ހަސީނާގެ ވާޗުއަލް ތަގުރީރު ނުދެއްކުމަށް މީޑިއާތަކަށް ބަންގްލަދޭޝް ސަރުކާރުން އަންގައިފި

ބަންގްލަދޭޝްގެ ކުރީގެ ބޮޑުވަޒީރު ޝައިޚް ހަސީނާގެ ސަރުކާރު ވައްޓާލިތާ ދެ އަހަރު ފުރުން ފާހަގަކުރުމަށްޓަކައި، އިންޑިއާގައި ހުންނަވައިގެން ބުދަ ދުވަހު ދެއްވުމަށް ހަމަޖެހިފައިވާ ވާޗުއަލް ތަގުރީރު އާންމު ނުކުރުމަށް އެ ގައުމުގެ މީޑިއާތަކަށް ބަންގްލަދޭޝް ސަރުކާރުން އިންޒާރު ދީފި އެވެ.

ދަރިވަރުން އިސްވެ ފެށި މުޒާހަރާތަކާ ގުޅިގެން 2024 ވަނަ އަހަރު ޝައިޚް ހަސީނާގެ ސަރުކާރު ވެއްޓުނު ފަހުން އެކަމަނާ ދިރިއުޅުއްވަމުން ގެންދަވަނީ އިންޑިއާގަ އެވެ. މުޒާހަރާތައް ހުއްޓުވުމަށް ހިންގި އަމަލުތަކަކީ އިންސާނިއްޔަތާ ހިލާފު ޖަރީމާތަކެއް ކަމަށް ނިންމައި، 2025 ވަނަ އަހަރު ބަންގްލަދޭޝްގެ ކޯޓަކުން އެކަމަނާ މަރަން ހުކުމް ކުރި ނަމަވެސް، ހަސީނާ ވަނީ އެއީ ގާނޫނީ ގޮތުން ބާތިލު ހުކުމެއް ކަމަށް ވިދާޅުވެފަ އެވެ.

އުމުރުފުޅުން 78 އަހަރުގެ ހަސީނާ، ވެރިރަށް ޑާކާ ދޫކުރައްވައި ވަޑައިގެންނެވި ފަހުން ފުރަތަމަ ފަހަރަށް އާންމުންނާ މުހާތަބު ކުރައްވަން ހަމަޖެހިފައިވަނީ ވީޑިއޯ ލިންކް މެދުވެރިކޮށެވެ. ނިއު ދިއްލީގައި ހުންނަ ފޮރިން ކޮރެސްޕޮންޑެންޓްސް ކްލަބް އޮފް ސައުތު އޭޝިއާއިން އިންތިޒާމުކުރާ މި ހަރަކާތުގައި އެކަމަނާގެ ދަރިކަލުން ސަޖީބް ވަޒީދު ޖޯއީގެ އިތުރުން އެހެން ބޭފުޅުންވެސް ބައިވެރިވެވަޑައިގަންނަވާނެ އެވެ.

ޝައިޚް ހަސީނާ ދެއްވާ ތަގުރީރުގެ ތަފްސީލެއް އެކަމަނާގެ އަރިސް ފަރާތްކުން ހާމަކޮށްފައި ނުވި ނަމަވެސް، މިދިޔަ މަހު ރޮއިޓާސްއަށް ދެއްވި އިންޓަވިއުއެއްގައި އެކަމަނާ ވިދާޅުވީ، އަންނަ ޑިސެމްބަރު މަހު އެކަމަނާ އާއި ޕާޓީގެ އިސް ބޭފުޅުން އެނބުރި ގައުމަށް ވަޑައިގެން ކޯޓަށް ހާޒިރުވާން ނިންމަވާފައިވާ ކަމަށެވެ. މިއީ ބަންގްލަދޭޝްގެ އާ ސަރުކާރުން އެ ގައުމުގެ އެންމެ ނުފޫޒުގަދަ ސިޔާސީ ވާދަވެރިޔާއާ މެދު އަމަލުކުރާނެ ގޮތް ބަލާލުމަށް ކުރިމަތިވާނެ އިމްތިހާނެކެވެ.

ޕްރައިވެޓް އިވެންޓެއް، އިންޑިއާގެ ބައިވެރިވުމެއް ނެތް

އަމިއްލަ ފަރާތަކުން ބާއްވާ މި ހަރަކާތުގައި އެއްވެސް ބައިވެރިވުމެއް ނެތް ކަމަށް އިންޑިއާ ސަރުކާރުން ބުނެ އެވެ.

