"ފިލައިގެން އުޅޭ ކުށްވެރި" ހަސީނާ ދެއްވަން އުޅޭ ތަގުރީރާ ބެހޭ ގޮތުން އިންޑިއާގެ ސިޔާސަތު ސާފުކޮށްދޭން ބަންގްލަދޭޝް އިން އެދިއްޖެ

އިންޑިއާގައި ހުންނެވި ބަންގްލަދޭޝްގެ ކުރީގެ ބޮޑުވަޒީރު ޝައިޚް ހަސީނާ، ނިއުދިއްލީގައި ހުންނަވައިގެން ވާޗުއަލްކޮށް ތަޤުރީރު ކުރެއްވުމަށް ރާވާފައިވާ މައްސަލައިގައި އިންޑިއާގެ ސިޔާސަތު ސާފުކޮށްދިނުމަށް ބަންގްލަދޭޝް ސަރުކާރުން އެދިއްޖެ އެވެ. ބަންގްލަދޭޝްއިން އިންޑިއާއަށް އިންޒާރު ދީފައިވަނީ، ފިލައިގެން އުޅޭ ކުށްވެރިއަކު އެ ގައުމުގައި ހުރެ ސިޔާސީ ހަރަކާތްތައް ހިންގުމަށް ފުރުސަތު ދިނުމަކީ ދެ ގައުމުގެ ދެމެދުގައި ރަނގަޅުވަމުން އަންނަ ގުޅުމަށް ބުރޫއަރާފާނެ ކަމެއް ކަމަށެވެ.

މިއީ ހަސީނާގެ ސަރުކާރު ވައްޓާލުމަށް ދަރިވަރުން އިސްވެ ކުރި މުޒާހަރާތަކަށް ދެ އަހަރު ފުރުން ފާހަގަކުރުމަށް، އޯގަސްޓް މަހުގެ 5 ވަނަ ދުވަހު ނިއުދިއްލީގެ ފޮރިން ކޮރެސްޕޮންޑެންޓްސް ކްލަބް އޮފް ސައުތު އޭޝިއާ (އެފް.ސީ.ސީ.އެސް.އޭ) އިން ބާއްވާ ހަރަކާތެއްގައި ހަސީނާ ބައިވެރިވެވަޑައިގަންނަވާތީ، ބަންގްލަދޭޝް ސަރުކާރުން ރަސްމީކޮށް ދިން ފުރަތަމަ ރައްދެވެ.

މި މައްސަލަ ފެންމަތިވެފައިވަނީ، 2024 ވަނަ އަހަރުގެ އޯގަސްޓް މަހު ބަންގްލަދޭޝްއިން ފިއްލަވައިގެން ވަޑައިގެން އިންޑިއާގައި ދިރިއުޅުއްވަމުން ގެންދަވާ ހަސީނާ އަނބުރާ ގައުމަށް ގެނައުމަށް (އެކްސްޓްރަޑިޝަން) ޑާކާ ސަރުކާރުން މަސައްކަތް ކުރަމުންދާ ދަނޑިވަޅެއްގަ އެވެ. ހަސީނާގެ މައްޗަށް ގިނަ ދައުވާތަކެއް އުފުލާފައިވީ ނަމަވެސް، އަންނަ ޑިސެމްބަރު މަހު ބަންގްލަދޭޝްއަށް އެނބުރި ވަޑައިގަތުމަށް ގަސްދުކުރައްވާ ކަމަށް ރޮއިޓާސްއަށް ދެއްވި އިންޓަވިއުއެއްގައި އޭނާ ވަނީ ވިދާޅުވެފަ އެވެ.

"އަޅުގަނޑުމެން އިންޑިއާއާއެކު ކުރިއަށް މިދަނީ މުސްތަޤުބަލަށް އަމާޒުކޮށްގެން، ގުޅުން ބަދަހިކުރުމުގެ ވިސްނުމެއްގައި. އެ ކުރިއެރުމަށް އެއްވެސް ހުރަހެއް އެޅޭކަށް އަޅުގަނޑުމެން ބޭނުމެއް ނުވޭ،" ބަންގްލަދޭޝްގެ ސްޓޭޓް މިނިސްޓަރ ފޯ ފޮރިން އެފެއާޒް ޝަމާ އުބައިދު އިސްލާމް ހޯމަ ދުވަހުގެ ރޭ ނޫސްވެރިންނަށް ވިދާޅުވި އެވެ. "މިކަމުގައި އިންޑިއާގެ ސިޔާސަތު އޮތްގޮތް ސާފުވާންޖެހޭ."

