ބަންގްލަދޭޝްއަށް ކުރަމުންދާ ބޯ ވިއްސާރައިގައި މަދުވެގެން 51 މީހުން މަރުވެ، މިލިއަނަކަށް ވުރެ ގިނަ މީހުން ހާލުގައި ޖެހިއްޖެ
13 ޖުލައި 2026 | ހޯމަ 09:43ބަންގްލަދޭޝްއަށް ކުރިމަތިވި ކުއްލި ފެންބޮޑުވުމާއި ބިންގަނޑު ކަނޑައިގެން ދިއުމުގެ ހާދިސާތަކުގައި އެތައް ހާސް ބައެއްގެ ގެދޮރު ގެއްލި، ރޮހިންޖާ ރެފިއުޖީން ދިރިއުޅޭ ކޮކްސް ބާޒާރަށް ބޮޑެތި ގެއްލުންތަކެއް ވަނީ ލިބިފައި. މި ވިއްސާރައާ ގުޅިގެން ދަތުރުފަތުރަށް ހުރަސްއެޅި އިމްތިހާނުތައް ފަސްކޮށްފައިވާއިރު، ގައުމުގެ ބައެއް ސަރަހައްދުތަކަށް އަދިވެސް ފެންބޮޑުވުމުގެ ނުރައްކާ އޮތްކަމުގެ އިންޒާރު ކަމާބެހޭ އިދާރާތަކުން ދޭ.
ބަންގްލަދޭޝްގެ ޗަޓޮގްރާމްގެ ބަންޝްޚާލީގައި ހިމެނޭ ކަތާރިއާ ސަރަހައްދަށް ކުރިމަތިވި ފެންބޮޑުވުމުގެ ކާރިސާއާ ގުޅިގެން، ގެތަކާއި ގަސްތައް ފެނުއަޑީގައިވާ މަންޒަރު. މި ފޮޓޯ ނަގާފައިވަނީ 2026 ވަނަ އަހަރުގެ ޖުލައި މަހުގެ 9 ވަނަ ދުވަހު. | ގެޓީ އިމޭޖަސް
ބަންގްލަދޭޝްއަށް ކުރަމުންދާ ބޯ ވިއްސާރައިގެ ސަބަބުން މިހާތަނަށް މަދުވެގެން 51 މީހުން މަރުވެ، އެއް މިލިއަނަށްވުރެ ގިނަ މީހުންނަށް އޭގެ އަސަރުކޮށްފި އެވެ.
ވެރިރަށް ޑާކާ ހިމެނޭހެން އެ ގައުމުގެ ބޮޑު ބަޔަކަށް ކުރިމަތިވި ކުއްލި ފެންބޮޑުވުމާއި ބިންގަނޑު ކަނޑައިގެން ދިއުމުގެ ހާދިސާތަކުގައި އެތައް ހާސް ބައެއްގެ ގެދޮރު ވަނީ ގެއްލިފަ އެވެ.
މިހާތަނަށް މަރުވި މީހުންގެ ދެބައިކުޅަ އެއްބަޔަށްވުރެ ގިނަ މީހުން މަރުވެފައިވަނީ ރޮހިންޔާ ރެފިއުޖީން ގިނަ އަދަދަކަށް ދިރިއުޅޭ ކޮކްސް ބާޒާރުގައެވެ. ނިމިދިޔަ ހަފުތާގައި އެ ސަރަހައްދުގެ ސްކޫލެއްގެ ތެރެއަށް ފެންގަނޑު ވަދެ، އޮހިގެންދިޔަ ވަރުގަދަ ފެންގަނޑާއެކު އެތަނުގެ ބައެއް ދަރިވަރުންނާއި މުދައްރިސަކު ވަނީ މަރުވެފަ އެވެ.
ބަންގްލަދޭޝްއަކީ ގިނަ އަދަދެއްގެ ކޯރުތައް އޮންނަ، ބިންތިރި ގައުމަކަށްވުމުން ކޮންމެ އަހަރެއްގެ މޫސުމީ ވިއްސާރައިގައި އެ ގައުމަށް ބޯކޮށް ވާރޭވެހި ފެންބޮޑުވުމުގެ ހާދިސާތައް ކުރިމަތިވެ އެވެ. ނަމަވެސް، މޫސުމަށް އަންނަ ބަދަލުތަކުގެ ސަބަބުން ވާރޭވެހޭ މިންވަރު އިތުރުވެ، މިފަދަ ހާދިސާތައް ކުރިމަތިވާ މިންވަރު އަވަސްވަމުންދާކަމުގެ އިންޒާރު މާހިރުންދެ އެވެ.
