މަރުގެ ހުކުމް އިއްވާފައިވީ ނަމަވެސް އެނބުރި ބަންގްލަދޭޝް އަށް ވަޑައިގަންނަވާނެ ކަމަށް ހަސީނާ ވިދާޅުވެއްޖެ

ބަންގްލަދޭޝްގެ ކުރީގެ ބޮޑުވަޒީރު ޝައިޚް ހަސީނާގެ މައްޗަށް އެ ގައުމުގައި މަރުގެ ހުކުމް އިއްވާފައިވީ ނަމަވެސް، އިންޑިއާގައި ދެ އަހަރު ދުވަހު ހިމާޔަތް ހޯއްދަވައިގެން ހުންނެވުމަށްފަހު އެނބުރި ގައުމަށް ވަޑައިގަންނަވާނެ ކަމަށް ވިދާޅުވެއްޖެ އެވެ.

2024 ވަނަ އަހަރު ބަންގްލަދޭޝްގައި ކުރިއަށްދިޔަ މުޒާހަރާތަކުގެ ބައިވެރިންނާ ދެކޮޅަށް ހިންގި ލޭއޮހޮރުވުން ބޮޑު އޮޕަރޭޝަނަކަށްފަހު މަގާމުން ދުރުކުރި އުމުރުން 78 އަހަރުގެ ހަސީނާ މިކަން އިއުލާނުކުރެއްވީ ބުދަ ދުވަހު ފޮރިން ކޮރެސްޕޮންޑެންޓްސް ކްލަބް (އެފް.ސީ.ސީ) އޮފް ސައުތު އޭޝިއާއިން ބޭއްވި ހަރަކާތެއްގައި ވީޑިއޯ މެދުވެރިކޮށް ދެއްވި ބަޔާނެއްގަ އެވެ. މި ހަރަކާތުގައި ހަސީނާގެ ދަރިކަލުން ސަޖީބް ވަޒީދު ޖޯއީގެ އިތުރުން އަވާމީ ލީގުގެ އިސް ބޭފުޅުން ކަމަށްވާ ކުރީގެ އެޑިއުކޭޝަން މިނިސްޓަރު މުހިއްބުލް ހަސަން ޗައުދަރީ ނައުފަލް ވެސް ބައިވެރިވެވަޑައިގެންނެވި އެވެ.

"އަޅުގަނޑު ހައްޔަރުކޮށްފާނެ، ނުވަތަ ޖަލަށް ވެސް ފޮނުވާފާނެ. އެކަމަކު ރައްޔިތުންނަށްޓަކައި އަދާކުރަންޖެހޭ ވާޖިބުތައް ނިންމާނީ ބިރުގަތުމަކުން ނޫން،" ހަސީނާ ވިދާޅުވި އެވެ. "އަޅުގަނޑުގެ ލޮބުވެތި ރައްޔިތުން ތަހައްމަލު ކުރަމުންދާ ތަކުލީފުތަކާ ދުރުގައި އަޅުގަނޑަކަށް ނުހުރެވޭނެ."

އެނބުރި ގައުމަށް ވަޑައިގަންނަވާނެ ސީދާ ތާރީޚެއް "ވަގުތު ޖެހުމުން" އިއުލާނުކުރައްވާނެ ކަމަށް ހަސީނާ ވިދާޅުވި ނަމަވެސް، އެކަމަނާ ބޭނުންފުޅުވަނީ މިއަހަރުގެ ޑިސެމްބަރު މަހުގެ ތެރޭގައި އެނބުރި ވަޑައިގަތުމަށެވެ.

ހަސީނާ އިތުރަށް ވިދާޅުވީ އެކަމަނާގެ ޕާޓީ ކަމަށްވާ އަވާމީ ލީގަށް ކުރިމަތިކޮށްފައިވާ މަނާކުރުންތައް އުވާލަންޖެހޭ ކަމަށެވެ. އަދި ބަންގްލަދޭޝްގެ މިހާރުގެ ސަރުކާރާއެކު އެއްވެސް މުއާމަލާތެއް ކުރަމުން ނުދާ ކަމަށް ހަސީނާގެ ދަރިކަލުން ވިދާޅުވި އެވެ.