އެފް.ސީ.ސީ.އެސް.އޭ އިން ބުނި ގޮތުގައި، އުމުރުން 78 އަހަރުގެ ހަސީނާ ނިއުދިއްލީގެ މި ހަރަކާތުގައި ވާހަކަދައްކަވާނީ ވީޑިއޯ ލިންކް މެދުވެރިކޮށެވެ. އޭނާގެ އިތުރުން ދަރިކަލުން ސަޖީބް ވަޒީދު ޖޯއީ އާއި އެހެނިހެން ބޭފުޅުންވެސް މި ހަރަކާތުގައި ވާހަކަދެއްކެވުމަށް ވަނީ ހަމަޖެހިފައެވެ. ބަންގްލަދޭޝް ސަރުކާރުގެ ކަންބޮޑުވުންތަކާ ގުޅޭގޮތުން އެ ކްލަބުން އަދި ވަކި އެއްޗެއް ބުނެފައެއް ނުވެ އެވެ.

ޝަމާ އުބައިދު އިސްލާމް ވިދާޅުވީ، ހަސީނާ އާއި އަވާމީ ލީގުގެ އެހެން ލީޑަރުން އިންޑިއާގެ ފަސްގަނޑުގައި ތިއްބަވައިގެން ސިޔާސީ ބަޔާންތައް ނެރުއްވާ މައްސަލައިގައި ބަންގްލަދޭޝްގެ ކަންބޮޑުވުންތައް ތަކުރާރުކޮށް އިންޑިއާއަށް ހިއްސާކޮށްފައިވާނެ ކަމަށެވެ.

"ފިލައިގެން އުޅޭ ކުށްވެރިންގެ ބަޔާންތަކުގެ ސަބަބުން އިންޑިއާ އާއި ބަންގްލަދޭޝްގެ ގުޅުމަށް ގެއްލުންވާކަށް އަޅުގަނޑުމެން ބޭނުމެއް ނުވޭ،" އޭނާ ވިދާޅުވި އެވެ. އަދި ފިލައިގެން އުޅޭ ކުށްވެރިން އިންޑިއާގެ ފަސްގަނޑުގައި ތިބެ ސިޔާސީ ހަރަކާތްތައް ހިންގާނެ ކަމަށް އިންޑިއާ އިން މީގެ ކުރިން ގަބޫލުނުކުރާ ކަމުގެ އިޝާރާތެއް ދީފައިވާ ކަމަށްވެސް އޭނާ ފާހަގަކުރެއްވި އެވެ.

މި ހަރަކާތަކީ އިންޑިއާ ސަރުކާރުން އިންތިޒާމުކުރާ ކަމެއް ނޫންކަން ފާހަގަކުރައްވަމުން، ޝަމާ ވިދާޅުވީ ބޭނުންވެއްޖެ ނަމަ ޑިޕްލޮމެޓިކް އުސޫލުން މި މައްސަލަ ޑާކާ ސަރުކާރުން އިންޑިއާއަށް ހުށަހަޅާނެ ކަމަށެވެ.

މި މައްސަލައިގައި އިންޑިއާގެ ފޮރިން މިނިސްޓްރީން އަދި ވަކި ޖަވާބެއް ދީފައެއް ނުވެ އެވެ.

ހަސީނާ މަގާމުން ދުރުކުރި ފަހުން ދެ ގައުމުގެ ގުޅުމަށް ވަނީ ހީނަރުކަމެއް އައިސްފަ އެވެ. ނަމަވެސް، ފެބްރުއަރީ މަހުގެ އިންތިޚާބަށްފަހު ތާރިގު ރަހުމާންގެ ސަރުކާރުން ވެރިކަމާ ހަވާލުވި ފަހުން، ދެ ގައުމުގެ ދެމެދުގައި އެއްބާރުލުން އިތުރުކޮށް ގުޅުން އަލުން ބަދަހިކުރުމުގެ ޝައުގުވެރިކަން ދެ ފަރާތުންވެސް ވަނީ ފާޅުކޮށްފަ އެވެ.

ހަފުތާތަކަކަށް ދެމިގެންދިޔަ ލޭއޮހޮރުވުން ބޮޑު މުޒާހަރާތަކަށްފަހު ހަސީނާގެ ސަރުކާރު ވައްޓާލުމުން، އޭނާ ހުންނެވީ އިންޑިއާގަ އެވެ. ބަންގްލަދޭޝްއިން އޭނާ އަނބުރާ ގެނައުމަށް މަސައްކަތް ކުރަމުންދާއިރު، 2024 ވަނަ އަހަރުގެ މުޒާހަރާތައް ހުއްޓުވުމަށް ހިންގި އަމަލުތަކަކީ އިންސާނިއްޔަތާ ޚިލާފު ޖަރީމާތަކެއް ކަމަށް ނިންމައި، 2025 ވަނަ އަހަރު ބަންގްލަދޭޝްގެ ކޯޓަކުން ވަނީ ހަސީނާ މަރަން ހުކުމްކޮށްފައެވެ. އދ. އިން އަންދާޒާކުރާ ގޮތުގައި އެ ހަމަނުޖެހުންތަކުގައި 1,400 އެއްހާ މީހުން މަރުވެފައިވެ އެވެ. ނަމަވެސް ހަސީނާ ވަނީ އެ ހުކުމަކީ ގާނޫނީ ގޮތުން ބާތިލު ހުކުމެއް ކަމަށް ބުނެ އެކަން ދޮގުކޮށްފަ އެވެ.