ބަންގްލަދޭޝްގެ އިންފޮމޭޝަން އެޑްވައިޒަރު ޒާހިދުއް ރަހްމާން އަންގާރަ ދުވަހު މީޑިއާތަކަށް އިންޒާރު ދެއްވަމުން ވިދާޅުވީ، ހަސީނާގެ ތަގުރީރު އިސްތިހާރުކުރުން ނުވަތަ އާންމުކުރުމަކީ ބަންގްލަދޭޝްގެ އިންޓަނޭޝަނަލް ކްރައިމްސް ޓްރައިބިއުނަލުން 2024 ވަނަ އަހަރުގެ ޑިސެމްބަރު މަހު ނެރެފައިވާ އަމުރާ ހިލާފު ކަމެއް ކަމަށެވެ. އެ އަމުރުގައިވާ ގޮތުން ހަސީނާގެ އެއްވެސް ތަގުރީރެއް، ބަޔާނެއް، އިންޓަވިއުއެއް ނުވަތަ އޯޑިއޯ އަދި ވީޑިއޯ މެސެޖެއް މީޑިއާތަކުންނާއި ސޯޝަލް މީޑިއާ ޕްލެޓްފޯމްތަކުގައި ފެތުރުމަކީ މަނާ ކަމެކެވެ.

ހަސީނާގެ އެހީތެރިއެއް ކަމަށްވާ އަބޫ އުބައިދާ އަރީން ވިދާޅުވީ، ބަންގްލަދޭޝް ސަރުކާރުން އިންޒާރު ދިން ނަމަވެސް އެ ހަރަކާތް ކުރިއަށްދާނެ ކަމަށެވެ. އަދި ޚިޔާލު ފާޅުކުރުން ހުއްޓުވުމަށް ޑާކާގެ ސަރުކާރުން ކުރާ މަސައްކަތްތަކުން، ގައުމުން ބޭރުގައި ތިބި މީހުންގެ އަޑު ކަނޑުވާލެވޭނެ ގޮތެއް ނޯންނާނެ ކަމަށްވެސް އޭނާ ވިދާޅުވި އެވެ.

ހަސީނާގެ މި ތަގުރީރާ ގުޅޭގޮތުން އިންޑިއާގެ ސިޔާސަތު ސާފުކޮށްދިނުމަށް ބަންގްލަދޭޝްއިން ވަނީ ނިއު ދިއްލީގައި އެދިފަ އެވެ. އަދި ފިލައިގެން އުޅޭ މީހަކަށް ސިޔާސީ ހަރަކާތްތައް ހިންގުމަށް ފުރުސަތު ދިނުމަކީ ދެ ގައުމުގެ ގުޅުމަށް ބުރޫއަރާފާނެ ކަމެއް ކަމުގެ އިންޒާރުވެސް ބަންގްލަދޭޝްއިން ވަނީ ދީފަ އެވެ. އިންޑިއާގެ ފޮރިން މިނިސްޓްރީގެ ތަރުޖަމާނު ރަންދީރު ޖައިސްވާލް ބުދަ ދުވަހު ވިދާޅުވީ، އެ ހަރަކާތަކީ އަމިއްލަ މީޑިއާ އިދާރާއަކުން އިންތިޒާމުކުރާ ކަމެއް ކަމަށެވެ.

"މިކަމުގައި ސަރުކާރުގެ އެއްވެސް ބައިވެރިވުމެއް ނެތް. އަދި އެ ފޯރަމްގައި ފާޅުކުރާ އެއްވެސް ޚިޔާލަކަށް ސަރުކާރުން ތާއީދެއްވެސް ނުކުރަން،" އާންމުކޮށް ބާއްވާ ނޫސްވެރިންގެ ބައްދަލުވުމެއްގައި އޭނާ ވިދާޅުވި އެވެ.

އަވަށްޓެރި ދެ ގައުމުގެ މެދުގައި މި ނުތަނަވަސްކަން އުފެދިފައި މިވަނީ، އިންޑިއާގައި ހުންނެވި ހަސީނާ އަނބުރާ ގައުމަށް ގެނައުމަށް ބަންގްލަދޭޝްއިން މަސައްކަތް ކުރަމުންދާ ދަނޑިވަޅެއްގަ އެވެ.

ބަންގްލަދޭޝްގެ ސްޓޭޓް މިނިސްޓަރ ފޯ ފޮރިން އެފެއާޒް ޝަމާ އުބައިދު އިސްލާމް ވިދާޅުވީ، ހަސީނާ އާއި އަވާމީ ލީގުގެ އެހެން ލީޑަރުން އިންޑިއާގައި ތިއްބަވައިގެން ސިޔާސީ ބަޔާންތައް ނެރުއްވާތީ އެކަމުގެ ކަންބޮޑުވުން ތަކުރާރުކޮށް އިންޑިއާއަށް ހުށަހަޅާފައިވާ ކަމަށެވެ.

ހަސީނާގެ ސަރުކާރު ވެއްޓުނު ފަހުން ދެ ގައުމުގެ ގުޅުމަށް ހީނަރުކަމެއް އައިސްފައިވީ ނަމަވެސް، ފެބްރުއަރީ މަހުގެ އިންތިޚާބަށްފަހު ވެރިކަމާ ހަވާލުވި ބޮޑުވަޒީރު ތާރިގު ރަހްމާންގެ ސަރުކާރުގެ ދަށުން ގުޅުން ރަނގަޅު ކުރުމުގެ ނިޝާންތަކެއް ދެ ފަރާތުންވެސް ދާދި ފަހުން ވަނީ ދައްކާފަ އެވެ.