިގެންނެވި އެވެ. މީގެ އިތުރުން ވަގުތީ ސަރުކާރުގެ ކުރީގެ ޗީފް އެޑްވައިޒަރު ޕްރޮފެސަރު މުހައްމަދު ޔޫނުސާއި، އިދިކޮޅު ލީޑަރު ޝަފީގުއް ރަހުމާނާއި، ކެބިނެޓް ވަޒީރުންނާއި، އެކި ސިޔާސީ ޕާޓީތަކުގެ އިސްވެރިންގެ އިތުރުން ސަފީރުން ހިމެނޭހެން އެތައް ސަތޭކަ ޝަރަފުވެރި މެހުމާނުން މި ރަސްމިއްޔާތުގައި ބައިވެރިވެވަޑައިގެންނެވި އެވެ.

ރައީސުލްޖުމްހޫރިއްޔާ ކަމުގެ މަގާމާ ހަވާލުވެވަޑައިގަތުމަށްފަހު، މިރްޒާ ފަޚްރުލް ވަނީ ކެބިނެޓަށް އަލަށް އައްޔަންކުރެއްވި ވަޒީރުންނަށް މަގާމުގެ ހުވާލައިދެއްވާފަ އެވެ.

އަވާމީ ލީގުން އައްޔަންކުރި ކުރީގެ ރައީސް މުހައްމަދު ޝަހާބުއްދީން އިސްތިއުފާ ދެއްވުމާ ގުޅިގެން، ޖުލައި 24 ވަނަ ދުވަހު އެކްޓިންގ ރައީސްގެ މަގާމާ ހަވާލުވެވަޑައިގަތީ ސްޕީކަރު ހާފިޒުއްދީން އަހުމަދެވެ. މިއާއެކު ހާފިޒުއްދީން ވެވަޑައިގެންފައިވަނީ ބަންގްލަދޭޝްގެ ތާރީޚުގައިވެސް އެންމެ ކުރު މުއްދަތަކަށް ރައީސްކަން ކުރެއްވި ފަރާތަށެވެ.

މިރްޒާ ފަޚްރުލް ރައީސްކަމަށް އިންތިޚާބު ކުރެވުނީ ބުރާސްފަތިދުވަހު ބޭއްވި އިންތިޚާބެއްގައި ގާނޫނު ހަދާ މަޖިލީހުގެ މެންބަރުންގެ ވޯޓުންނެވެ. މިއީ 1991 ވަނަ އަހަރަށްފަހު ބަންގްލަދޭޝްގައި ވާދަވެރި ރިޔާސީ އިންތިޚާބެއް ބޭއްވި ފުރަތަމަ ފަހަރެވެ.

1996 އާއި 2023 އާ ދެމެދު ބޭއްވުނު އިންތިޚާބުތަކުގައި އަށް ރައީސުން އިންތިޚާބުވެފައިވަނީ އެއްވެސް ވާދަވެރިކަމެއް ނެތި އެވެ. އެ ހުރިހާ ފަހަރަކުވެސް އިންތިޚާބު ކާމިޔާބު ކުރެއްވީ އޭރު ވެރިކަން ކުރާ ޕާޓީން ކުރިމަތިލެއްވި ކެންޑިޑޭޓުންނެވެ.

ޖެނުއަރީ 26، 1948 ގައި ތާކުރްގާއޮންއަށް އުފަންވެވަޑައިގަތް ފަޚްރުލްއަކީ ސިޔާސީ އާއިލާއަކަށް ނިސްބަތްވާ ބޭފުޅެކެވެ. ޑާކާ ޔުނިވަރސިޓީން އިގްތިސާދީ ދާއިރާއިން މަތީ ތައުލީމު ހާސިލުކުރެއްވި ފަޚްރުލް ސިޔާސީ ދާއިރާއަށް ވެދެވަޑައިގަތީ އައްޔޫބު ޚާނާ ދެކޮޅަށް ހިންގި ހަރަކާތްތަކުގެ ތެރެއިން، ވާތުފިޔައިގެ ފިކުރުގެ ދަރިވަރުންގެ އިސް ހަރަކާތްތެރިއެއްގެ ގޮތުގަ އެވެ.

ބަންގްލަދޭޝްއަށް މިނިވަންކަން ލިބުމަށްފަހު، ސަރުކާރުގެ ވަޒީފާއިން ވަކިވެވަޑައިގަތުމުގެ ކުރިން އޭނާ ވަނީ ކުރު މުއްދަތަކަށް ކިޔަވައިދެއްވުމުގެ ދާއިރާގައި މަސައްކަތް ކުރައްވާފަ އެވެ.