މަރުގެ ހުކުމް

2024 ވަނަ އަހަރު ދަރިވަރުން އިސްވެ ތިބެ ހިންގި އިންގިލާބު ހުއްޓުވުމަށް ހަސީނާ ކުރެއްވި މަސައްކަތް ނާކާމިޔާބުވެ، ވެރިކަން ވެއްޓުމާއެކު އެކަމަނާ ވަނީ ހެލިކޮޕްޓަރެއްގައި އިންޑިއާގެ ނިއު ދިއްލީއަށް ފިއްލަވައިގެން ވަޑައިގެންފަ އެވެ. އޭގެ ފަހުން މިހާތަނަށް އެކަމަނާ ބަންގްލަދޭޝްއަށް ވަޑައިގެންފައެއް ނުވެ އެވެ.

މިދިޔަ އަހަރު ޑާކާގައި ކުރިއަށްދިޔަ ޝަރީއަތަށް ހާޒިރުވުމަށް ހަސީނާ އިންކާރު ކުރެއްވިއިރު، އެ ޝަރީއަތުގައި ވަނީ މީހުން މެރުމަށް ހިތްވަރުދިނުމާއި، މީހުން މެރުމަށް އަމުރުކުރުމާއި، އަދި ހިންގަމުންދިޔަ ލާއިންސާނީ އަމަލުތައް ހުއްޓުވުމަށް ނުކުޅެދިފައިވާ ކަމަށް ސާބިތުވެފަ އެވެ. އިންސާނިއްޔަތާ ޚިލާފު ޖަރީމާތަކުގެ ކުށް ސާބިތުވުމާ ގުޅިގެން އެކަމަނާގެ މައްޗަށް ވަނީ ދަންޖައްސައި މެރުމަށް ހުކުމްކޮށްފަ އެވެ.

ހަސީނާ އެނބުރި ގައުމަށް ވަޑައިގަންނަވާނެ ކަމަށް ވިދާޅުވެފައި މިވަނީ، ބަންގްލަދޭޝްއާއި އިންޑިއާއާ ދެމެދު ގޯސްވެފައިވާ ގުޅުން ރަނގަޅު ކުރުމަށް ދެ ގައުމުން މަސައްކަތް ކުރަމުންދާ ދަނޑިވަޅެއްގަ އެވެ. ހަސީނާ އަނބުރާ ގައުމަށް ފޮނުވައިދިނުމަށް ބަންގްލަދޭޝްގެ ސަރުކާރުން ތަކުރާރުކޮށް އެދެމުންދާއިރު، އިންޑިއާ ސަރުކާރުން ބުނަމުންދަނީ އެ ހުށަހެޅުން ގާނޫނީ މަރުހަލާތަކުގެ ތެރެއިން ދިރާސާކުރަމުންދާ ކަމަށެވެ.

ނަމަވެސް، ބަންގްލަދޭޝްގެ އާ ބޮޑުވަޒީރު ތާރިގު ރަހުމާން ވެރިކަމާ ހަވާލުވެވަޑައިގަތުމާއެކު، އަވަށްޓެރި ދެ ގައުމުގެ ގުޅުން ވަނީ ރަނގަޅުވާން ފަށާފަ އެވެ. އަދި އަންނަ ސެޕްޓެމްބަރު މަހު ބޭއްވުމަށް ހަމަޖެހިފައިވާ ބްރިކްސް (ބްރެޒިލް، ރަޝިއާ، އިންޑިއާ، ޗައިނާ، ސައުތު އެފްރިކާ) ސަމިޓަށް އިންޑިއާއިން ވަނީ ތާރިގު ރަހުމާނަށް ދައުވަތު އަރުވާފަ އެވެ.

މީގެއިތުރުން، ހަސީނާގެ ބަޔާން އާންމުކުރުމުގެ ކުރިން އަންގާރަ ދުވަހު ނޫސްވެރިންނާ ވާހަކަދައްކަވަމުން އިންޑިއާގެ ފޮރިން މިނިސްޓްރީގެ ތަރުޖަމާނު ރަންދީރު ޖައިސްވާލް ވަނީ، އެކަމަނާގެ ވާހަކަތަކާ އިންޑިއާ ސަރުކާރާ އެއްވެސް ގުޅުމެއް ނެތްކަން ހާމަކުރައްވާފަ އެވެ.

"މިކަމުގައި އިންޑިއާ ސަރުކާރުގެ އެއްވެސް ބައިވެރިވުމެއް ނެތް، އަދި އެ ފޯރަމްގައި ފާޅުކުރާ އެއްވެސް ޚިޔާލަކަށް ސަރުކާރުން ތާއީދެއްވެސް ނުކުރަން،" ތަރުޖަމާނު ވިދާޅުވި އެވެ.