ރާއްޖޭގެ އަތޮޅުތަކުން ކުރިއެރުން ލިބެން އޮތީ ސަރުކާރުން ކޮންމެ ކަމަކަށް ވަނުމުގެ ބަދަލުގައި، ކަންކަން ކުރެވޭނެ ގޮތް ހޯދައިދީ، މަރުކަޒީ ބާރުތައް ދޫކޮށްލައިގެން: ފައިސަލް

ރާއްޖޭގެ އަތޮޅުތަކުން ކުރިއެރުން ލިބެން އޮތީ މައި ސަރުކާރުން ކޮންމެ ކަމަކަށް ވަނުމުގެ ބަދަލުގައި، ކަންކަން ކުރެވޭނެ ފަދަ ނިޒާމެއް އަތޮޅުތަކަަށް ދައްކައި، މަރުކަޒީ ބާރުތައް ދޫކޮށްލައިގެން ކަމަށް ކުރީގެ ނައިބް ރައީސް ފައިސަލް ނަސީމް ވިދާޅުވެއްޖެ އެވެ.

ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ފައިސަލް ވިދާޅުވީ، އައްޑޫ ސަވާހެލި ކުއްލި ގޮތަކަަށް އައްޑޫ ސިޓީ ކައުންސިލްގެ އިހްތިސާސް އިން ވަކިކުރަން ސަރުކާރުން ނިންމާފައިވާއިރު، ފޭދޫ ޓޫރިޒަމް ޒޯންގައި އެތައް ސަތޭކަ އެނދު ތައްޔާރުވަމުން އަންނަ ކަމަށެވެ. ޓޫރިސްޓް ފެސިލިޓީއެއްގެ ގޮތުގައި އެ ރަށް ތަރައްގީވުމުން، އައްޑޫގެ ޓޫރިޒަމަށް ކުރިއެރުން ލިބިގެންދާނެ ކަމަށާއި، ރައްޔިތުންނަށް ޑޮލަރުން އާމްދަނީ ލިބި، އިގްތިސާދީ ނަފާ އިތުރުވެ އަދި އަތޮޅަށް ކުރިއެރުން ލިބޭނެ ކަމަށް އޭނާ ވިދާޅުވި އެވެ.

ފައިސަލް ވިދާޅުވީ، މައި ސަރުކާރުން ކައުންސިލްތަކަށް ބާރުތައް ދޫކޮށް ރައްޔިތުންނަށް އަތޮޅުން ގިނަ ފައިދާ ނެރެވޭނެ ފުރުސަތުތަކަށް ޖާގަދީ، މަގުފަހި ކުރަންވާނެ ކަމަށެވެ. އަދި ރާއްޖޭގެ އަތޮޅުތަކުން ކުރިއެރުން ލިބެން އޮތީ މައި ސަރުކާރުން ކޮންމެ ކަމަކަށް ވަނުމުގެ ބަދަލުގައި، ކަންކަން ކުރެވޭނެ ފަދަ ނިޒާމެއް އަތޮޅުތަކަަށް ދައްކައި، މަރުކަޒީ ބާރުތައް ދޫކޮށްލައިގެން ކަމަށާއި އައްޑޫ އާއި މުޅި ރާއްޖޭގައި ވެސް ޓޫރިޒަމްގެ ދާއިރާއިން ކުރިއެރުން ލިބިފައި އޮތީ ޕްރައިވެޓް ސެކްޓަރުން ކޮށްފައިވާ މަސައްކަތުން ކަމަށް ވެސް އޭނާ ވިދާޅުވި އެވެ. ސަރުކާރުން ޓޫރިޒަމަށް ވަންނަ ކޮންމެ ފަހަރެއްގައި ވެސް ބޮޑެތި ގެެއްލުންތަކެއްވެ ފެއިލްވަމުންދާ ކަމަށް ފައިސަލް އިތުރަށް ވިދާޅުވި އެވެ.

އައްޑޫ ސިޓީގެ އިހްތިސާސުން ސަވާހެލި ވަކިކޮށްފައިވަނީ އެ ރަށް އެންޓަޓެއިންމަންޓް އެންޑް ރެކްރިއޭޝަން ފެސިލިޓީއެއްގެ ގޮތުގައި ތަރައްގީކުރާނެ ބަޔަކު ހޯދުމަށް އައްޑޫ ސިޓީ ކައުންސިލުން އިއުލާނުކޮށް، އެ މަސައްކަތަށް ބީލަމަށް ހުޅުވާލާފައިވަނިކޮށެވެ. އެ ރަށް އައްޑޫ ސިޓީގެ އިހުތިސާސުން ވަކިކުރަން ނިންމީ ފަތުރުވެރިކަމުގެ ބޭނުމަށް އެ ރަށް ބޭނުންކުރުމަށް ކަމަށް ރައީސް މުއިއްޒު ނެރުއްވި ގަރާރުގައި ބަޔާންކޮށްފައިވީ ނަމަވެސް، އެކަމާ ގުޅޭ އިތުރު އެއްވެސް ތަފްސީލެއް އެ ގަރާރުގައި ފާހަގަކޮށްފައެއް ނުވެ އެވެ.

އައްޑޫ ސިޓީގެ ތަރައްގީއަށް މުހިންމު މަޝްރޫއެއް ހިންގުމަށް ކައުންސިލުން ރާވާފައިވަނިކޮށް، ކައުންސިލްގެ އެއްވެސް މަޝްވަރާއެއް ނެތި ސަރުކާރުން މިގޮތަށް ރަށްތައް އަތުލުމަކީ ރަށްރަށުގެ އިގްތިސާދީ ކުރިއެރުމަށް އެޅޭ ބޮޑު ހުރަހެއް ކަމަށް ބުނެ އާންމުން ދަނީ މި ސަރުކާރަށް ވަރަށް ބޮޑަށް ފާޑުކިޔަމުންނެވެ. އައްޑޫ ސިޓީގެ އިހްތިސާސުން ސަވާހެލި ވަކިކުރުމަކީ އެ ސިޓީގެ ތަރައްގީއަށް ހުރަސްއެޅުމަށް ހިންގާފައިވާ ހަޑިހުތުރު އަމަލެއް ކަމަށް ބުނެ އެމްޑީޕީން ވެސް ވަނީ ކަންބޮޑުވުން ފާޅުކޮށްފަ އެވެ.