މީގެ ހަފުތާއަކަށްވުރެ ގިނަ ދުވަސް ކުރިން ފެށިގެން ކުރަމުންދާ ވިއްސާރަ ފަހަކަށް އައިސް އިތުރަށް ވަރުގަދަވުމާ ގުޅިގެން، ކަމާބެހޭ އިދާރާތަކުން ވަނީ ފެންބޮޑުވުމާއި ބިންގަނޑު ކަނޑައިގެން ދިއުމުގެ އިންޒާރު ނެރެފައެވެ. އަދި ނުރައްކާ ބޮޑު ސަރަހައްދުތަކުގައި ދިރިއުޅޭ އާއިލާތައް ރައްކާތެރި ހިސާބުތަކަށް ބަދަލުކޮށް، ދަރިވަރުންގެ އިމްތިހާނުތައް ވެސް ވަނީ ފަސްކޮށްފަ އެވެ.
މިހާރު އެތައް ހާސް ބަޔަކު ދިރިއުޅެމުންދަނީ ސަރުކާރުން ގާއިމުކޮށްފައިވާ ވަގުތީ ހިޔާވަހިކަމުގަ އެވެ.
ކަމާބެހޭ އިދާރާތަކުން ހާމަކޮށްފައިވާ ގޮތުގައި، އާދިއްތަ ދުވަހާ ހަމައަށް މި ވިއްސާރައިގެ އަސަރު އެއް މިލިއަނަށްވުރެ ގިނަ މީހުންނަށް ވަނީ ކޮށްފަ އެވެ.
މިހާތަނަށް މަރުވި ކަމަށް ރިޕޯޓުކޮށްފައިވާ 51 މީހުންގެ ތެރެއިން 28 މީހުންނަކީ ކޮކްސް ބާޒާރުން މަރުވި މީހުންނެވެ. އެ ސަރަހައްދަކީ ދުނިޔޭގެ އެންމެ ބޮޑު ރެފިއުޖީ އާބާދީ ކަމަށްވާ، އެއް މިލިއަނަށްވުރެ ގިނަ ރޮހިންޔާ މީހުން ދިރިއުޅޭ ސަރަހައްދެވެ.
ވެރިރަށް ޑާކާގެ މަގުތަކުގައި ފެންބޮޑުވެ ބައެއް ހިސާބުތަކުގައި ކަކުލާ ހަމައަށް ފެންބޮޑުވުމުގެ ސަބަބުން ދަތުރުފަތުރު ކުރުމަށް ވަނީ ބޮޑެތި ހުރަސްތަކެއް ކުރިމަތިވެފަ އެވެ.
ޑާކާގެ ފެންހިންދާ ނިޒާމު ރަނގަޅު ކުރުމަށް މީގެ ކުރިން ސަރުކާރުން ކޮށްފައިވާ މަސައްކަތްތަކާ މެދު އެ ގައުމުގެ ބައެއް މީޑިއާތަކުން ހޯމަ ދުވަހު ވަނީ ސުވާލު އުފައްދާފަ އެވެ.
ފްލަޑް ފޯކާސްޓިންގ އެންޑް ވޯނިންގ ސެންޓަރުގެ ސަރުދަރު އުދޯއި ރައިހާން އޭއެފްޕީ ނިއުސް އެޖެންސީއަށް މައުލޫމާތު ދެއްވަމުން ވިދާޅުވީ، ގައުމުގެ އިރުދެކުނު ސަރަހައްދުގެ ހާލަތު ވަރަށް އަވަހަށް ރަނގަޅުވާނެ ކަމަށް ބެލެވޭ ކަމަށެވެ.
ނަމަވެސް، ބަންގްލަދޭޝްގެ އިރުއުތުރާއި އުތުރުގެ ސަރަހައްދުތަކަށް މޫސުމީ ވިއްސާރައިގެ އަސަރު އަދިވެސް ކުރަމުންދާތީ، "އިތުރަށް ފެންބޮޑުވުމުގެ ފުރުސަތު އެބައޮތް" ކަމަށް އޭނާ އިންޒާރު ދެއްވި އެވެ.
މަސްދަރު: އޭއެފްޕީ