އަހަރުތަކަކަށްފަހު، 1988 ވަނަ އަހަރު އަމިއްލަ ކެންޑިޑޭޓެއްގެ ގޮތުގައި ވާދަކުރައްވައި ތާކުރްގާއޮން މުނިސިޕަލިޓީގެ ޗެއާމަންގެ މަގާމަށް އޭނާ އިންތިޚާބުވެވަޑައިގަ ތެވެ.

އެރުޝާދުގެ ސަރުކާރާ ދެކޮޅަށް ހިންގި ހަރަކާތްތަކުގެ ތެރޭގައި، 1990 ގެ ކުރީކޮޅު ބީއެންޕީއާ ގުޅިވަޑައިގެން، 1992 ވަނަ އަހަރު ތާކުރްގާއޮން ޑިސްޓްރިކްޓް ބީއެންޕީގެ ރައީސްކަމާ އޭނާ ހަވާލުވެވަޑައިގަތެވެ.

ފަޚްރުލް ވަނީ 1991 އަދި 1996 ވަނަ އަހަރުގެ އާންމު އިންތިޚާބުގައި ތާކުރްގާއޮން-1 ދާއިރާއަށް ވާދަކުރައްވައި ނާކާމިޔާބީއާ ކުރިމަތިލައްވަން ޖެހިވަޑައިގެންފަ އެވެ. ނަމަވެސް، 2001 ވަނަ އަހަރު ބޭއްވި އިންތިޚާބުގައި އޭނާ ވަނީ އެ ގޮނޑި ކާމިޔާބު ކުރައްވާފަ އެވެ.

އެގޮތުން 2001 އިން 2006 އަށް އޭނާ ވަނީ ދަނޑުވެރިކަމާ ބެހޭ ވުޒާރާގެ އިތުރުން ސިވިލް އޭވިއޭޝަން އެންޑް ޓޫރިޒަމްގެ ސްޓޭޓް މިނިސްޓަރުކަން ކުރައްވާފަ އެވެ.

އޭގެ ފަހުން 2008 ވަނަ އަހަރުގެ އިންތިޚާބުން އޭނާ ނާކާމިޔާބުވި އެވެ. އަދި 2018 ވަނަ އަހަރު ބޭއްވި އިންތިޚާބުގައި ބީއެންޕީގެ ފަރާތުން ތާކުރްގާއޮން-1 އަދި ބޮގުރާ-6 ދާއިރާއަށް އޭނާ ވާދަކުރެއްވި އެވެ. އެ އިންތިޚާބުގައި ބޮގުރާ-6 ދާއިރާގެ ގޮނޑި ކާމިޔާބު ކުރެއްވި ނަމަވެސް، އިންތިޚާބުގެ ސައްހަކަމާމެދު ސުވާލު އުފައްދައި އޭނާ ވަނީ މަގާމުގެ ހުވާކުރެއްވުމަށް އިންކާރު ކުރައްވާފަ އެވެ.

ސިޔާސީ ހަޔާތުގައި ކުރިއަށް ވަޑައިގަންނަވަމުން، 2009 ވަނަ އަހަރު ސީނިއާ ޖޮއިންޓް ސެކްރެޓަރީ ޖެނެރަލްގެ މަގާމަށް ފަޚްރުލް އައްޔަންކުރެވުނެވެ. އަދި 2011 ގައި އެކްޓިންގ ސެކްރެޓަރީ ޖެނެރަލްގެ މަގާމާ ހަވާލުވެވަޑައިގަތުމަށްފަހު، 2016 ވަނަ އަހަރު ރަސްމީކޮށް އެ މަގާމަށް އިންތިޚާބުވެވަޑައިގަތެވެ.

މި އަހަރުގެ އޮގަސްޓް 13 ވަނަ ދުވަހު ބީއެންޕީން އޭނާ ރައީސްކަމަށް ނޮމިނޭޓް ކުރަންދެން އޭނާ ހުންނެވީ އެ މަގާމުގަ އެވެ. ޝައިޚް ހަސީނާގެ ވެރިކަމުގައި ސިޔާސީ ގޮތުން ކުރިމަތިވި ގޮންޖެހުންތަކުގައި، މަދުވެގެން 11 ފަހަރު އޭނާ ޖަލަށްލާފައިވާއިރު، ޖުމްލަ ތިން އަހަރެއްހާ ދުވަސް އޭނާ ވަނީ ޖަލުގައި ހޭދަކުރައްވާފަ އެވެ.